АНУ, Ираны хэлэлцээрт ахиц дэвшил гарлаа

АНУ болон Исламын Бүгд Найрамдах Иран Улсын хооронд Швейцарт зохион байгуулагдсан эхний шатны хэлэлцээ өнөөдөр (2026.06.22) өндөрлөсөн талаар зуучлагч талууд мэдээллээ.

Катар болон Пакистан улсын зуучлалтайгаар явагдсан уг уулзалтын үр дүнд талууд ирэх 60 хоногийн дотор эцсийн хэлэлцээрт хүрэхээр тохиролцсон байна. Хэдийгээр үндсэн уулзалт өндөрлөсөн ч техникийн түвшний нарийвчилсан хэлэлцүүлгүүд энэ долоо хоногийн турш үргэлжлэх аж.

Хэлэлцээрийн гол үр дүн, тохиролцоо:

Ормузын хоолойгоор арилжааны хөлөг онгоцуудыг аюулгүй нэвтрүүлэх холбооны шугамыг нээхээр тохиролцов. Ливан дахь зэвсэгт мөргөлдөөнийг эцэс болгох, бүс нутгийн тогтвортой байдлыг хангах механизмыг талууд зөвшөөрсөн байна.

Ираны талын мэдээлж буйгаар, тус улс газрын тос болон нефть химийн бүтээгдэхүүний экспортын хоригоос чөлөөлөгдөх, царцаасан зарим хөрөнгөө эргүүлэн авах баталгааг харилцан ойлголцлын хүрээнд тохиролцож чаджээ.

Уулзалтын эхэнд АНУ-ын Ерөнхийлөгч Дональд Трампын зүгээс Ормузын хоолойг дахин хаах тохиолдолд цэргийн цохилт өгөхөө мэдэгдэж, Ираны төлөөлөгчид хэлэлцээний өрөөг орхин зуучлагчдаар дамжуулан харилцах зэрэг үл ойлголцол үүссэн ч талууд дипломат яриа хэлэлцээгээ амжилттай үргэлжлүүлсэн байна.

Бүс нутгийн хурцадмал байдал намжих төлөвтэй болсон тухай тус мэдээллийн дараа олон улсын зах зээл дээр Брент маркийн түүхий газрын тосны үнэ баррель нь 79.44 ам.доллар болж буурлаа.

Эх сурвалж: Reuters