Azzuro Resources компани Монгол дахь төслүүдийнхээ үр дүн болон санхүүгийн тайлангаа тайлагнав

О.Дөлгөөн

Австралийн хөрөнгийн биржид бүртгэлтэй Azzuro Resources PLC хагас жилийн санхүүгийн тайлангаа танилцуулав. 

Тайлангийн онцлох үйл явдал нь 2026 оны дөрөвдүгээр сард худалдан авсан "Ред Хилл" буюу Майхан Уул зэс-алтны төслийн амжилт байв. Уг төсөлд нийт 1,883.9 метр урттай 15 цооног өрөмдсөнөөр баруун, зүүн болон гүн рүүгээ нээлттэй хэвээр байгаа 550 орчим метр үргэлжлэх талбайд өндөр агуулга бүхий зэс-алтны томоохон систем байгааг баталгаажуулсан.

Мөн гадаргууд ойр 600 метр урттай коридорт алтны эрдэсжилтийн шинэ бүсийг тодорхойлсноос гадна 3D хүндийн хүчний судалгаагаар гүнд орших өндөр нягтралтай том биетийг илрүүлээд байна. 

Түүнчлэн "Ямбат Овал" төсөлд 6,729 метр өрөмдлөгийн ажил хийж, эрдэсжилтийн үргэлжлэх уртыг 880 метр хүртэл нэмэгдүүлснээр эдгээр хоёр төсөлд анхны JORC хайгуулын зорилтот нөөцийг 21 саяас 55 сая тонн хэмээн тодорхойлсон байна. Хоёр төсөл нь дундын дэд бүтэц, металлургийн үйлдвэр болон логистикийг хамтран ашиглах боломжтой тул ирээдүйд зардлыг ихээхэн хэмнэх стратегийн давуу талтай.

Санхүүгийн үзүүлэлтийн хувьд Azzuro Resources PLC нь 2026 оны эхний хагаст 1,055,237 австрали долларын цэвэр алдагдалтай ажилласан нь өмнөх оны мөн үеийн 1,022,635 австрали долларын алдагдалтай ойролцоо түвшинд байна. 

Тайлант хугацааны эцэст компани 2.85 сая австрали долларын бэлэн мөнгөний үлдэгдэлтэй, цэвэр эргэлтийн капитал нь 2.73 сая австрали доллар байгаа бөгөөд капиталжуулсан хайгуул, үнэлгээний хөрөнгө оруулалт нь 11.13 сая австрали долларт хүрсэн байна. Компанийн ТУЗ-өөс одоогийн санхүүгийн чадавхийг ойрын 12 сараас дээш хугацаанд үйл ажиллагаагаа хэвийн үргэлжлүүлэхэд бүрэн хангалттай гэж дүгнэжээ. Нийт 820,666,895 ширхэг энгийн хувьцаатай тус компанийн хувьцаанд суурилсан төлбөрийн нөөц 1,473,683 австрали долларт хүрсэн бөгөөд Австралийн хөрөнгийн бирж дээрх хувьцааны арилжааны эскроу хугацаа дууссантай холбогдуулан 32,303 австрали долларын хураамж төлсөн байна.

Компани нь цаашид 100 хувь эзэмшдэг Хөх Таг графит болон Цагаан Дэрс литийн төслүүдийнхээ үнэ цэнийг өсгөх хувилбаруудыг зөвлөхүүдтэй хамтран боловсруулж байна. Ойрын хугацааны буюу 2026 оныг дуусталх гол зорилго нь "Ред Хилл" болон "Овал" төслүүд дээр JORC 2012 стандартын дагуу Ашигт малтмалын анхны албан ёсны нөөцийг тогтоож, тэдгээрийн арилжааны болон эдийн засгийн ач холбогдлыг эцэслэн үнэлэхэд чиглэж байна.