Хамас бүлэглэл Израиль руу дайрсны дараа тус улсын өмнөд хэсэгт орших Тамарын хийн ордны оператор компани Chevron Израилийн Эрчим хүчний яамны зааврын дагуу тус талбай дахь олборлолтоо зогсоолоо.   Chevron Mediterranean Limited компани нь Тамар ордыг ашигладаг бөгөөд тус ордын 25%-ийг эзэмшдэг. Үүнээс гадна Тамарт дараах компаниуд хувь эзэмшдэг: Isramco (28.75%), Tamar Petroleum (16.75%), Mubadala Energy (11%), Tamar Investment 2 (11%), Dor Gas (4%), болон Everest (3.5%).

"Тамар ордын зургаан цооногоос өдөрт 7.1-8.5 сая куб метр байгалийн хий олборлодог. Байгалийн хийн боловсруулалтын ихэнх нь Ашкелон хотоос баруун зүгт 24 километрийн зайд орших Тамар платформ дээр явагддаг. Тамарын хий Израилийн эрчим хүчний үйлдвэрлэлийн 70%-ийг хангадаг" гэж Chevron хэллээ.

Chevron нь Noble Energy-г худалдаж авсны дараа Израилийн далайн Leviathan хийн ордыг сонирхож байгаа. Энэ нь Израилийн хамгийн том эрчим хүчний төсөл юм. Хамас Израиль руу дайрсны дараа Тамарын үйл ажиллагааг зогсоосон ч Leviathan талбай хэвийн ажиллаж байна гэж Chevron мэдэгдэв.

Тамарын ордыг хаасны дараа Израиль эрчим хүчний хэрэгцээгээ хангах өөр эх үүсвэр хайх болно гэж Израилийн эрчим хүчний яам мэдэгдэв.

Өнгөрсөн долоо хоногт болсон гэнэтийн дайралтын дараа Израиль Хамас бүлэглэлийн эсрэг дайн зарлаж, Газын зурваст хариу цохилт өгч, Палестины газар нутагт эрчим хүч нийлүүлэхээ зогсоосон юм. Хамас Израиль хоорондын дайны улмаас Азийн бирж дээр газрын тосны үнэ 4 доллараар өслөө.