“Зөөвч-Овоо” төсөл 2028 онд үндсэн олборлолтоо эхлүүлнэ

Салбарт хэрэгжиж буй гуравдагч хөршийн хамгийн том хөрөнгө оруулалтуудын нэг болох "Зөөвч-Овоо" ураны төслийн талбайд барилга угсралтын ажил хуваарийн дагуу үргэлжилж, 2028 онд үндсэн олборлолтоо эхлүүлэх бэлтгэл хангагдаж байна. Энэ талаар Францын "Орано" группийн Уул уурхайн бизнесийн асуудал хариуцсан тэргүүн дэд ерөнхийлөгч Завиер Сэйнт Мартин Тиллет, “Бадрах Энержи“ компанийн Гүйцэтгэх захирал Коралин Прин нар Тэргүүн Шадар сайд бөгөөд Эдийн засаг, хөгжлийн сайд Ж.Энхбаяртай уулзах үеэрээ мэдэгдлээ.

Төслийн гүйцэтгэгч “Бадрах Энержи” компанийн хувьд одоогоор 300 гаруй ажилтантайгаар үйл ажиллагаагаа өргөжүүлж, удирдлагын түвшний монгол мэргэжилтнүүдийг Франц улсад туршлага судлуулахаар ажиллуулж эхэлжээ. Мөн олборлолтын өмнөх туршилтын экспорт хийх технологийн болон логистикийн бэлтгэл бүрэн хангагдсан байна. Гэвч салбарын хөрөнгө оруулагчдын анхаарлыг татаж буй гол асуудал нь цацраг идэвхт ашигт малтмалын экспортын тусгай зөвшөөрлийг олгох эрх бүхий байгууллагын харьяалал хууль эрх зүйн хувьд тодорхойгүй хэвээр байгаа явдал юм.

Хөрөнгө оруулагч талын зүгээс туршилтын экспортоо саадгүй эхлүүлэхийн тулд уг зохицуулалтын тодорхойгүй байдлыг нэн даруй шийдвэрлэж өгөх хүсэлтийг Засгийн газарт уламжиллаа.

Эдийн засаг, хөгжлийн сайд Ж.Энхбаярын зүгээс Хаврын чуулганаар батлагдсан Бизнесийн эрх чөлөөний хуулийн хүрээнд тусгай зөвшөөрлийн процессыг цахимжуулж, гадаадын хөрөнгө оруулалтад саад болж байсан хуулийн хоригуудыг цуцалсан тул уг экспортын зөвшөөрлийн асуудлыг шуурхай шийдвэрлэхээ амлав. Түүнчлэн талууд төслийн байгаль орчны хариуцлага, цацрагийн аюулгүй байдлын хяналтыг олон улсын түвшинд хэрэгжүүлэх зорилгоор хараат бус хөндлөнгийн лаборатори байгуулах асуудлыг нухацтай хөндөн ярилцлаа. 

Засгийн газрын хувьд уг төслийг зөвхөн уул уурхайн экспорт талаас нь биш, өндөр технологи, байгаль орчны хариуцлагатай менежментийг дотоодод нутагшуулах стратегийн ач холбогдолтой гэж үзэж байгаа ба төлөвлөсөн хугацаандаа буюу 2028 онд ашиглалтад орсноор орон нутагт ажлын байр нэмэгдэж, улсын төсөвт урт хугацааны тогтвортой орлого орно гэж тооцоолж байна.