УЛСЫН ТӨСВИЙН ОРЛОГО 13.5 ИХ НАЯД ТӨГРӨГТ ХҮРСЭН Ч АЛДАГДАЛ НЬ 5.2 ДАХИН ӨСЖЭЭ

Монгол Улсын 2026 оны эхний 5 сарын төсвийн урьдчилсан гүйцэтгэлийн үзүүлэлт гарлаа. Улсын нэгдсэн төсвийн нийт орлого өмнөх оны мөн үеэс өссөн хэдий ч хөрөнгө оруулалт болон бараа үйлчилгээний зардал хурдтай нэмэгдсэнээс шалтгаалж, төсвийн алдагдал үлэмж хэмжээгээр тэлсэн байна.

Орлого 18.7 хувиар өсөв

Улсын нэгдсэн төсвийн нийт орлого ба тусламжийн хэмжээ 2026 оны эхний 5 сард 13.5 их наяд төгрөгт хүрч, өмнөх оны мөн үеэс 2.1 их наяд төгрөг буюу 18.7 хувиар өсжээ. Үүнээс төсвийн тэнцвэржүүлсэн орлого 11.7 их наяд төгрөгийг эзэлж байна.

Татварын нийт орлого 10.7 их наяд төгрөг болж өсөхөд Нийгмийн даатгалын орлого (16.7%-иар) болон НӨАТ (9.8%-иар) нэмэгдсэн нь голлон нөлөөлжээ. Харин эсрэгээрээ Орлогын албан татвар 0.6 хувиар, Онцгой албан татвар 28.2 хувиар тус тус буурсан үзүүлэлттэй гарлаа. Татварын орлогын хамгийн том хувийг Орлогын албан татвар (30.5%) болон НӨАТ (23.6%) бүрдүүлж байна.

Хөрөнгө оруулалтын зардал 72.5 хувиар огцом нэмэгджээ

Төсвийн орлого өссөн ч зарлагын өсөлт түүнийг давлаа. Нийт зарлага, цэвэр зээлийн хэмжээ эхний 5 сард 13.0 их наяд төгрөгт хүрч, өмнөх оноос 2.1 их наяд төгрөгөөр (18.7%) нэмэгдсэн байна.

Зардал ийнхүү өсөхөд хөрөнгийн (хөрөнгө оруулалтын) зардал өмнөх оны мөн үеэс 72.5 хувиар буюу 784.2 тэрбум төгрөгөөр огцом өссөн нь гол түлхэц болжээ. Тэр дундаа барилга байгууламжийн зардал 87.2 хувиар өссөн байна. Мөн бараа үйлчилгээний зардал 17.5 хувиар өсжээ.

Орлого, зарлагын энэхүү зөрүүгээс шалтгаалж төсвийн тэнцвэржүүлсэн тэнцэл 1.4 их наяд төгрөгийн алдагдалтай гарлаа. Энэ нь өмнөх оны мөн үеийн төсвийн алдагдалтай (-259.9 тэрбум ₮) харьцуулахад 5.2 дахин өссөн үзүүлэлт юм.

 Орон нутгийн төсөв 415 тэрбум төгрөгийн ашигтай байна

Улсын төсөв алдагдалтай байгаа ч орон нутгийн төсөв эерэг дүнтэй гарлаа. Орон нутгийн төсвийн орлого 3.1 их наяд төгрөг, зарлага 2.7 их наяд төгрөг болж, урьдчилсан гүйцэтгэлээр 415.2 тэрбум төгрөгийн ашигтай гарсан байна.

Бүсүүдээр авч үзвэл, Нийслэл Улаанбаатар хот (1.6 их наяд ₮) болон Төвийн бүс (957.5 тэрбум ₮) орлогын бүрдүүлэлтээр тэргүүлж байна. Төвийн бүсийн орлогын дийлэнх буюу 708.2 тэрбум төгрөгийг Өмнөговь аймаг дангаараа бүрдүүлжээ.

Эрүүл мэндийн даатгалын сан алдагдлаас гарлаа

• Нийгмийн даатгалын сан (НДС): Тус сангийн орлого 17.7 хувиар өсөж, 3.1 их наяд төгрөгт хүрсэн бол зарлага нь 15.2 хувиар өсөж, 2.8 их наяд төгрөг боллоо. Сангийн тэнцэл 336.2 тэрбум төгрөгийн ашигтай байна.

• Эрүүл мэндийн даатгалын сан (ЭМДС): ЭМДС-ийн орлого 7.8 хувиар өсөж, 1.1 их наяд төгрөгт хүрсэн бол зарлага нь урсгал шилжүүлэг буурсантай холбоотойгоор 11.9 хувиар буурч, 952.7 тэрбум төгрөг болжээ. Үүний үр дүнд өмнөх онд 105.0 тэрбум төгрөгийн алдагдалтай байсан тус сан энэ жил 100.0 тэрбум төгрөгийн ашигтай гарч, санхүүгийн байдал нь сайжирсан байна. 

Эх сурвалж: Үндэсний статистикийн хороо