“Газпром” компани Монгол Улстай эрчим хүчний салбарт хамтын ажиллагааны санамж бичиг байгууллаа

Ч.Сансар

Оросын “Газпром” компани болон Монгол Улсын Засгийн газар газрын тос, байгалийн хийн салбарт хамтран ажиллах санамж бичигт гарын үсэг зурлаа гэж “Газпром” Мягмар гарагт мэдэгдлээ. “Газпром” Нийтийн хувьцаат нийгэмлэгийн Удирдах зөвлөлийн дарга Алексей Миллер Монголд айлчилж, Монгол Улсын Ерөнхийлөгч У.Хүрэлсүх, Ерөнхий сайд Г.Занданшатар, Шадар сайд С.Амарсайхан нартай Улаанбаатар хотноо уулзсан байна. Энэхүү санамж бичигт байгалийн хийн салбарт хамтарсан төслүүдийг урагшлуулах, урт хугацааны хамтын ажиллагааг хөгжүүлэх төлөвлөгөөг тусгажээ.

Уулзалтын үеэр бүс нутгийн эрчим хүчний транзит коридорт Монгол Улсын эзлэх байр суурь болон ОХУ-аас БНХАУ руу Монголын нутгаар хий дамжуулах “Сибирийн хүч-2” төслийн талаар ярилцжээ. Монголын нутаг дэвсгэрт тавигдах хоолойн байгаль орчны үнэлгээ дуусаж байгаа. Төслийн хүрээнд Баруун Сибириэс Хятад руу жилд 50 орчим тэрбум шоо метр хий нийлүүлнэ, харин уг төслийн хэрэгжилт нь “Газпром” болон Хятадын CNPC компанийн хооронд хий нийлүүлэх гэрээ байгуулагдахаас хамаарч байгаа юм байна.

Транзитаас гадна Монгол Улсын дотоодын хийн салбарыг хөгжүүлэх төлөвлөгөө уг санамж бичгийн заалтуудтай уялдаж байгаа юм. Мелентьевын нэрэмжит Эрчим хүчний системийн хүрээлэнгийн хийсэн судалгаагаар 2040 он гэхэд Монгол Улсын байгалийн хийн хэрэглээ жилд 5.6 тэрбум шоо метрт хүрнэ гэж мэдээлжээ. Тиймээс Монгол Улсад байгалийн хийн дэд бүтцээ хөгжүүлэх, найдвартай нийлүүлэлттэй болох шаардлага тулгарч байна.

Ерөнхийдөө энэхүү хэлэлцээр нь Москва, Улаанбаатар хоёрын эрчим хүчний харилцаа улам бэхжиж, Орос-Хятадын байгалийн хийн коридорт Монгол Улс чухал үүрэг гүйцэтгэж болохыг харуулж байна.

Эх сурвалж: oilprice.com