Эрдсийн экспорт 5.5 тэрбум долларт хүрч, 7.2%-иар өсөв

2019-11-15 18:54

Үндэсний статистикийн хорооны мэдээллээр, энэ оны эхний арван сарын байдлаар манай улсын гадаад худалдааны нийт бараа эргэлт 11.6 тэрбум ам.долларт хүрч 7.1%-иар өсчээ. Үүнд экспорт 6.5 тэрбум ам.доллар, импорт 5.1 тэрбум ам.долларыг эзэлсэн нь өнгөрсөн оны мөн үеийнхтэй харьцуулахад экспорт 9.8%, импорт 3.9%-иар тус тус өслөө. Гадаад худалдааны тэнцэл 1.5 тэрбум ам.долларын ашигтай гарч өнгөрсөн оны мөн үеийнхээс 394.9 сая ам.доллараар нэмэгджээ.

2019 оны эхний гурван улирлын байдлаар Монгол улсын дотоодын нийт бүтээгдэхүүн өмнөх оны мөн үетэй харьцуулахад 6.3%-иар өссөн дүнтэй гарлаа (2010 оны зэрэгцүүлэх үнээр). Уг өсөлтөд үйлчилгээний салбарын нэмэгдэл өртөг 6.9%, аж үйлдвэр, барилгын салбарынх 6%-иар нэмэгдсэн нь голлон нөлөөлсөн тухай Үндэсний статистикийн хороо мэдээллээ. Сангийн яам энэ онд эдийн засгийн өсөлт 7-8%-тай гарна гэсэн хүлээлттэй байгаа юм.

Нийт экспортод эзлэх эрдсийн экспортын хэмжээ 5.5 тэрбум ам.долларт хүрч өнгөрсөн оны мөн үетэй харьцуулбал 7.2%-иар нэмэгдсэн байна.

Оны эхний арван сарын байдлаар Монгол улсын нүүрсний экспорт үнийн дүнгээр 2.75 тэрбум ам.доллартай тэнцэж өнгөрсөн оны мөн үеийнхээс 12.2%-иар нэмэгдсэн байна. Нүүрсний экспорт жингээр 32.45 сая тонн хүрсэн нь 3.5%-иар өссөн үзүүлэлттэй байна. Сарын дүнгээр авч үзвэл, өнгөрсөн аравдугаар сард 3.7 сая тонн нүүрсний экспорт хийсэн нь өмнөх есдүгээр сарынхтай жишихэд ижил дүнтэй гарлаа.

Зэсийн баяжмалын экспортын тухайд оны эхний арван сарын байдлаар бууралт ажиглагдаж байна. Тухайлбал жингээр нийтдээ 1.17 сая тоннд хүрч, мөнгөн дүнгээр 1.54 тэрбум ам.долларт хүрлээ. Энэ нь өнгөрсөн оны мөн үеийнхтэй харьцуулахад жингээр 2.5%-иар, үнийн дүнгийн хувьд даруй 7.7%-иар тус тус буурсан байна. Цэвэр зэсийн хувьд экспортын хэмжээ мөн хугацаанд 8.6 мянган тоннд хүрч, мөнгөн дүнгээр 49.8 сая ам.доллартай тэнцсэн нь өнгөрсөн оны мөн үеийнхээс жингийн хувьд 21.8%-иар, үнийн дүнгээр 29.8%-иар тус тус буурсан гэсэн үг юм.

Төмрийн хүдрийн экспортын тухайд оны эхний арван сард жингээр 6.69 сая тоннд хүрсэн нь 10.8%-ийн өсөлтийг, үнийн дүнгээр 459.5 сая ам.долларт хүрсэн нь 67.4%-ийн өсөлтийг харууллаа.

Боловсруулаагүй болон хагас боловсруулсан алтны экспорт мөн хугацаанд 7.5 тонн буюу 344 сая ам.доллартай тэнцсэн нь өнгөрсөн оны мөн үетэй харьцуулахад жингийн хувьд 2.2 дахин,үнийн дүнгийн хувьд 2.4 дахин өссөн дүнтэй гарчээ. Монголбанкны мэдээллээр, оны эхний арван сарын хугацаанд Төв банкны алт худалдан авалт 12.9 тоннд хүрсэн нь өмнөх оны мөн үеийнхээс 4.9 тонноор буюу 27%-иар буурлаа.

Түүхий газрын тосны экспорт 5.4 сая баррельд хүрч, 302 сая ам.доллартай тэнцжээ. Хэдийгээр олборлолт 9.3% өссөн ч, орлогын тухайд 7.3%-иар буурсан дүнтэй гарсан байна.  

Жоншны хүдэр, баяжмалын тухайд оны эхний арван сард 558 мянган тонныг экспортолж, 170.4 сая ам.доллартай тэнцсэнээр жингийн хувьд 32.2%, орлогын тухайд 21.3%-иар тус тус нэмэгджээ.

Цайрын хүдэр, баяжмалын экспортыг авч үзвэл, мөн хугацаанд нийтдээ 109.2 мянган тоннд бүтээгдэхүүн нийлүүлж, 155.6 сая ам.долларын орлого олсон нь жингийн хувьд 6.1%-иар өссөн ч үнийн дүнгийн хувьд 7.1%-иар буурлаа.

Молибденийн баяжмалын экспорт оны эхний арван сард 4.7 мянган тоннд хүрч 41.5 сая ам.долларт хүрснээр жингээр 3%-иар буурсан ч орлогын хувьд 3.5%-иар нэмэгджээ.

Хар тугалгын хүдэр, баяжмалын экспортын хувьд оны эхний арван сарын хугацаанд 18.1 мянган тонн бүтээгдэхүүн нийлүүлж, 39.5 сая ам.долларын орлого олсон байна. Энэ нь жингийн хувьд 1.4%-иар өссөн ч, орлогын дүнгээр 10%-иар буурсан байна.

Гянтболдын экспортын тухайд 542.8 тоннд хүрч 5.14 сая ам.долларын орлого олсон нь өнгөрсөн оны мөн үеийнхээс жингийн хувьд 7.6%-иар, үнийн дүнгийн хувьд 18.7%-иар тус тус буурсан дүнтэй гарлаа.

Б.Төгс

Сэтгэгдэл байхгүй байна

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • 18 цаг 11 минутын өмнө
    Тэргүүлэх эдийн засагтай хоёр гүрэн  АНУ-Хятадын хооронд хоёр жил гаруй хугацаанд үргэлжилсэн худалдааны дайныг эцэслэх тухай эхний шатны хэлэлцээрт   хүрч чадсан талаар арванхоёрдугаар  сарын 13-нд талууд албан ёсоор мэдэгдэв. Энэхүү мэдээлэл цацагдсаны дараа хүрэн метал буюу зэсийн ханш Лондоны металын бирж дээр 6000 мянган ам.доллар/тонн-ын босгыг хол давж тавдугаар сараас хойших хамгийн өндөр түвшинд хүрэв. Газрын тосны ханш ч өсөх шинжтэй болж ирлээ. АНУ нь арванхоёрдугаар сарын 15-нд Хятадаас импортолдог 160 тэрбум ам.долларын бараа бүтээгдэхүүнд “торгууль” болгож нэмэлтээр 15%-ийн татвар ногдуулах  байснаа цуцаллаа.  Гэхдээ АНУ-ын Худалдааны төлөөлөгчийн газар Хятадын 250 тэрбум ам.долларын импортын татварын хувь хэмжээг 25%-иар хэвээр үлдээж, харин 120 тэрбум ам.долларын бараа бүтээгдэхүүний татварын хувь хэмжээг 7.5% руу буулгаж байгааг мэдэгдээд (2019.12.13) байна. 
  • 2020-01-17 19:42
    Оюутолгой төслийн зэс үйлдвэрлэл энэ онд 140-170 мянган тонн, алт үйлдвэрлэл 120-150 мянган унцаар хэмжигдэх тухай “Туркойз Хилл Ресурс” компани 2019 оны дөрөвдүгээр улирлын үйлдвэрлэлийн тайландаа онцолжээ. 2020 онд Оюутолгой уурхайн алтны үйлдвэрлэл өнгөрсөн оныхоос даруй 40 орчим хувиар буурахаар байгаа нь ил уурхайн бага агуулгатай хүдрийн олборлолт үргэлжлэхээр байгаатай холбоотой юм. Харин зэсийн үйлдвэрлэл энэ онд өнгөрсөн оны дүнгээс ахиу гарах төлөвтэй байгааг Туркойз Хилл онцолжээ. 2020 оны тухайд далд уурхайн нэвтрэлтээс гаргасан хүдрийн биетийг боловсруулж эхэлнэ гэдгийг тус компани тэмдэглэжээ.
  • 2020-01-17 16:09
    2019 онд Хятад 46.33 мянган тонн газрын ховор метал экспортолсон нь 2015 оноос хойших хамгийн бага үзүүлэлт болохыг тус улсын Гаалийн Ерөнхий газраас мэдээлжээ. Өнгөрсөн оны арванхоёрдугаар сард 3657 тонн газрын ховор метал экспортолсон нь 2018 оны мөн үетэй харьцуулахад 32.5%-иар буурчээ. Энэхүү бууралтыг Хятадын шинжээчид дэлхийн эдийн засгийн өсөлт буурч, Япон, АНУ болон Европын Холбооны аж үйлдвэрлэл саарч буйтай холбон тайлбарлаж байна. АНУ-Хятадын худалдааны зөрчилтэй шууд холбоогүй гэдгийг ч тэмдэглэж байгаа юм. 
  • 2020-01-17 13:11
    2019 онд Монгол Улсын гадаад худалдааны нийт эргэлт 13.7 тэрбум ам.долларт хүрсэн нь 2018 онтой харьцуулахад 6.7%-иар нэмэгдсэн тухай Үндэсний статистикийн хороо (ҮСХ) мэдээллээ. Үүнээс экспортын үзүүлэлт 7.6 тэрбум ам.доллартай тэнцсэн бол импортын хэмжээ 6.1 тэрбум ам.доллартай тэнцсэн байна. Өөрөөр хэлбэл, импортын хэмжээ 2018 оныхтой харьцуулахад 8%-иар, экспортын үзүүлэлт 8.7%-иар нэмэгджээ. Гадаад худалдааны тэнцэл өнгөрсөн онд 1.5 тэрбум ам.долларын ашигтай гарсан байна. Энэ нь 2018 оны үзүүлэлтээс 31.3% буюу 355.4 сая ам.доллараар өссөн үзүүлэлт төдийгүй гадаад худалдаа 2014 оноос хойш ашигтай гарч эхэлснийг ҮСХ онцлов.
  • 2020-01-17 12:56
    Азийн Хөгжлийн Банкны (АХБ) Захирагч нарын зөвлөл Масацугу Асакаваг өнөөдөр тус банкны Ерөнхийлөгчийн алба хашиж эхэлж байна. Япон Улсын Ерөнхий сайдын болон Сангийн сайдын тусгай зөвлөхийн албыг хашиж буй 61 настай Асакаваг АХБ-ны Удирдах зөвлөлөөс 10 дахь Ерөнхийлөгчөөр сонгосон юм.Тэрээр Сангийн дэд сайдын хувиар 2019 онд Япон Улсын Осака хотноо зохион байгуулагдсан “Их 20”-ийн дээд хэмжээний уулзалт, Фукуока хотод зохион байгуулагдсан “Их 20”-ийн Сангийн сайд нар болон Төв банкны Ерөнхийлөгч нарын түвшний уулзалтуудад чухал үүрэг гүйцэтгэсэн байна. Түүнчлэн, дэлхийн эдийн засгийн хямралын дараахан зохион байгуулагдсан “Их 20”-ийн анхны дээд хэмжээний чуулга уулзалтад тухайн үеийн Ерөнхий сайд Таро Асогийн шадар туслахын хувиар оролцож байв.