"Цэцэнс Майнинг энд Энержи" компани 300 сая ам.долларын бонд гаргажээ

"Цэцэнс Майнинг энд Энержи" (TME) ХХК нь энэ оны эхээр (2026.01.29) 300 сая ам.долларын бондыг олон улсын зах зээлд амжилттай гаргаж, Монголын хувийн хэвшлийн санхүүжилтийн түүхэнд шинэ хуудас нээлээ.

Энэхүү 11.375 хувийн хүүтэй, 2031 онд хугацаа нь дуусах бондыг Сингапурын хөрөнгийн биржид (SGX) бүртгүүлсэн байна. Монголын компаниудын хувьд гадаадын зах зээлээс хөрөнгө татах нь ихэвчлэн төрийн өмчит байгууллагууд эсвэл банкуудын хүрээнд хязгаарлагдаж ирсэн бол, энэ удаагийн хэлэлцээ нь хувийн хэвшлийн төслийн санхүүжилтийн чадамжийг нотолсон чухал үйл явдал боллоо.

Бондын үндсэн зориулалт нь Төв аймгийн нутагт байрлах 600 МВт-ын хүчин чадалтай Бөөрөлжүүтийн дулааны цахилгаан станцын бүтээн байгуулалт болон үйл ажиллагааг санхүүжүүлэхэд чиглэж байна. Тус төсөл нь үндэсний эрчим хүчний системийн ачааллыг нуруундаа үүрч, Монгол Улсын нийт цахилгаан эрчим хүчний хэрэгцээний 20 орчим хувийг, Улаанбаатар хотын иргэдийн хэрэглээний 35 гаруй хувийг хангах стратегийн ач холбогдолтой төсөл юм.

Төслийн тогтвортой байдлыг хангахын тулд "Цэцэнс Майнинг энд Энержи" нь нүүрсний уурхайгаа өөрийн эзэмшилд байлгаж, босоо интеграцчилсан загвараар ажиллаж байна. Нүүрсний уурхай нь 30 гаруй жилийн нөөцтэй тул түлшний хангамж найдвартай байхын зэрэгцээ, эрчим хүч худалдан авах гэрээний тарифыг ам.доллараар тогтоосон нь валютын ханшийн эрсдэлийг үр дүнтэй хааж өгчээ. Түүнчлэн, "Бодь Интернэшнл" ХХК-ийн өгсөн эргүүлэн татах боломжгүй баталгаа нь хөрөнгө оруулагчдын итгэлийг бэхжүүлж байгаа юм.

Хэдийгээр макро эдийн засгийн сорилтууд байсаар байгаа ч, төслийн бүтэц тодорхой, эрсдэлээ сайн удирдсан тохиолдолд Монголын компаниуд олон улсын зах зээлд өрсөлдөх чадвартай болохыг уг үйл явдал харууллаа. 

Эх сурвалж: Capitalmarkets