“Орон нутгийн сэтгүүлчдийн сүлжээ-2019” сургалт эхэллээ

2019-07-02 12:16

The Mongolian Mining Journal сэтгүүлийн дэргэдэх “Хөгжлийн төлөө сэтгүүл зүй” ТББ-аас орон нутгийн сэтгүүлчдэд зориулсан уул уурхай, эдийн засгийн чиглэлийн сургалтаа тав дахь жилдээ зохион байгуулж байна. Өнөөдөр (07/02) эхэлж буй энэ жилийн сургалт “Уул уурхайн эдийн засагт үзүүлж буй нөлөөлөл” сэдвийн хүрээнд зохион байгуулагдаж байгаа юм. “Хөгжлийн төлөө сэтгүүл зүй” ТББ "Орон нутгийн сэтгүүлчдийн сүлжээ" төслийн энэ оны сургалтыг “Оюутолгой” ХХК, МУИС-ийн Сэтгүүл зүйн тэнхимтэй хамтран зохион байгуулж байгаа бөгөөд 21 аймгийн 35 сэтгүүлч хамрагдаж байна. 

Сургалтад оролцож буй орон нутгийн сэтгүүлчдэд зориулж АМГТГазрын мэргэжилтэн болон эдийн засаг, хууль, хэвлэл мэдээллийн салбарын тэргүүлэх мэргэжилтнүүд илтгэл тавьж оролцож байна. Сургалт хоёр өдөр үргэлжлэх бөгөөд эхний өдөр уул уурхайн салбарын эдийн засагт үзүүлэх нөлөөллийн талаар илтгэл, хэлэлцүүлэг өрнөх бол хоёр дахь өдөр сэтгүүл зүйн чиглэл, тэр дундаа олон нийтийн эрх ашиг, дата сэтгүүл зүй, хуурамч мэдээллээс сэргийлэх тухай сэдвээр илтгэл тавигдана. 

Эхний өдрийн сургалтыг Ерөнхий сайдын зөвлөх, эдийн засагч Н. Энхбаяр “Дэлхийн эдийн засаг ба Монголын уул уурхайн салбар дахь нөлөөлөл” сэдэвт илтгэлээр эхлүүллээ. Тэрбээр илтгэлдээ түүхий эд экспортлогч орнуудын эдийн засаг ирэх жилүүдэд харьцангуй өсөлттэй сайн байх төлөвтэй байгааг дуулгалаа. Монгол улсын гадаад худалдаа өнгөрсөн онд 12.9 тэрбум ам.долларт хүрсэн нь анх удаагаа дотоодын нийт бүтээгдэхүүнтэй тэнцсэн. Цаашид Монголын экспортын үзүүлэлт зэс, нүүрсний худалдаанаас ихээхэн хамааралтай байх төлөвтэй. Харин тухайн бүтээгдэхүүний зах зээл гадаад хүчин зүйл буюу томоохон гүрнүүдийн шийдвэрээс шууд хамааралтай гэдгийг онцоллоо. Тэрбээр мөн АНУ-Хятадын хооронд үүсээд буй худалдааны дайны асуудал нааштайгаар шийдэгдэж чадвал ирэх хоёр жилд дэлхийн эдийн засаг 13 их наяд ам.доллар алдахаас сэргийлж чадна гэдгийг тайлбарлалаа. Гэхдээ дэлхийн улс орнуудын эдийн засагт цаашид зөвхөн геополитик, худалдааны дайны асуудлууд нөлөөлөөд зогсохгүй уур амьсгалын өөрчлөлтийн нөлөөлөл эрсдэл учруулах томоохон хүчин зүйл болж буйг тодотголоо.

Өнөөдрийн сургалт цаашид салбарын эдийн засагт хүргэх өгөөж, нөлөөллийн талаарх сонирхолтой илтгэлүүдээр үргэлжилнэ. Тухайлбал “Эрдэс баялгийн эдийн засаг гэж юу вэ?” сэдвээр Монголын экспортлогчдын холбооны Ерөнхийлөгч Д.Галсандорж, Монголын уул уурхайн үндэсний ассоциацийн Гүйцэтгэх захирал Д. Энхболд “Хариуцлагатай уул уурхай: Монголын эдийн засагт үзүүлэх өгөөж, нөлөөлөл” сэдвээр сонсгол тавих юм.  Мөн Уул уурхайн хууль эрх зүй судлаач Г.Сурахбаяр салбарын хууль эрх зүйн өөрчлөлт, түүний эдийн засагт үзүүлж буй нөлөөллийн талаар, “Эдийн засаг дахь уул уурхайн салбарын хамаарал ба эдийн засгийг солонгоруулах нь” сэдэвт судлаач Ц.Бямбацогтын сонирхолтой илтгэлүүд бий.  

Мөн салбарын хувийн хэвшлийн төлөөлөл болох Оюутолгойн Хамтын ажиллагаа, мэдээлэл харилцааны газрын Тэргүүн Э.Лхагва компанийн төслийн эдийн засаг дахь нөлөөллийг танилцуулна. 

Ийнхүү эхний өдрийн сургалтад уул уурхайн эдийн засаг дахь нөлөөлөл сэдэвт төвлөрөх бол хоёр дахь өдөр сэтгүүл зүйн сэдэвт төвлөрнө. Маргаашийн сургалтад МУИС-ийн ШУС-ийн Нийгмийн ухааны салбар хариуцсан Дэд захирал /Ph.D/ Б.Болд-Эрдэнэ “Сэтгүүл зүй олон нийтийн эрх ашгийг хэрхэн зохицуулах вэ?” сэдвээр, тэргүүлэх мэдээллийн цахим хуудас болох IKON.MN-ийн Ерөнхий редактор Ч.Болортуяа “Дата сэтгүүл зүйн чиг хандлага, туршлага” сэдвээр илтгэл тавина. Мөн хуурамч мэдээллээс сэргийлэх, түүнийг хэрхэн ялгаж салгах талаар “Ремо медиа” компанийн үүсгэн байгуулагч Б.Намнандорж танилцуулна.

Сэтгүүлчдийг эдийн засаг, уул уурхайн сэдэвт чадавхижуулах зорилготой “Хөгжлийн төлөө сэтгүүл зүй” ТББ нь үүсгэн байгуулагдсан цагаасаа хойш арван жилийн хугацаанд төвийн болон орон нутгийн 100 гаруй сэтгүүлчдэд сургалт явуулаад байна. 
 
Б.Төгс

Сэтгэгдэл байхгүй байна

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • 2020-02-21 17:01
    Хятад болон Ази тивийн бусад оронд коронавирусын тархалт нэмэгдэж буйн улмаас дэлхийн зах зээл дэх алтны ханш 1631 ам.доллар болж өсчээ. Энэ нь сүүлийн 7 жилийн дээд түвшинд тооцогдож байна. Хоёрдугаар сарын 14-нд зах зээл дэх алтны үнэ 1577 ам.доллар/унц байсан юм. Коронавирусын дэгдэлтийн улмаас эдийн засагт үүсэх нөлөөллийг арилгах зорилгоор Хятад улс мөнгөний зөөлөн бодлого явуулах болсон ч алтны ханш үргэлжлэн өссөөр байна. Энэ долоо хоногийн пүрэв гаригт Хятадын Ардын банк бодлогын хүүгээ бууруулах шийдвэр гаргасан юм.  
  • 2020-02-21 13:59
    “Эрдэнэс Монгол” ХХК нь нүүрсний давхаргын метан хийн нөөцийг тогтоож, эрчим хүчний цэвэр эх үүсгүүр болгон эдийн засгийн эргэлтэд оруулах зорилготой метан хийн төслийг хэрэгжүүлэхээр Австралийн “Жэйд Метан” ХХК-тай хамтарсан компани байгуулсан. 2019 оны тавдугаар сард талууд метан хийн төслийн хөрөнгө оруулалтын гэрээнд гарын үсэг зурж, үйл ажиллагаагаа явуулснаар улсын төсвөөс нэг ч төгрөг гаргалгүйгээр уг төслийг хэрэгжүүлж эхэлсэн юм. “Эрдэнэс Метан” ХХК нь Хамтын ажиллагааны гэрээний дагуу өөрсдийн эрлийн ажлын үр дүнгийн мэдээлэл болох 8 цооногийн өрөмдлөгийн мэдээлэл, геологийн бичиглэл, геофизикийн хэмжилтийн өгөгдөл, бүх дээжинд хийсэн нүүрсний чанарын шинжилгээний үр дүн зэргийг “Эрдэнэс Монгол” ХК-д хүлээлгэн өгчээ.
  • 2020-02-21 13:46
    “Эрдэнэс Монгол” ХХК-ийн дэргэдэх нэгдлийн зөвлөлийн ээлжит хурал (2020.02.14)  болж, охин болон хараат компаниудын өнөөгийн байдал, тулгамдаж буй асуудлуудыг хэлэлцсэн юм. Тус компанийн Гүйцэтгэх захирал П.Ганхүү “Салхитын мөнгө, алтны ордыг эдийн засгийн эргэлтэд оруулж олсон орлогоос төрд ногдох өгөөжийг барьцаалан үнэт цаас гаргах замаар иргэний тэтгэвэр барьцаалсан зээлийн тодорхой хэсгийг төлөхөөр хуульчилсан. Энэхүү хуулийг дагаж мөрдөх хуулийн дагуу 3 тогтоол, нэг журам гаргасан. “Эрдэнэс  бонд” гаргах ажлыг удирдан зохион байгуулж байна” хэмээн тодотгосон. Энэхүү бондыг санхүүгийн зах зээл дээр хаалттай хүрээнд гаргахаар төлөвлөсөн  бөгөөд бондоос босгосон хөрөнгөөр 228 мянган иргэний тэтгэврийн зээлийн  6 хүртэлх сая төгрөгийг тэглэх юм.  
  • 2020-02-21 13:21
    2020 оны хоёрдугаар сараас Орос улс төмөр замаар Казахстаны нутгаар дамжин Хятад руу нүүрс экспортлох талаар Москва, Нур-Султан хэлэлцэж байна. Тус хэлэлцээрээр талууд төмөр замын тээврийн тарифыг 65%-иар хөнгөлөх асуудлыг хэлэлцэж буй. Экспортын шинэ чиглэл нь Оросын “Кузбасс” компанийн нүүрсний Хятад руу нийлүүлэлтийг өргөжүүлж, Алс Дорнодын чиглэлийг нүүрсний төмөр замын тээврийг ачааллын дарамтыг бууруулна гэж үзэж байгаа юм. Казахстан улсын хувьд төмөр замын транзит тээврийг нэмэгдүүлэх сонирхолтой байна. Орос нь Хятадын зах зээлд нүүрсний нийлүүлэлтээр Австрали, Индонезийн дараагаар гуравдугаарт орохоор эрмэлзэж байгаа юм. Тус улс нь ирэх 10 жилд Хятад рүү экспортлох нүүрсний хэмжээгээ жилд 55 сая тоннд хүргэх зорилттой.
  • 2020-02-21 12:25
    Үндэсний статистикийн хорооны мэдээллээр, 2020 оны эхний сарын байдлаар гадаад худалдааны нийт эргэлт 932 сая ам.долларт хүрсний дотор экспорт 459 сая ам.доллар, импорт 473 сая ам.доллартай тэнцлээ. Өнгөрсөн оны мөн үетэй харьцуулахад нийт бараа эргэлт 16.1%-иар, экспорт 24.4%-иар, импорт 6.1%-иар тус тус буурсан байна. Гадаад худалдааны тэнцэл энэ оны нэгдүгээр сард 14.3 сая ам.долларын алдагдалтай гарлаа. Өнгөрсөн оны мөн үед 103.3 сая ам.долларын ашигтай гарч байжээ. Энэ онд гадаад худалдаа ашиггүй гарсан нь экспорт өмнөх оны мөн үеэс 148 сая ам.доллараар буурсантай холбоотой. Тодруулбал, өнгөрсөн нэгдүгээр сард алтны экспорт огт хийгдээгүйн зэрэгцээ зэсийн баяжмалын нийлүүлэлт 43.2 сая ам.доллараар буурсан нь голлон нөлөөлсөн байна.