Газар шороогоо  хууль бусаар хөндүүлэхгүй гэдгээ илэрхийллээ

2019-05-06 15:49

"Ховд" ТВ-ийн сэтгүүлч, редактор, С.Жавзандулам

Ашигт малтмал, газрын тосны газраас 2018 оны 11 дүгээр сарын 22-ны өдөр ашигт малтмалын хайгуулын тусгай зөвшөөрөл олгох талбайн  сонгон шалгаруулалтыг аж ахуй нэгжүүдийн дунд зарласан байдаг. Сонгон шалгаруулалтын үр дүнд Ховд аймгийн Эрдэнэбүрэн сумын нутагт орших нутгийнхны нэрлэж заншсанаар Намарзан багийн Түлэнхий бэлчир хэмээх газрыг  “Алтан уул-2 нэртэйгээр” "Андерграунд голд майнинг" ХХК-д 4792.23 га газрыг, Ховд аймгийн Дөргөн сумын нутагт орших Үнэгт нэртэй 1614.4 га бүхий талбайг "ГД трейд" ХХК-д тус тус олгожээ. 

Сонгон шалгаруулалтад шалгарсан компаниуд эхнээсээ тухайн сумдын нутаг дэвсгэрт заагдсан талбайд үйл ажиллагаа эхлэхээр бэлтгэл ажлаа хангаад байсныг нутгийн иргэд хүчтэй эсэргүүцэж сумын удирдлагууддаа хандан 200 гаруй хүний гарын үсэг бүхий өргөдлийг өргөн барьснаар сумын Засаг даргын мэдэгдлийг "Андерграунд голд майнинг" ХХК-д 2019 оны 4 дүгээр сарын 22-ны өдөр хүргүүлсэн байна. Тухайн компанид хаягласан мэдэгдэлд "Алтан уул-2" нэртэй хайгуулын тусгай зөвшөөрөл нь холбогдох хуулийн зүйл заалтыг зөрчсөнийг онцлоод 2019 оны 4 дүгээр сарын 22-ны өдрийн 19 цагт багтан хайгуул хийхээр бэлтгэж байсан техник хэрэгсэл, гэр, машинаа тухайн газраас нүүлгэж чөлөөлж өгөхийг мэдэгдсэн байдаг. Гэвч хүргүүлсэн мэдэгдлийн хариу албан ёсоор ирээгүй, заасан хугацаанд тухайн газрыг компанийн зүгээс чөлөөлөөгүйн улмаас Эрдэнэбүрэн сумын удирдлагууд, малчид, ард иргэдийн төлөөлөл нийлсэн 50 орчим хүн "Албадан буулгах тухай" сумын Засаг даргын захирамжийг танилцуулж, албадан буулгах үйл ажиллагааг зохион байгуулж газрыг хүчээр чөлөөлжээ. Хууль зөрчсөн, сумын зөвшөөрөлгүй, иргэд олон нийтийн санал авалгүй үйл ажиллагаа явуулж байгаад бухимдаж байгаагаа илэрхийлж байлаа. 

Монгол Улсын Засгийн газрын хэрэгжүүлэгч агентлаг Ашигт малтмал, газрын тосны Хэрэг эрхлэх газраас тухайн суманд огт байхгүй нэршлээр нэрлэсэн "Алтан уул-2" хэмээх газар хайгуулын тусгай зөвшөөрлийг олгоод байгаа Эрдэнэбүрэн сумын Намарзан багийн нутаг Түлэнхий бэлчирт хүрэл зэвсгийн үеэс Дундад зууны үе хүртэлх түүхийн нандин өв бүхий 38 дурсгал, өвөг дээдсийн оршуулгын газар бүхий тухайн сумын ард иргэдийн нандигнан хайрлаж ирсэн газар гэдгийг тэд онцолж байсан. Цаашид сум орон нутгийнхаа газар шороог хууль бусаар хөндүүлэхгүй байх тал дээр тууштай тэмцэнэ гэдгээ энэ үеэр мэдэгдсэн юм. Ингээд уг асуудлаар Ашигт малтмал, газрын тосны газрын Кадастрын хэлтсийн дарга Д.Дашзэвэг, Зураг зүйн бүртгэл хариуцсан мэргэжилтэн Н.Хэрлэнчимэг нараас утсаар тодруулга авлаа. 

 

Кадастрын хэлтсийн дарга Д. Дашзэвэг: Сүүлд гарсан  хайгуулын зарим нэг тусгай зөвшөөрөл дээр  өмнө нь манай систем дээр байсанчлан Ашигт малтмалын тухай хуулийн 19 дүгээр зүйлийг үндэслэнэ гэж бичсэн байгаа. Тиймээс тэдгээр тусгай зөвшөөрлийг буцаан татаж аваад 19 дүгээр зүйлийг өөрчилж байна.    

Зураг зүйн бүртгэл хариуцсан мэргэжилтэн Н.Хэрлэнчимэг: Тусгай зөвшөөрлийн хэвлэлт нь алдаатай,  буруу байсан. Гэхдээ  тухайн тусгай зөвшөөрлийн алдааг залруулж дахин хэвлэсэн. “Андерграунд голд майнинг” ХХК-ийн хувьд тухайн гэрчилгээ нь залруулга хийсэн. Хэдийд залруулга хийснийг нь санахгүй байна. Манай шийдвэрүүдийг харах хэрэгтэй. 

Сэтгэгдэл байхгүй байна

Санал асуулга
Уул уурхайн тухай хуулийн төслийг дэмжиж байна уу?
  • -Дэмжинэ
  • -Дэмжихгүй
  • -Зарим заалтыг өөрчлөх
Үр дүн:
  • -Дэмжинэ
  • -Дэмжихгүй
  • -Зарим заалтыг өөрчлөх

ШИНЭ

  • 2019-09-13 14:06
    Өнгөрсөн хоёр сарын хугацаанд Баянхонгор аймаг дахь Алт сорьцлох хяналтын лаборатори 10 гаруй иргэн, гурван аж ахуйн нэгжээс 80 орчим кг алт авч Монголбанкинд тушаажээ. Тус лаборатори нь нийтдээ 90 орчим алтан гулдмай хэвлэн гаргаж, химийн сорьцын шинжилгээ хийсэн байна. Тэгвэл энэ оны есдүгээр сарын байдлаар 450 орчим кг алт Монголбанкинд тушаасан бөгөөд нийт 390 орчим алтан гулдмайг хэвлэж, сорьцын шинжилгээ хийсэн аж. Энэ хэмжээ ирэх хоёр сарын хугацаанд өсөх хандлагатай байна.
  • 2019-09-12 17:44
    Оны эхний найман сарын байдлаар Монгол улсын нүүрсний экспорт 25 сая тоннд хүрсэн тухай Үндэсний статистикийн хороо мэдээллээ. Өнгөрсөн оны мөн үеийнхээс жингийн хувьд 5.2%-иар өссөн үзүүлэлттэй байна. Сарын дүнгээр авч үзвэл, өнгөрсөн наймдугаар сард 4 сая 125 мянган тонн нүүрсний экспорт хийж түүхэн дээд амжилт тогтоолоо. Харин мөнгөн дүнгийн хувьд 15.6%-ийн өсөлттэй буюу 2.135 тэрбум ам.доллартай тэнцэж байна. Гэхдээ энэ онд нүүрсний экспорт 42 сая тонн байхаар улсын төсөвт тооцож буй төлөвлөгөө биелэхэд хүндрэлтэй байгааг тэмдэглэх нь зүйтэй. Үндэсний статистикийн хорооны мэдээллээр, оны эхний найман сарын байдлаар манай улсын гадаад худалдааны нийт бараа эргэлт 9.5 тэрбум ам.долларт хүрч 11.9%-иар өсчээ. Үүнд экспорт 5.4 тэрбум ам.доллар, импорт 4.1 тэрбум ам.долларыг эзэлсэн байна. Тодруулбал, экспорт өнгөрсөн оны мөн үеийнхтэй харьцуулахад 15.3%, импорт 7.6%-иар тус тус өслөө.
  • 2019-09-12 13:59
    Зам, тээврийн хөгжлийн сайд Б.Энх-Амгалан “Оросын төмөр замууд” НХН-ийн Ерөнхий захирал бөгөөд Ерөнхий хорооны дарга О.В.Белозёровыг хүлээн авч уулзжээ. Талууд Зүүнбаян-Ханги, Тавантолгой-Зүүнбаян, баруун босоо коридор буюу Арцсуурь чиглэлийн төмөр замыг холбох Кызыл-Курагинотой чиглэлийн шинэ төмөр замын  төслүүдийг, төмөр замын төв коридорын шинэчлэлтэй хамтатган хэрэгжүүлэхээр ярилцаж, хэрэгжүүлэх чиглэлд онцгой анхаарал хандуулан, хамтарч ажиллахаар тохиролцжээ.
  • 2019-09-12 13:45
    Улсын Их Хурлын 2019 оны хаврын ээлжит чуулганаар хэлэлцэж баталсан хууль тогтоомжийн талаарх танилцуулга, инфографикийг уншигч Та бүхэнд цувралаар хүргэж байна. Энэ “Зарим газар нутгийг улсын тусгай хамгаалалтад авах тухай” Улсын Их Хурлын тогтоолын танилцуулга, инфографикийн хамт хүргэж байна. Монгол Улсын Засгийн газраас 2018 оны 12 дугаар сарын 28-ны өдөр Улсын Их Хуралд өргөн мэдүүлсэн “Зарим газар нутгийг улсын тусгай хамгаалалтад авах тухай” Улсын Их Хурлын тогтоолын төслийг Улсын Их Хурлын чуулганы 2019 оны 05 дугаар сарын 02-ны өдрийн нэгдсэн хуралдаанаар хэлэлцэн баталсан. 
  • 2019-09-12 11:13
    Архангай аймгийн Цэнхэр сумын Орхон багийн нутаг дахь ашигт малтмалын тусгай зөвшөөрлийг цуцлаад буй “Алтай гоулд”, “БМНС”, “Голден хаммер” “Гурван хайрханы асар” зэрэг компаниуд техникийн нөхөн сэргээлт хийж байна. Тус компаниуд ашигласан газрууддаа 50-иас дээш хувьд хийсэн нөхөн сэргээлтийн ажлыг хянан шалгаж байгаа тухай Ажлын хэсэг мэдээлэв. Тодруулбал, техникийн нөхөн сэргээлтийг 35 орчим га-д, нөхөн дүүргэлтийг 8 орчим га-д, биологийн нөхөн сэргээлтийг 12 орчим га талбайд тус тус хийжээ. Нөхөн сэргээлтийн ажилд дээрх компаниудын 17 эксковатор, 9 ковш, 32 самсоваль, 192 ажилтан оролцож байна. Харин "Монгол газар" ХХК, "Эм Жи Эйч" ХХК, "Сэншивэе Монгол" ХХК-иуд нөхөн сэргээлт хийж эхлээгүй аж.