ЗГ: Тавантолгойн станцын санхүүжилтийг төр хариуцаж, 450МВт-ын хүчин чадалтай байхаар тогтов

2020-04-08 14:03

Өнөөдрийн Засгийн газрын хуралдаанаар (2020.04.08) Тавантолгойн цахилгаан станцыг (ТТЦС) барьж байгуулахтай холбоотой чухал шийдвэр гаргасан тухай Эрчим хүчний сайд Ц. Даваасүрэн мэдэгдлээ.

Уг шийдвэрээр Тавантолгойн цахилгаан станцыг төрийн санхүүжилтээр буюу Оюутолгой төслийн өргөтгөл шатны санхүүжилтэд станцын зардлыг оруулахгүй байхаар тогтлоо. Түүнчлэн станцын нийт хүчин чадлыг 300МВт бус 450МВт байхаар тогтсон байна. Станцыг 2024 онд ашиглалтад оруулахаар тооцож буй аж. Уг төслийн хөрөнгө оруулалтын зардал 600 сая ам.доллар байх төлөвтэйг салбарын сайд мэдэгдлээ.

Тэрбээр “ТТЦС барих талаар 2018 онд “Оюутолгой” компанитай гэрээ байгуулж байсан. Энэ хугацаанд хоёр тал уг чиглэлээр нэлээд сайн ажилласан. Компани ТТЦСтанцын төсөл нь 1.1 тэрбум ам.долларын өртөгтэй байхаар санал ирүүлсэн. Энэ бол дэлхийн зах зээлд цахилгаан станц байгуулах зардалтай жишихэд харьцангуй өндөр. Өнөөдөр станц байгуулах зардал нэг МВт тутамд нэг сая евро байдаг. Компаниас ирүүлсэн 300МВт-ын станцын хувьд авч үзвэл нийт өртөг дэлхийн зах зээлийнхээс 2-3 дахин өндөр байсан. Энэ нь эргээд Засгийн газрын Оюутолгой төсөл дэх эзэмшлийн 34% дээр нэмэлт өр болж тусгагдаж, улмаар ногдол ашиг хүртэх хугацаа хойшлох нөхцөл байдал үүссэн. Иймд Засгийн газар уг саналыг хүлээж авах боломжгүй болсон. Ингээд өнөөдрийн Засгийн газрын хуралдаанаар ойрын дөрвөн жилийн хугацаанд багтааж 2024 онд ашиглалтад оруулах 450МВт-ын цахилгаан станцыг төрийн санхүүжилтээр барихаар шийдвэрлэлээ. Энэ бол төрийн өмчит компани байх болно. Санхүүжилтэд зээл болон бусад арга хэрэгслийг ашиглана. Энэ станцын ТЭЗҮ-ийг өмнө нь боловсруулсан юм билээ. М.Энхсайхан Засгийн газрын сайд байх үедээ олон улсын зөвлөх компаниудаар Тавантолгойн төсөлд судалгаа хийхэд 17 сая ам.доллар зарцуулсан юм билээ. Энэ хүрээнд станцын ТЭЗҮ-ийг боловсруулсан. Энэ ТЭЗҮ нь Эрчим хүчний яаманд бий. Үүнд түшиглээд Тавантолгойн станцыг барьж байгуулна. Уг тооцооллоор авч үзэхэд шугам сүлжээ, устай холбоотой зардлыг оруулаад станц барих нийт өртөг 560-600 сая ам.доллар болно. Энэ нь “Оюутолгой” компанийн ирүүлсэн саналаас 30%-иар хямд, мөн цахилгаан эрчим хүчний өртөг нь 50% хямд байх төлөв харагдаж байна.

Станц ашиглалтад орсноос хойш 5 жилийн дотор хөрөнгө оруулалтаа нөхнө. Оюутолгой төслийн Хөрөнгө оруулалтын гэрээний 7.3-т дөрвөн жилийн дотор дотоодоос эрчим хүчээ авах ёстой гэж заасан. Хоёр жилийн өмнө байгуулсан гэрээнд ч мөн ийм заалт бий. 2019 онд Оюутолгой нь Монгол Улсаас эрчим хүчээ авах ёстой байсан ч биелээгүй.

Бид 330КВт-ын шугам татаж өгсөн. 220КВт-ын дэд станцтай нь холбох гэсэн боловч одоо болтол холбоогүй байна. Бид шугамаа татсан, дэд бүтцээ бий болгосон юм. Тэгэхээр энэ станц ашиглалтад орохоор гол хэрэглэгч бол Оюутолгой байх ёстой.  Бид жил бүр 170-200 сая орчим ам.долларыг импортын эрчим хүчинд төлдөг. Станц ашиглалтад орсноор жилдээ 200 сая ам.доллар гадагш нь төлж байгааг хэмнэх боломж 2024 оноос хойш бүрдэх юм.

Энэ төлбөрөөр тооцоход маш богино хугацаанд станцын хөрөнгө оруулалтын зардлыг төлөх боломж байна гэж харж байна” гэв.

Тэрбээр мөн санхүүжилтийг “Эрдэнэс Тавантолгой” компанийн үйл ажиллагааны ашгаар шийдвэрлэх боломжтой гэж үзэж байгааг онцоллоо. Хэрэв энэ хувилбар өөрчлөгдөх тохиолдолд нэгэнт уг станц нь маш ашигтай төсөл учраас санхүүжилт босгох бүрэн боломжтойг тэрбээр тайлбарлалаа.

Тавантолгойн цахилгаан станцын төслийн ТЭЗҮ-ийг өнгөрсөн хоёрдугаар сард Засгийн газарт өргөн барьсан тухай “Туркойз Хилл Ресурс” компани мэдээлсэн. Уг өргөн барьсан ТЭЗҮ ёсоор станцын ашиглалтад оруулах хугацааг 2024 оны зургадугаар сар байхаар тусгасан байсан. Станцын хөрөнгө оруулалтын зардал нь 924 сая ам.доллар байх бөгөөд хүчин чадал нь 300МВт-аар хэмжигдэж байв. Уг төсөлд ус дамжуулах 55 км урттай хоолой болон цахилгаан дамжуулах 126 км шугамын дэд бүтэц багтсан байсан юм.

Засгийн газрын шийдвэрээр ийнхүү илүү том станцын төслийг илүү бага зардлаар байгуулах боломж харагдаж байна.

Б.Төгс

Сэтгэгдэл байхгүй байна

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • Өчигдөр 14 цаг 56 минутад
    Монгол Улс Санхүүгийн хориг арга хэмжээ авах байгууллага (ФАТФ)-ын мөнгө угаах, терроризмыг санхүүжүүлэхтэй тэмцэх стратегийн дутагдалтай орнуудын жагсаалтад 2019 оны аравдугаар сард орсноор нийт 4 шууд хэрэгжилтийн зөвлөмж дээр 6 үүрэг даалгавар авсан. Монгол Улсын Засгийн газраас байгуулагдсан ажлын хэсэг, Үндэсний зөвлөл, Хамтын ажиллагааны зөвлөлийн гишүүн байгууллагууд, хувийн хэвшил болон мэргэжлийн холбоодын хамтарсан ажлын хэсгүүд ФАТФ-ын стратегийн дутагдалтай орнуудын жагсаалтаас гарах чиглэлээр эрчимтэй ажиллаж, төлөвлөгөөнд тусгасан ажлуудтай холбоотой тайланг ФАТФ-ын Ази, Номхон Далай бүс хариуцсан хамтарсан бүлэгт цаг тухайд нь хүргүүлж ажиллалаа.
  • 2020-05-25 13:53
    Цар тахлын тархалтаас урьдчилан сэргийлэх үүднээс Засгийн газраас хөл хорио тогтоох арга хэмжээ авч хэрэгжүүлж байна. Өвчний тархалтаас сэргийлэх талаар амжилттай боловч хөл хорионы сөрөг нөлөөнөөс уул уурхайн салбарын үйлдвэрлэл, экспорт буурах, худалдааны салбарын идэвх сулрах, аялал жуулчлал, тээвэр, үйлчилгээний салбар орлогогүй болоход хүрч, улмаар бусад салбаруудад нөлөөлж байна. Энэ  гинжин холбоогоор банкны салбарт ч тодорхойгүй байдал, эрсдэл, сөрөг нөлөөг үзүүлж байгаа. Монголбанкны судалгаагаар коронавирусын нөлөөлөлд 54 мянган зээлдэгчийн 3.5 их наяд төгрөгийн зээл өртөж байгаа гэсэн тооцоо бий. Манай улсын хувьд санхүүгийн зах зээлийн 90 орчим хувийг банкны систем бүрдүүлдэг. Иргэд, аж ахуйн нэгж хямралд өртөн орлогогүй болж, зээлээ эргэн төлөхөд хүндрэл үүссэнээр банкуудын өөрийн хөрөнгө, ашигт ажиллагаа буурч, эрсдэлийн сангаа нэмэгдүүлэх шаардлагатай тулгарна.
  • 2020-05-25 13:52
    Монгол Улсын парламент  2019 оны арваннэгдүгээр сарын 14-ний пүрэв гарагийн хуралдаанаараа Үндсэн хуульдаа нэмэлт өөрчлөлт оруулсан. 1992 оны нэгдүгээр сарын 13-нд ардчилсан тодотголтой Үндсэн хуулиа баталснаас хойш 2000 онд анх удаа “гар хүрч”, “дордох”-ын хэмээгддэг 7 заалтад оруулсан нь цаг хугацааны эрхээр багагүй маргаан дагуулж ирсэн юм. Энэхүү 7 заалтаас зургаад нь нэмэлт, өөрчлөлт хийснээр Үндсэн хуулийн өнгө төрх багагүй сайжирсан юм. Хоёр удаа нийгмээрээ хэлэлцэж, гурав дахь удаагийн хэлэлцүүлгээ парламентын хуралдаанд гуравхан цагийн дотор хийсэн Үндсэн хуулийн нэмэлт өөрчлөлтийг өнөөдөр /2020 оны тавдугаар сарын 25/ 12.00 цагт буюу 17-р жарны төмөр хулгана жилийн зуны тэргүүн сарын шинийн 3-ны морин цагаас эхлэн улс орон даяар мөрдөж эхэлж байна.
  • 2020-05-25 13:00
    “Шивээ-Овоо” ХК-ийн Төлөөлөн удирдах зөвлөлийн ээлжит хурлыг тус уурхай дээр зохион байгуулж, үйл ажиллагаанд тулгамдаж буй асуудалтай танилцан, хэд хэдэн чиглэлээр үүрэг өглөө. Төлөөлөн удирдах зөвлөлийн дарга Э.Дөлгөөн уурхайн олборлолтын зардлыг бууруулах чиглэлээр тооцоо судалгаа хийж, танилцуулах, компанийн худалдан авалтын сонгон шалгаруулалтыг хуулийн хүрээнд нээлттэй зарлахыг компанийн удирдлагуудад чиглэл болгосон байна. Мөн 2020-2021 оны өвөлжилтийн бэлтгэл ажлыг хангах хүрээнд нарийвчилсан төлөвлөгөө боловсруулж, шаардлагатай арга хэмжээг ирэх саруудад авахаар болжээ. 
  • 2020-05-22 14:01
    Монгол улсын Засгийн газар, МҮХАҮТ хамтран Монгол Улсын ТОП-100 аж ахуйн нэгжийг эрэмбэлэн өргөмжлөх үйл ажиллагааг 19 дахь жилдээ анх удаа /тавдугаар сарын 20/ цахим хэлбэрээр зохион байгууллаа. Цахим арга хэмжээг нээж МҮХАҮТ-ын Ерөнхийлөгч О.Амартүвшин  “2020 он бол бид бүхний хувьд туйлын өндөр сорилттой жил болж байна. Монголын эдийн засгийг нуруун дээрээ үүрч, Монголын хөгжлийг  түүчээлж байгаа та бүхэнд ТОП 100 ААН-д эрэмбэлэгдсэнд МҮХАҮТ-ын зүгээс халуун баяр хүргэж, эдийн засгийн сорилыг төр засагтай хамтран хамтдаа даван туулъя” хэмээн уриалав. ТОП-100 аж ахуйг эрэмбэлэхдээ Сангийн яам, Гааль болон Татварын ерөнхий газар, НДЕГ, Улсын бүртгэл, Үндэсний статистикийн хороо болон МҮХАҮТ-ын төлөөллүүд хамтарсан Ажлын хэсгийн албан ёсны мэдээ, тайлан, тоон үзүүлэлтэд тулгуурлан ААН-ийн тухайн жилийн орлого, улсын төсөвт оруулсан татвар, нийгмийн даатгал төлсөн ажиллагсдын тоо, ашиг, хөрөнгийн  хэмжээ гэсэн үндсэн 5 үзүүлэлтийг чухалчилжээ.