Хятадын нүүрсний импорт оны эхний улиралд 1.3% өсөж 116.28 сая тоннд хүрэв

Б.Төгс

Хятад улсын нүүрсний импорт энэ оны гуравдугаар сард 39.06 сая тоннд хүрснийг тус улсын Гаалийн ерөнхий газар мэдээллээ. Энэ нь өнгөрсөн оны мөн үеийнхээс 0.84% өссөн дүн болж байна. Нүүрсний импортын хэмжээ өнгөрсөн хоёрдугаар сарын дүнгээс (30.94 сая тн) даруй 26.23%-иар өндөр дүн боллоо.

Ингэснээр тус улсын нүүрсний импортын нийт хэмжээ он гарсаар эхний гурван сарын байдлаар 116.28 сая тонн болж 1.3%-иар нэмэгдсэн үзүүлэлттэй гарлаа. Мөн хугацаанд импортолсон нүүрсний нийт үнэлгээ 8.73 тэрбум ам.долларт хүрсэн нь өмнөх оны мөн үеийнхээс 6% доошилсон дүн юм.

Өнгөрсөн гуравдугаар сард тус улсын импортолсон нүүрсний мөнгөн дүн 2.94 тэрбум ам.доллароор хэмжигдсэн нь өмнөх оны мөн үеийнхээс 3.06%, өмнөх сарынхаасаа 30.45%-иар тус тус өссөн байна. Импортын нүүрсний дундаж үнэ гуравдугаар сард тонн тутамдаа 75.38 ам.доллар байсан нь өмнөх оны мөн үеийнхээс 1.62 ам.доллар, өмнөх сарынхаасаа 2.44 ам.доллароор тус тус нэмэгджээ.