Алс Дорнодоос нүүрс чингэлгээр Хятад руу экспортолж эхэлжээ

ОХУ-ын Алс Дорнодын бүс нутгаас анх удаа нүүрсийг задгай (open top) чингэлэгтэй төмөр замаар тээвэрлэж хуурай газрын Гродеково–Суйфэньхэ боомтоор Хятад руу экспортолж эхэлжээ.

Нүүрсийг чингэлгээр тээвэрлэхэд хоёр улсын төмөр замын ялгаатай (Орос өргөн цариг буюу 1520мм, Хятад нарийн цариг буюу 1435мм)царигт шилжүүлэн ачих хугацааг богиносгож, нүүрсний тоосжилтыг бууруулж буйгаараа давуу талтайг Хятадын www.sxcoal.com мэдээндээ онцолсон байна.

Хятадын зах зээлд нүүрсний экспортоо нэмэгдүүлэх зорилгоор Орос улс өнгөрсөн нэгдүгээр сарын 20-ноос Забайкалийн бүс нутгаас нүүрсийг 20 тонн чингэлгээр төмөр замаар тээвэрлэн экспортолж эхэлсэн юм. Одоо Алс Дорнодын бүс нутгаас нүүрсийг чингэлгээр экспортолж буй бөгөөд цаашид ийм хувилбараар бусад боомтууд руу тээвэрлэхээр төлөвлөжээ.

Оросын Эрчим хүчний яамны мэдээллээр, дөрөвдүгээр сард тус улс 17.96 сая тонн нүүрс экспортолсон байна. Энэ нь өмнөх сарныхаас 4.14%, өнгөрсөн оны мөн үеийнхээс 4.48%-иар тус тус өсчээ. Сүүлийн найман сарын хамгийн дээд үзүүлэлтээр тооцогдож буй аж.

Оны эхний дөрвөн сарын байдлаар, нийт 65.62 сая тонн нүүрс экспортолж өнгөрсөн оны мөн үетэй харьцуулахад 17.57%-иар нэмэгджээ. Тус улсын нүүрсний нийт экспортын 14 орчим хувийг коксжих нүүрс бүрдүүлж байна. Эхний улиралд нийт 6.87 сая тонн коксжих нүүрс экспортолсон аж. 

Харьцуулбал, Монгол Улс эхний улиралд нийт 6.67 сая тонн нүүрс экспортолсон байна. Зөвхөн гуравдугаар сард Орос 3.24 сая тонн, манай улс 2.14 сая тонн нүүрс Хятадын зах зээлд нийлүүлжээ.       

Э.Од