Дотоод халдварын тархалт Оюутолгой уурхай дахь ажилчдын тоог 25%-иар бууруулав

2021-07-23 16:09

- “КОВИД-19”-ийн хязгаарлалтууд ил уурхайн үйл ажиллагаа болон гүний уурхайн бүтээн байгуулалтын үйл явцад багагүй нөлөөлж байна

- Шинэчилсэн Нөөцийн тайланг бүртгүүлэх, шинэчилсэн ТЭЗҮ-ийг батлуулах ажил хүлээгдэж байна

- Дэлхийд өрсөлдөхүйц аюулгүй ажиллагааны гүйцэтгэлээ хадгаллаа

- Ил уурхайн үйл ажиллагаа эхэлсний арван жилийн ой тохиов

- Цар тахлын эсрэг Өмнөговь аймагтай нягт хамтран ажиллаж байна

- Ус ашиглалтыг хамгийн доод түвшинд аваачив

- Дотоодод зарцуулсан мөнгөн хөрөнгө 12.7 тэрбум ам.доллар хүрсний 3.7 тэрбум доллар нь үндэсний худалдан авалтад оногдов

“Оюутолгой” компани 2021 оны хоёрдугаар улирлын үйл ажиллагааны тайлангаа танилцууллаа.

Өнгөрсөн хоёрдугаар улиралд уурхайгаас 36.7 мянган тонн зэс, 113 мянган унц алт, 235 мянган унц мөнгө агуулсан нийт 173 мянган тонн баяжмал үйлдвэрлэжээ. Энэ нь өнгөрсөн оны мөн үеийнхээс өссөн үзүүлэлт боловч өмнөх нэгдүгээр улирлынхаас буурсан дүн болж байна. Тухайлбал баяжмал дахь зэсийн үйлдвэрлэл хоёрдугаар улиралд өмнөх улирлынхаасаа 19%-иар, алтных 22%-иар тус тус буурчээ. Харин борлуулсан баяжмалын хэмжээ хоёрдугаар улиралд 92.6 мянган тонноор илэрхийлэгдсэн нь өмнөх нэгдүгээр улиралд уг үзүүлэлт 186.3 мянган тонн байсантай харьцуулахад үлэмж буурчээ.

2021 оны хоёрдугаар улиралд Монгол Улсад “КОВИД-19” өвчний дотоодын тархалт өсөж, түүнээс улбаалан улсын хэмжээнд болон Өмнөговь аймагт тогтоосон шат дараалсан хөл хориотой холбоотой ажилчдын ээлж солих үйл явцыг хэвийн явуулахад хүндрэл үүсчээ. Иймд уурхайн талбар дээрх ажилчдын тоо энэ улиралд төлөвлөсөн хэмжээнээс 25%-иар бага байв. Үүнээс улбаалан “КОВИД-19”-ийн хязгаарлалтууд ил уурхайн үйл ажиллагаа болон гүний уурхайн бүтээн байгуулалтын үйл явцад багагүй нөлөөлжээ. Гэсэн ч компанийн зүгээс холбогдох суурь шалгууруудыг ханган гүний уурхайн огтлох малталтын ажлыг эхлүүлэхээр ажиллаж байна. 2021 оны долдугаар сарын 9-ний байдлаар компанийн ажилчдын 93% нь “КОВИД-19” -ийн эсрэг вакцинд бүрэн хамрагдсан байсан бөгөөд уурхайн талбарт зохих дэглэмийг мөрдөн ажиллаж байна.

“Оюутолгой” компанийн Гүйцэтгэх захирлын үүрэг гүйцэтгэгч Жак ван Тондэр “Бид өөрсдийн үйл ажиллагаа болон уурхайн талбар дахь “КОВИД-19”-ийн нөхцөл байдал, авч хэрэгжүүлж буй арга хэмжээнийхээ талаарх мэдээллийг Өмнөговь аймгийн удирдлагуудад ил тод, нээлттэй өгч, хамтран ажиллаж байна. “Оюутолгой” компани Өмнөговь аймагт 9,000 тун “Спутник-V” вакцин болон шаардлагатай хувийн хамгаалах хэрэгслийг хандивласан нь манай хамт олон дэлхий дахиныг нөмөрсөн цар тахалтай орон нутгийн иргэдтэйгээ хамтран хэрхэн тэмцэж байгааг харуулж байна. Энэхүү хүнд, хэцүү цаг үед уурхайн үйл ажиллагааг аюулгүй, хэвийн явуулахаар чармайн ажиллаж буй нийт ажилчид, ханган нийлүүлэгч байгууллагууд болон бидний үйл ажиллагааг дэмжиж буй төрийн албан хаагчдад гүн талархал илэрхийлье. Оюутолгойн гэр бүл өнгөрсөн арван жилийн турш үнэ цэн бүтээлцэж, Монгол Улсын эдийн засагт багагүй хувь нэмрийг оруулсан ил уурхайнхаа амжилтыг тэмдэглэж байна. МУИС-ийн бие даасан судалгаанд дурдсанчлан Оюутолгойн уурхай Монгол Улсын төсвийн 10%-ийг дангаар бүрдүүлж буйг тэмдэглэхэд бахархалтай байна. Бид гүний уурхайн огтлох малталтыг эхлүүлж, Оюутолгойн бүрэн үнэ цэнийг нийт ард иргэд, талуудад хүртээхэд улам бүр ойртсоор байна. Огтлох малталтыг эхлүүлэхэд шаардлагатай байгаа шинэчилсэн Нөөцийн тайланг бүртгүүлэх, шинэчилсэн ТЭЗҮ-ийг Засгийн газрын холбогдох байгууллагууд хүлээн авах ажлууд ойрын хугацаанд дуусна гэж итгэж байна" гэв.

Хоёрдугаар улиралд аюулгүй ажиллагааг нэн тэргүүнд тавьж гэмтэл, бэртлийн давтамжийн үзүүлэлт 200,000 хүн/цаг тутамд 0.20 байлаа. Энэ нь Оюутолгойн аюулгүй ажиллагааны шилдэг гүйцэтгэлийг батлах бөгөөд харьцуулахад өнгөрсөн улиралд Рио Тинто группийн бусад үйл ажиллагааны дундаж үзүүлэлт 0.39 байжээ.

Нэг тонн хүдэр боловсруулахад 0.34 шоо метр ус нөхөн сэлбэлтээр хэрэглэсэн нь дэлхийн ижил төрлийн уурхайнуудын ашиглалтын дунджаас даруй гурав дахин бага ус ашиглаж байгаа үзүүлэлт ажээ. Энэ хугацаанд ашигласан усаа дунджаар 89.1%-ийг дахин боловсруулан эргэлтэд оруулжээ.

Татвар, төлбөр, хураамж хэлбэрээр 503 сая ам.долларыг 2021 оны хоёрдугаар улиралд төлсөн бол нийлбэр дүнгээрээ 2010 оноос хойш 3.4 тэрбум ам.долларыг дээрх хэлбэрээр төлжээ. Үүнд Монголын ханган нийлүүлэгчдэд төлсөн НӨАТ хамаарна.

Оны эхний хагаст 628 ханган нийлүүлэгчтэй хамтран ажилласны 407 нь үндэсний ханган нийлүүлэгчид байв. Үйл ажиллагааны худалдан авалтынхаа 75%-ийг эдгээр үндэсний ханган нийлүүлэгчдээс бүрдүүлжээ.

2021 оны хоёрдугаар улиралд зэсийн баяжмалыг хэрэглэгчдэд хүргэхэд гуравдугаар сарын 30-ны өдрөөс эхэлсэн хилийн хязгаарлалт нөлөөлж, “Оюутолгой” компани “давагдашгүй хүчин зүйл бүхий нөхцөл байдал” үүссэн гэдгийг зарласан. 2021 оны дөрөвдүгээр сарын 15-ны өдөр компани зэсийн баяжмалыг хэрэглэгчид рүү тээвэрлэн хүргэх ажлыг сэргээсэн бөгөөд ханган нийлүүлэлтийн тасалдлыг зохицуулахын тулд орон нутгийн болон БНХАУ-ын холбогдох албатай хамтран ажиллаж байна. Худалдан авагчдын өмнө хүлээсэн үүргээ биелүүлэх, уурхайн талбар дахь баяжмалын хэмжээг зорилтот түвшинд хүргэх, хилээр гарах баяжмалын цуваа тогтвортой болгох хүртэл “Оюутолгой” компани “давагдашгүй хүчин зүйл бүхий нөхцөл байдал” хэвээр үйлчилсээр байх болно.
 

Монгол Улс дахь “КОВИД-19” цар тахалтай холбоотой өндөржүүлсэн хязгаарлалтууд гүний уурхайн төслийн үр дүнд ихээхэн нөлөөлсөн. Эдгээр хязгаарлалтад нийцүүлэн уурхайн талбар дахь ажиллах хүчний тоог төлөвлөснөөс 25%-иар доогуур байлгажээ. Материал тээвэрлэх нэгдүгээр системийн ажил нарийвчилсан тооцоололд дурдсанаас ахицтай байж огтлох малталтыг эхлүүлэхэд дэмжлэг үзүүлэх техникийн шалгуурыг 90% хангажээ. Цаашид цар тахлын үргэлжилсэн нөлөөлөл, огтлох малталтыг эхлүүлэх техникийн бус шалгуураас үлдсэн ажлууд хамаарах тухай компани онцоллоо.

Энэ улиралд налуу амын туузан дамжуулгын ажилд багахан хэмжээний ахиц гарсан бол агааржуулалтын урд болон хойд амын ажилд төлөвлөсөн хэмжээний ахиц гарсангүй. Гэсэн хэдий ч хорио цээрийн хязгаарлалтыг зөөлрүүлж, ажилчдын цар тахлын эсрэг вакцинжуулалтыг эрчимжүүлснээр уурхайн талбар дахь нөөцийг аажмаар сайжруулж байна. Эхний хагас жилд тохиолдсон цар тахлын хязгаарлалт одоо ч компанийн үйл ажиллагаанд нөлөөлж байгаа ба эдгээр нөлөөллийг тооцоолох ажил үргэлжилж байна.

Материал тээвэрлэх хоёрдугаар систем, баяжуулах үйлдвэрийн шинэчлэл зэрэг гэрээний дагуу хийх ажлууд төслийг дуусгахад шаардлагатай төсвийн нэмэгдэлтэй холбоотой ТУЗ-өөс батлах хүртэл хойшлоод байна.

Агааржуулалтын урд болон хойд амын барилгын ажил хойшилсонтой холбоотой болон бусад холбогдох нөлөөллийг тооцсоны дараагаар нэг, хоёрдугаар панелын талаарх мэдээллийг шинэчлэн хүргэнэ.

Гүний уурхайн огтлох малталтыг эхлүүлэхэд дараах ажлууд хүлээгдэж байна.

Үүнд: шинэчилсэн нөөцийн тайлан, ТЭЗҮ (ОТТЭЗҮ20)-ийг Засгийн газрын холбогдох байгууллагууд бүртгэх, хүлээн авах; Оюутолгойн ТУЗ-өөс гүний уурхайн нарийвчилсан тооцоололтой уялдуулан гүний уурхайн нэмэлт санхүүжилтийг батлах; дөрөвдүгээр сард Рио Тинто ба Туркойз Хилл Ресурс”-ын хооронд байгуулсан гүний уурхайн нэмэлт санхүүжилтийн төлөвлөгөөнд нийцүүлсэн санхүүжилтийн төлөвлөгөөг Оюутолгойн ТУЗ батлах болон Оюутолгойн уурхайг дотоодын эрчим хүчээр хангах ажлыг урагшлуулах зэрэг багтана.

 

 

Эх сурвалж: "Оюутолгой" ХХК

 

 

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • 2021-09-15 12:39
    Үндэсний аюулгүй байдлын зөвлөл (2021.09.02) хуралджээ. Цар тахлын үеийн эдийн засгийг сэргээх хуулийн төслийг уг зөвлөлөөр хэлэлцээд  дэмжсэн байна. Удахгүй Засгийн газар УИХ-ын намрын чуулганд өргөн мэдүүлж, хэлэлцүүлнэ. Хуулийн төсөлд  гадаадын хөрөнгө оруулалтыг нэмэгдүүлэх заалтыг оруулсан хэмээн Ерөнхий сайд Л.Оюун-Эрдэнэ тодотгов. Тэрээр Цар тахлын үеийн эдийн засгийг эрчимжүүлэх, экспортыг нэмэгдүүлэх, импортыг орлох үндэсний үйлдвэрлэлийг дэмжих, төр, хувийн хэвшлийн түншлэлийг бэхжүүлэх, хөрөнгө оруулалтыг нэмэгдүүлэх Үндэсний хороог ахалдаг билээ. “Урт” нэртэй уг хорооны гол ажил ийнхүү хуулиар дамжин хэрэгжиж байж биеллээ олох юм.   
  • 2021-09-14 12:14
    ...Супер циклийг март, түүнээс ч цараатай хэмээн эрдсийн зах зээлийн хандлагын талаар Роберт Фридланд ярьжээ. Урьд хожид үзээгүй томоохон хувьсгал гэж “ногоон” эдийн засгийн шилжилтийг тэр тодорхойлов. Тэрээр “Цэвэр эрчим хүчний дэд бүтэц, цахилгаан машин цэнэглэх станцуудын сүлжээ гэх мэт бүтээн байгуулалтыг санхүүжүүлэх хэрэгцээ өмнөх супер циклийн үеийн хөрөнгө оруулалтаас ч давах нь гарцаагүй. Энэ нь уул уурхайн төслүүд, хөрөнгө оруулагчдад асар их боломжийг нээнэ” гэдэгт итгэлтэй байна.
  • 2021-09-13 10:56
    Ердөө дөрвөн сарын өмнө (2021.03 сар) Сангийн сайд Б.Жавхлан  “Төсөвт тодотгол хийх эсэхийг хэлэхэд эрт байна. Тодотгол хийе гэж иргэд шаардаж байгаа ч энэ бол миний шийддэг асуудал биш. Төсвийн зардал тасалдаагүй, хөрөнгө оруулалт зогсоогүй” хэмээн  мэдэгдэж байлаа. Гэвч цар тахлын халдварын нөхцөл байдал хүндэрч, хилийн боомтууд  хаагдан  улсын эдийн засаг  улам ч эрсдэлд оров. Арга буюу улсын баяр наадмын өмнөхөн (07.08) УИХ төсвөө яаравчлан тодотголоо. 2021 оны макро эдийн засгийн төсөөлөл өнөөдөр анх тооцон төсөвт тусгаснаас өөрөөр “эргэжээ”. Өөрөөр хэлбэл, төсвийн алдагдал  энэ оны Төсвийн тухай хуульд баталсан түвшнээс нэмэгдэхээр байгаа нь төсөвт өөрчлөлт оруулахаас өөр гарцгүй байдалд оруулсан юм. Төсвийн алдагдлын хэмжээ бүр ДНБ-ий  8.8%-д хүрч нэмэгдэхээр байна.
  • 2021-09-09 10:57
    Олборлох үйлдвэрлэлийн ил тод байдлын санаачилгын (ОҮИТБС) Олон улсын нарийн бичгийн газар, “Нээлттэй өмчлөл” байгууллага, BHP сангийн түншлэлийн хүрээнд “Олборлох салбарыг нээлттэй болгох нь” хөтөлбөрийн цахим хурал өчигдөр боллоо. Энэхүү хөтөлбөрийг байгалийн баялагтай орнуудад хэрэгжүүлснээр олборлох салбарын орлогыг  цөөнхид, тэднийг баяжуулахын төлөө бус хөгжлийн төлөө  л зарцуулагдах нь ач холбогдолтой хэмээн ОҮИТБС-ын Олон улсын нарийн бичгийн газрын гүйцэтгэх захирал Марк Робинсон цахим форумын нээлтийн үгэндээ онцоллоо. “Энэхүү хөтөлбөр нь улс орнуудын татварын орлогыг нэмэгдүүлж авилгын эсрэг үйл ажиллагааг сайжруулна. Ингэснээр олборлох салбарт зөрчил сөргөлдөөн багасаж, Засгийн газрын орлогыг хөгжлийн төлөө зарцуулах нөхцөлийг бүрдүүлж, байгалийн баялгаас хамааралтай улс орнуудын  ард иргэдийн амьдралын чанар сайжирна” хэмээн тэрээр онцолсон.
  • 2021-09-08 18:11
    Монголын уул уурхайн салбарын хамгийн шилдэг компаниудыг нэгтгэдэг “Mongolia Mining 2021” олон улсын уул уурхай, газрын тосны үзэсгэлэн 10 дахь жилдээ зохион байгуулагдах гэж байна. Энэ үзэсгэлэнгийн Ерөнхий ивээн тэтгэгч “ГРАНД МАЙНИНГ ЭКЮПМЕНТ” ХХК-ийн захирал Ж. Эрдэнэбилэгээс тус арга хэмжээнд хэрхэн оролцох талаар нь тодруулсан юм.