ЭРДЭНЭТИЙН-ОВООНЫ БҮЛЭГ ОРД АЛБАН ЁСООР БҮРТГЭГДЭЖ, ОЮУТ ОРДЫН НӨӨЦИЙГ 404 САЯ ТОНН ХҮДЭРТ ХҮРГЭСНИЙГ БАТАЛГААЖУУЛЛАА

Улаанбаатар хотноо болсон Эрдэс баялгийн мэргэжлийн зөвлөлийн өргөтгөсөн хуралдаанаар (2026.05.01) Эрдэнэтийн-Овоо орчмын Оюут ордод 2023–2025 онд гүйцэтгэсэн нарийвчилсан хайгуулын ажлын үр дүнг хэлэлцэн, стратегийн ач холбогдолтойд тооцон нөөцийг нь албан ёсоор хүлээн авлаа. Ингэснээр Эрдэнэтийн-Овоог "бүлэг орд" хэмээн нэрлэх эрх зүйн үндэс бүрдэж, Монгол Улсад хайгуул нь бүрэн хийгдэж дууссан зэсийн цөөн ордын нэг болон бүртгэгдэж байна.

Хайгуулын ажлын тайланг анх шийдвэр гарсан өдрөөс яг гурван жилийн дараа буюу ой дээр нь танилцуулсан бөгөөд гүйцэтгэгчид төлөвлөсөн ажлыг хугацаанаас нь зургаан сарын өмнө амжилттай дуусгажээ. Судалгааны хүрээнд Оюут уулын бүсэд 930 метр хүртэл гүн өрөмдлөг хийснээр зэсийн хүдэржилт анх төлөвлөсөн гүнээс доош хэдэн зуун метрт үргэлжилж байгааг тогтоосон нь ордын геологийн боломжийг мэдэгдэхүйц тэлсэн дүгнэлт болсон юм.

Нөөцийн хувьд 1990 онд 42 сая тонн хүдэртэй хэмээн үнэлэгдэж байсан тус ордын хэмжээг 200 сая тонн хүргэх зорилт тавьж байсан ч геологичид энэ үзүүлэлтийг давуулан биелүүлжээ. Нарийвчилсан хайгуулаар Оюут ордыг 404 сая тонн хүдэр, дунджаар 0.30 хувийн агуулгатай, 1.2 сая тонн металл зэсийн нөөцтэй болохыг тогтоож, Канад улсын NI 43-101 стандартын дагуу хөндлөнгийн экспертүүдээр хянан баталгаажуулсан байна.

Өмнө нь тус ордыг цаашид судлах шаардлагагүй хэмээн үзэж байсан ч дэлхийн зах зээл дэх зэсийн үнийн өсөлт болон Эрдэнэтийн бэлэн дэд бүтцэд тулгуурлан ийнхүү эдийн засгийн өндөр өгөөжтэй болох нь нотлогдлоо. Судалгаагаар нийт 55 төрлийн эрдэс, 36 элементийн бүрэлдэхүүнийг тогтоосон нь энэ төрлийн хайгуулын ажилд шинэ жишиг тогтоосон бөгөөд цаашид Орхон-Сэлэнгийн бүс нутагт Завсар, Өмнөд Оюут, Цагаанчулуут зэрэг талбайнуудад дараагийн шатны хайгуул хийх үүдийг нээж байна. Энэхүү үр дүн нь Засгийн газрын 2024–2028 оны үйл ажиллагааны хөтөлбөрт туссан стратегийн ордуудын нөөцийг тогтоож, ашиглалтад бэлтгэх зорилтын бодит биелэл болж байгааг салбарынхан онцоллоо.