Хятадын импортын өсөлтөөр зэсийн ханш сэргэж эхлэв

2020-04-15 18:04

Өнгөрсөн гуравдугаар сарын байдлаар Хятадын зэсийн импорт өмнөх оны мөн үеийнхээс 13%-иар өсч 442 мянган тоннд хүрсэн тухай тус улсын Гаалийн ерөнхий газар мэдээлжээ. Энэхүү мэдээлэл цацагдсанаар өчигдөр (2020.04.14)Лондоны металын бирж дээр зэсийн ханш ганц өдрийн дотор 3.2%-иар өсч 5150 ам.доллар/тонн-ын түвшинд хүрч хаагдлаа. Ингэснээр зэсийн ханш сүүлийн нэг сарын хугацаан дахь хамгийн өндөр түвшинд хүрэв.

Оны эхний улирлын байдлаар Хятадын цэвэр зэсийн импорт 1.29 сая тоннд хүрсэн нь өмнөх оны мөн үетэй харьцуулахад 9.1%-иар өсчээ. Дэлхийн зэсийн эрэлтийн тал хувийг дангаараа бүрдүүлдэг томоохон хэрэглэгчийн хувьд Хятадын импорт өсч буй нь зах зээлд эерэг мэдээлэл болж байна. Тус улсын аж үйлдвэрийн эрчмийн үзүүлэлт PMI өнгөрсөн гуравдугаар сард 52%-тай гарсан нь өмнөх хоёрдугаар сарын 35.7%-ийн үзүүлэлтээс хавьгүй өссөн дүн юм. Энэ нь Хятадын эдийн засаг мэдэгдэхүйц сэргэж эхэлснийг харуулж байна. Гэхдээ ганцхан сарын дүнгээр Хятадын эдийн засаг хэвийн түвшинд хүрсэн гэж дүгнэх боломжгүй бөгөөд ирэх саруудын дүнг ажиглах хэрэгтэйг тус улсын холбогдох албаныхан тайлбарлажээ. 

Хятадын зэсийн баяжмалын импорт өнгөрсөн гуравдугаар сард 1.78 сая тоннд хүрч, өмнөх оны есдүгээр сараас хойших хамгийн бага түвшинд хүрч буурсан байна. Гэхдээ энэ нь өнгөрсөн оны мөн үетэй харьцуулахад ялимгүй өсөлттэй үзүүлэлт юм. Энэ оны эхний улирлын байдлаар зэсийн баяжмалын импорт 5.55 сая тоннд хүрсэн нь харин бага зэрэг буурсан түвшин болж байна.

Өнгөрсөн онд Хятад улс нийт 22 сая тонн зэсийн баяжмал импортолсон нь 2018 оны дүнгээс 11.6%-иар өсчээ. Ийнхүү өссөн нь тус улсын зэс хайлуулах үйлдвэрийн хүчин чадал нэмэгдэж буйг харуулж байгаа хэрэг.

Argonaut Securities судалгааны байгууллагын шинжээч Helen Lau-гийн тайлбарласнаар, 2020 онд зэсийн баяжмалын нийлүүлэлт сааталд орж болзошгүй ажээ. Үүнд нөлөөлөх гол хүчин зүйл нь коронавирусын тархалтыг зогсоох үүднээс Өмнөд Америк тив дэх томоохон уурхайнуудын үйл ажиллагааг түр хааж буй явдал юм. Иймд ирэх тавдугаар сараас эхлэн зэсийн баяжмалын импорт буурах магадлалтай. Өмнөд Америкийн хувьд Чили, Перу зэрэг зэсийн хамгийн том үйлдвэрлэгч орнууд оршдог тив. Тэгвэл тус хоёр улсад коронавирусын дэгдэлт харьцангуй өндөр байгаа нь уурхайнуудын үйл ажиллагаа тасалдах, зогсох нөхцөл байдалд хүргээд байгаа юм.

Зэсийн зах зээл нь дэлхийн эдийн засгийн нөхцөл байдлаас шууд шалтгаалдаг. Өчигдөр (2020.04.14) Олон улсын валютын сангаас танилцуулсан “Дэлхийн эдийн засгийн төлөв байдал” тайланд энэ онд дэлхийн эдийн засаг 3%-иар буурах таамаг дэвшүүлсэн байна. Гэхдээ энэ нь суурь таамаглалын түвшин бөгөөд хамгийн муу хувилбараар тооцвол эдийн засгийн өсөлт 3%-иар нэмж буурч болзошгүй ажээ. Эдийн засгийн энэ удаагийн хүндрэл нь 2009 оны дэлхийн санхүүгийн хямралаас хавьгүй илүү ноцтой гэдгийг тус тайланд тодотгожээ. Эрүүл мэндийн салбарын хямрал, санхүүгийн хүндрэл, түүхий эдийн ханшийн бууралт зэргээр хямрал илрэхийг онцолсон байна.

Хэрэвзээ оны хоёрдугаар хагаст коронавирусын тархалт зогсож, улс орнуудын Засгийн газруудын эдийн засгийг идэвхжүүлэх арга хэмжээ үр дүнгээ өгч эхэлбэл 2021 онд дэлхийн эдийн засгийн өсөлт 5.8%-д хүрэх боломжтой гэж тус байгууллага тооцоолжээ.

Б.Төгс

 

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • 16 цаг 10 минутын өмнө
    Монголбанкны алт худалдан авалт 2019 онд 15.2 тонн болж буурсан ч  он гарсаар есдүгээр сарын 22-ны байдлаар 15 тоннд хүрээд байна. Энэ онд алт худалдан авалт 2018 оны хэмжээнд хүрэх эсвэл давах хүлээлттэй байгаа юм. Өнгөрсөн 2018 онд төв банкны алт худалдан авалт 22 тонн хүрч дээд амжилт тогтоосон. Харин нүүрсний экспорт долдугаар сараас эхлэн өсч цаашид тогтворжих хандлагатай байна. Монголын эдийн засаг оны эхний хагаст маш хүнд байдлыг даван туулсан бол долдугаар сараас эхлэн эерэг өөрчлөлтүүд ажиглагдаж эхэлсэн байна. Энэ тухай Монголбанк (2020.09.23) “Ханшийн тогтвортой байдал” сэдэвт уулзалтын үеэр мэдээллээ. Америк долларын ханш долдугаар сард 20.81 төгрөгөөр чангарсан нь сарын дүнгээр энэ оны хамгийн их өсөлт болсон ч төгрөгийн ам.доллартай харьцах ханш найм, есдүгээр сараас харьцангуй тогтворжиж эхэллээ. Монголбанкнаас зарласан ханшаар нэг ам.доллар (2020.09.22-нд) 2,854 төгрөгтэй тэнцэж байна.
  • 19 цаг 3 минутын өмнө
    Засгийн газрын ээлжит хуралдаанаар Тавантолгой-Гашуунсухайт чиглэлийн төмөр замыг Тавантолгой-Зүүнбаян чиглэлтэй холбох 22 км төмөр замын суурь бүтцийн барилгын ажлын зөвшөөрлийг “Тавантолгой төмөр зам” компанид олгохоор шийдвэрлэв. Инженерийн нарийвчилсан зураг төсөл, байгаль орчны нөлөөллийн үнэлгээ хийлгэж, ажлаа энэ онд багтаан эхлүүлэхийг холбогдох сайд нарт даалгалаа. Шаардагдах хөрөнгийг зураг төслийн магадлал хийсэн дүнгээр “Эрдэнэс Тавантолгой” компани санхүүжүүлэх юм. Дээрх хоёр чиглэлийг холбосноор төмөр замын гол магистраль шугамтай шууд холбогдоно. Үүний зэрэгцээ Тавантолгойн нүүрсний бүлэг орд, Цагаан суварга, Адуунчулуун, Чандгана, Талбулаг, Хөөт зэрэг зэс, нүүрс, вольфрам, цайр, жоншны ордыг ашигласнаар экспортод гаргах бүтээгдэхүүний хэмжээ жилд дунджаар 50 орчим сая тонн болж, төмөр замаар тээвэрлэх ачаа 3.5 дахин нэмэгдэнэ гэж тооцоолж байна.
  • Өчигдөр 10 цаг 24 минутад
    Монголын нутгаар дайруулан байгуулахаар “Сибирийн хүч 2” хоолойн төслийн яриа хэлэлцээр хоёр улсын Засгийн газрын түвшинд өрнөж байна. 2019 онд Монгол Улсын Ерөнхий сайд Москвад хийсэн айлчлалаар Засгийн газар Оросын “Газпром” компанитай харилцан ойлголцлын санамж бичиг үзэглэж байсан бол үүнээс хойш талуудын төлөөлөл багтсан Ажлын хэсэг гарч, төслийн ТЭЗҮ-ийг боловсруулах Монгол, Оросын хамтарсан компанийг байгуулав. Дараагийн шатанд “Эрдэнэс Монгол” болон “Газпром” компани хооронд нууцлалын гэрээ байгуулж, харилцан мэдээлэл солилцох, холбогдох бичиг баримтаа бүрдүүлэн ажиллана гэдгийг Монголын төрийн өмчит компанийн Гүйцэтгэх захирал П.Ганхүү (2020.09.02) мэдэгдлээ.
  • 2020-09-21 11:03
    Заамарын хөндийд үйл ажиллагаа явуулж байгаа Тосонгийн үйлдвэрийн нөхөн сэргээлт Монголдоо жишиг гэдэгтэй маргах хүн гарахгүй биз ээ. Хүний гараар бүтээгдсэн анхны цэнгэг устай хиймэл нуурыг 16 га талбайд байгуулж, 5.5 км урттай дөрвөн тусдаа ойн төгөл энд бий болжээ. Тосон Заамар шороон Заамар боллоо хэмээн яригддаг байсан үе бий. Тэгвэл “Ногоон Заамар” болох цаг айсуй гэдгийг Тосонгийн уурхайн нөхөн сэргээлтээс бэлхнээ харж болно. Уурхайн үйлдвэрлэлийн хамгийн том үр дүн нь  нөхөн сэргээлт.  Тиймдээ ч “Монполимет” групп нөхөн сэргээлтийг  олон улсын жишиг стандартын дагуу бодит утгаар нь хийж буйг газар дээр нь очиж танилцсан хүмүүс  үнэлдэг.  Энэ удаагийн зочид нь “Вагнер Ази”-ийхан байлаа. Учир нь, “Монполимет”, “Вагнер Ази” компанийн хамтын ажиллагааны  20 жилийн ой тохиож байна.
  • 2020-09-18 17:13
    “Дэлхийн эдийн засгийн чуулган”-аас (World Economic Forum /WEF/) Бүгд Найрамдах Ардчилсан Конго улс дахь кобальтын олборлолтод хөдөлмөрийн нөхцөл, хүний эрхийг сайжруулах шаардлагатай тухай “Уул уурхайг аюулгүй, шударга болгох нь: БНАКонго дахь гар аргаар кобальт олборлолт” тайлан гаргажээ. Кобальт нь цахилгаан машин болон ухаалаг гар утас, зөөврийн компьютерын зай хураагуурын үйлдвэрлэлд үндсэн чухал түүхий эд болдог. Энэхүү тайланд дурдсанаар дэлхийн кобальтын хэрэглээ 2030 он гэхэд одоогийнхоос 4 дахин нэмэгдэх хандлагатай ажээ. Одоогийн байдлаар дэлхийн нийт кобальтийн нийлүүлэлтийн 70% нь БНАКонго улсад ногдож байна. Харин тус улсын нийт олборлолтын 30 хүртэлх хувь нь бичил уурхайгаас эх үүсвэртэй юм. Гэвч Конго дахь кобальтын бичил уурхайнуудад хөдөлмөрийн аюулгүй байдал, хөдөлмөрийн шударга үнэлэмж орхигдох байдал түгээмэл байна. Ийм нөхцөлд дэлхийн кобальтийн нийлүүлэлтийн сүлжээнд олборлолтыг хариуцлагатай болгоход бэрхшээл учрах нь гарцаагүй юм.