Украины дайн эхэлснээс хойш Энэтхэг улс Оросоос 168 тэрбум долларын газрын тос импортолжээ

Ч.Сансар

Энэтхэг улс 2022 оны 2-р сард дайн эхэлснээс хойш Оросоос 168 тэрбум ам.долларын түүхий нефть импортолсон гэж Финландад төвтэй Эрчим хүч, цэвэр агаарын судалгааны төв (CREA) мэдээллээ.

Оросын газрын тосны хамгийн том худалдан авагч нь Хятад бөгөөд хоёрт Энэтхэг улс ордог.

Оросын байгалийн хий, дамжуулах хоолойн газрын тосонд барууны орнууд хориг тавиагүй учир ОХУ Хятад, Энэтхэг, Европын Холбоонд шатахуун, түлшээ худалдаж,  асар их орлого олсоор байна.

"2026 оны 1-р сарын байдлаар Орос улс Украины дайн эхэлснээс хойш чулуужсан түлшний борлуулалтаас 1 их наяд евро олсон" гэж CREA энэ долоо хоногт мэдэгдэв.

Дэлхийн гурав дахь том түүхий газрын тос импортлогч Энэтхэг улс дайн эхэлснээс хойш Оросоос хямд түүхий нефтийн импортыг огцом нэмэгдүүлжээ. Үүний үр дүнд Орос улс Энэтхэгийн нефть импортын гуравны нэгийг эзэлж, хамгийн том нийлүүлэгч болж чадсан байна.

Гэсэн хэдий ч Энэтхэгийн нефть боловсруулах үйлдвэрүүд саяхан Оросын Роснефть, Лукойл зэрэг аварга компаниудад АНУ хориг арга хэмжээ тавьсаны дараа Оросоос газрын тосны худалдан авалтаа бууруулсан. Энэтхэг улс мөн АНУ-тай худалдааны хэлэлцээр байгуулах гэж байгаа бөгөөд Трампын засаг захиргааг Оросын нефтийн импортыг бууруулсан гэдэгт итгүүлэхийн төлөө ажиллаж байна гэсэн мэдээ байна.

АНУ-ын Ерөнхийлөгч Дональд Трамп Оросын газрын тосыг их хэмжээгээр худалдан авч, Кремлийн ашиг орлогыг нэмэгдүүлж байна гэсэн шалтгаанаар Энэтхэгийг шийтгэхийг зорьсон бөгөөд 2025 оны 8-р сараас эхлэн Энэтхэгт ногдуулсан тарифыг 25%-аас 50% хүртэл хоёр дахин нэмэгдүүлсэн.

Эхэндээ Энэтхэг улс тарифын талаар нэг их санаа зовоогүй юм шиг байсан. Гэвч сүүлийн хоёр сарын хугацаанд АНУ Роснефть, Лукойл компаниудад хориг тавьсны дараа Энэтхэгийн үйлдвэрүүд Оросын газрын тос худалдан авахаа багасгасан.

Эх сурвалж: oilprice.com