Газрын тосны бүтээгдэхүүнийг Баянхошуу-Өвдөгийн хилийн боомтоор нэвтрүүлнэ

Монгол, Хятадын хилийн Баянхошуу-Өвдөг боомтыг байнгын ажиллагаанд шилжүүлж, урд хөршид боловсруулах газрын тосыг уг боомтоор экспортлох тогтоолыг Засгийн газрын хуралдаанаар саяхан  баталсан.  

Дорнод аймгийн Халхгол, Матад сумдын нутагт орших Тосон-Уул XIX, Тамсаг-XXI талбайгаас олборлож буй түүхий тосыг Сүхбаатар аймгийн Эрдэнэцагаан сум дахь Бичигтийн боомтоор экспортолж, БНХАУ-ын Эрээний орд газрын Рашаантын түүхий тос хүлээн авах байгууламжид автомашинаар тээвэрлэн хүргэж, цааш шугам хоолойгоор Хөх хотын газрын тос боловсруулах үйлдвэрт нийлүүлдэг юм.

Энэхүү  шат дамжлагыг цөөлж, Тосон-Уул XIX, Тамсаг-XXI талбайгаас олборлож буй түүхий тосны талыг Баянхошуу-Өвдөгийн хилийн боомтоор экспортолбол тээврийн эргэлт хурдсана хэмээн Уул уурхайн яамныхан мэдэгдэж байна.

Тосон-Уул XIX талбайгаас Монгол, Хятадын хилийн Баянхошуу боомтын чиглэлд 210,7 км хатуу хучилттай автозам барихаар тогтжээ. Ингэснээр тээвэрлэлт хугацаандаа хийгдэх боломж бүрдэхээс гадна тоосжилт буурах, олон салаа зам гарах зэрэг байгаль орчинд халтай асуудлууд шийдэгдэх юм байна. Харин урд хөршид боловсруулсан газрын тосны бүтээгдэхүүнээ эргүүлэн импортлохдоо улсын зүүн, баруун бүсийн хилийн боомтуудаар нэвтрүүлэх нөхцөл бүрдүүлэхээр шийдвэрлэсэн байна.

Дашрамд дурьдахад, Монгол улс газрын тос боловсруулах үйлдвэрийг 2016 оны эхний хагас жилд ашиглалтад оруулах төлөвлөгөөтэй ажиллан, бэлтгэл ажлуудаа зохих хуваарийн дагуу хэрэгжүүлж буйг ч мөн холбогдох албаны хүмүүс мэдэгдлээ.

Г.Идэр