Эрдсийг эрдэнэст
Ирээдүйг өндөр хөгжилд
Ирээдүйг өндөр хөгжилд
Mining The Resources
Minding the future
Minding the future
О. Дөлгөөн
Монгол Улсын уул уурхай, дэд бүтцийн салбарын хөгжилтэй салшгүй холбоотой ажиллаж ирсэн “Таванбогд Констракшн Машинери” ХХК (TCM) энэ сарын 19-ний өдөр жил бүр уламжлал болгон зохион байгуулдаг “Харилцагчийн Талархлын Өдөрлөг” (Customer Appreciation Day – CAD) арга хэмжээгээ ёслол төгөлдөр тэмдэглэлээ. Энэ удаагийн уулзалт зөвхөн харилцагч, түншүүддээ талархал илэрхийлэх арга хэмжээ төдийгүй компанийн 15 жилийн ойн баяртай давхцсан онцгой үйл явдал болсноороо онцлог байв.
TCM-ийн түүхийг сөхвөл, 2010 онд байгуулагдан Монголын уул уурхайн салбарт Японы алдарт “Hitachi Construction Machinery” брэндийн албан ёсны дилер болж эхэлсэн байдаг. Тухайн үед уул уурхайн салбар эрчтэй өргөжин хөгжиж байсан ч дэлхийн стандартад нийцсэн найдвартай техник хэрэгсэл, чанартай сэлбэг ханган нийлүүлдэг байгууллага тун ховор байлаа. Харин өнөөдөр TCM нь Монголын уул уурхайн томоохон оператор компаниудын итгэлт түнш болж, 15 жилийн хугацаанд тогтвортой өсөлт, чанартай үйлчилгээгээр салбартаа байр сууриа баталгаажуулжээ.
Компанийн гүйцэтгэх захирал Ю. Ариунсайхан хэлэхдээ:
“Энэ жилийн арга хэмжээний гол утга бол “15” гэсэн тоо. 15 жилийн өмнө зүгээр л мөрөөдөл байсан зүйл өнөөдөр дэлхийн шилдэг брэнд Hitachi-г Монголд нутагшуулж, 140 гаруй тоног төхөөрөмжийг зах зээлд амжилттай ажиллуулж байгаагаар бодит амжилт болон тодорч байна. Хамгийн жижиг нь нэг куб метр багтаамжтай экскаватороос эхлээд хамгийн том нь 34 куб метрийн багтаамжтай экскаваторууд, түүнчлэн 60 тонноос 220 тонн хүртэлх өөрөө буулгагч машинууд өнөөдөр Монголын уул уурхайд хүч нэмэн ажиллаж байна.” гэж онцоллоо.
Энэ бол зөвхөн тоо биш, харин дэлхийн стандартыг эх орондоо суурьшуулсан замналын тод жишээ юм.
“Customer Appreciation Day” арга хэмжээ нь TCM-ийн хувьд нэг төрлийн уламжлал болоод зогсохгүй, харилцагчдынхаа үгийг сонсох, хамтын ажиллагааг улам бэхжүүлэх талбар болж өгдөг. Энэ жилийн арга хэмжээнд уул уурхайн салбарын голлох компаниудын удирдлагууд, инженер техникийн ажилтнууд, хамтран ажилладаг түншүүд өргөнөөр оролцов.
Арга хэмжээний үеэр шинэ техник, үйлчилгээний шийдлүүдийн танилцуулга, компанийн амжилтыг дүгнэсэн баримтат видео, шагнал урамшууллын хэсгүүд өрнөж, салбарынхны уулзалт, хэлэлцүүлгийн өргөн боломжийг бүрдүүлэв.
Hitachi бол дэлхийн уул уурхай, барилгын тоног төхөөрөмжийн салбарт тэргүүлэгч брэндийн нэг. Монгол Улсад TCM-ийн албан ёсны дилерийн үйл ажиллагаа эхэлснээр бүрэн хэмжээний экскаватор, өөрөө буулгагч, өрөмдлөгийн техник зэрэг тоног төхөөрөмжийг хэрэглэгчид найдвартайгаар авах боломж бүрдсэн.
Түүнчлэн зөвхөн тоног төхөөрөмж нийлүүлэхээс гадна сэлбэг ханган нийлүүлэлт, засвар үйлчилгээ, сургалт, техникийн дэмжлэг зэргийг иж бүрнээр нь үзүүлдэг нь TCM-ийн гол давуу тал юм. Энэ нь хэрэглэгчийн техник тасралтгүй, найдвартай ажиллах нөхцөлийг хангаж, улмаар уул уурхайн компанийн бүтээмжийг дээшлүүлэхэд чухал үүрэг гүйцэтгэж байна. Өнгөрсөн хугацаанд компани зөвхөн техник нийлүүлэх бус, харилцагчдын хэрэгцээ шаардлагад нийцсэн шийдэл санал болгож иржээ.
Өнөөдөр уул уурхайн салбар Монгол улсын ДНБ-ий 27 орчим хувийг бүрдүүлж байгаа бөгөөд салбарын тогтвортой ажиллагаанд техник, тоног төхөөрөмжийн найдвартай байдал хамгийн чухал хүчин зүйлсийн нэг. Энэ утгаараа TCM нь зөвхөн бизнесийн байгууллага байгаагүй, харин салбарын хөгжилд бодитой хувь нэмэр оруулсан түнш гэдгийг уг арга хэмжээ дахин нотоллоо.
“Таванбогд Констракшн Машинери” ХХК-ийн 15 жилийн ой, “Customer Appreciation Day 2025” арга хэмжээ нь өнгөрсөн хугацааны амжилтыг харуулж зогсохгүй, цаашдын зорилтоо тодорхойлсон чухал уулзалт байлаа. Монголын уул уурхайн салбарт Hitachi брэндийг нэвтрүүлсэн 15 жилийн түүх бол зөвхөн нэг компанийн түүх биш, харин салбарын хөгжилд үлэмж нөлөө үзүүлсэн бодит алхам юм.
Харилцагчдаа эрхэмлэсэн бодлого, дэлхийн стандартыг нэвтрүүлсэн хичээл зүтгэл, ирээдүйд чиглэсэн зорилго бүхий TCM-ийн замнал цаашид ч Монголын уул уурхайн салбарт шинэ хуудас нээж, улам олон амжилтын эзэн болохыг салбарынхан итгэлтэйгээр харж байна.