Хятад 2023 оны эхний хагаст Оросын түүхий нефтийг хамгийн их хэмжээгээр худалдан авчээ

Ч.Сансар

Эдийн засгийн хүндрэлтэй тулгарч байгаа ч Хятад улс Оросын түүхий нефтийг маш их хэмжээгээр худалдан авч, нөөцөө нэмэгдүүлж байна.

2023 оны эхний хагаст хятадууд өдөрт дунджаар 2.13 сая баррель түүхий нефтийг ОХУ-аас импортолж, улмаар Орос Хятадын хамгийн том нефтийн нийлүүлэгч болсон гэж Financial Times (FT) Хятадын гаалийн мэдээлэлд үндэслэн мэдээлжээ.

Өмнө нь Саудын Араб Хятадын хамгийн том нийлүүлэгч байсан бөгөөд FT-ийн тооцоолсноор Саудын Араб энэ жилийн 1 дүгээр сараас 6 дугаар сарын хооронд өдөрт дунджаар 1.88 сая баррель нефть Хятадад борлуулж байсан байна.

Энэ оны 6 дугаар сард Хятад улсад импортлогдсон Оросын нефть 5 сард тогтоосон дээд амжилтаа дахин эвдлээ. Хятадын гаалийн мэдээлснээр, өнгөрсөн сард Оросоос Хятад руу өдөрт дунджаар 2.56 сая баррель нефть орж ирсэн нь 2022 оны мөн үетэй харьцуулахад 44%-иар өссөн байна. 5 дугаар сард өдөрт 2.29 сая баррель нефть Оросоос импортолж байсан.

Саудын Арабаас импортолсон нефтийн хэмжээ өнгөрсөн оны 5, 6 дугаар сартай харьцуулахад өсч, 2023 оны 6 дугаар сард 1.93 сая баррельд хүрсэн. Гэсэн хэдий ч энэ хэмжээ ОХУ-аас импортолсон түүхий нефтийн хэмжээнээс хамаагүй бага байсан.

Хятадын нийт нефтийн импорт ч мөн нэмэгдэж, өнгөрсөн 6 дугаар сард 45.3%-иар өслөө. Дотоодын эрэлт бага байгаа ч Хятадын нефть боловсруулах үйлдвэрүүд нөөцөө нэмэгдүүлсээр л байна. 6 дугаар сард нефтийн импорт өдөрт 12.67 сая баррель болсон нь Ковид-19 цар тахалтай байсан жилүүдтэй харьцуулахад огцом өссөн үзүүлэлт юм.

Эх сурвалж: Oilprice.com