Арбитрын шүүхийн шийдвэрээр Засгийн газар 40 сая ам.долларыг “Стандарт” банкинд төлжээ

2019-04-05 16:59

Монгол Улсын Шадар сайд Ө.Энхтүвшин, “Эрдэнэт үйлдвэр”-ийн Ерөнхий захирал Х.Бадамсүрэн нар “Стандарт” банктай холбоотой өрийн асуудлаар өнөөдөр сэтгүүлчдэд мэдээлэл хийлээ.   

Ө.Энхтүвшин: Гадна талдаа асуудалгүй болсон учраас буруутай этгээдүүдээр энэ мөнгийг төлүүлнэ

“Жаст” группын Ерөнхий захирал Ш.Батхүү Өмнөд Африкийн “Стандарт” банктай 2009-2010 онд зээлийн гэрээ байгуулсан бөгөөд 2012 он хүртэлх хугацаанд хэд хэдэн удаа нэмэлтээр,  нийтдээ 160.1 сая  ам.долларыг зээлээр авсан байдаг. Үүнийгээ хугацаандаа төлөөгүй учраас “Стандарт” банк Лондонгийн олон улсын Арбитрын шүүхэд 2013 оны долдугаар сард энэ асуудлаар хандсан юм. Ингээд Арбитрын шүүх  2015-2016 онд дөрвөн удаа хуралдсан. “Стандарт” банкны “Эрдэнэт үйлдвэр”-ээс  нэхэмжилсэн нийт  дүн нь  86.95 сая   ам.доллар байсан. “Эрдэнэт үйлдвэр”уг зээлийн гэрээнд батлан даагчаар оролцсон учраас тус үйлдвэрээс уг төлбөрийг нэхэмжилсэн гэх  хариултыг нь Арбитрын шүүх баталгаажуулсан байдаг. Ж.Батхүү телевиз, радиогоор би уг зээлийн гэрээнд хуурамчаар гарын үсэг зурж, зээлээ авсан гэж хэлээд байсан ч Лондонгийн шүүх уг шийдвэрийг гаргасан. Уг шийдвэрийг манай тал хүлээн зөвшөөрөөгүй боловч 51 сая ам.долларыг “Эрдэнэт үйлдвэр” төлөх ёстой гэсэн шийдвэрийг Арбитрын шүүхээс гаргасан.

Хэдийгээр 86.95 сая ам.долларыг нэхэмжилсэн боловч  Арбитрын шүүх 35.95 сая ам.долларыг нь хассан. Энэ шийдвэр 2016 оны есдүгээр сарын 20-нд гарсан байдаг юм. Уг шийдвэрийг Засгийн газар мөн л хүлээн зөвшөөрөөгүй бөгөөд Английн Дээд шүүхэд давж заалдах гомдол гаргасан. Гэсэн хэдий ч олон улсын шүүхийн процедур нэлээд төвөгтэй юм билээ. Давж заалдахын тулд та нар эрхээ олж авах ёстой. Эрхээ олж авахын тулд нэн даруй  шүүхийн шийдвэрийн дагуу 51 сая ам.долларыг “Стандарт” банкны дансанд байршуулж байж давж заалдана гэсэн хариу өгсөн. Тухайн үедээ Засгийн газарт энэ 51 сая ам.долларыг төлөх боломж байгаагүй.

Үүний дараагаар Лондонгийн Арбитрын шүүх мөн Английн дээд шүүхэд хандсан юм билээ. Английн Дээд шүүх 2018 оны долдугаар сарын 6-ны өдөр  хуралдаад  Арбитрын шүүхтэй адил шийдвэр гаргасан. Тодруулбал, “Эрдэнэт үйлдвэр” нь Английн Уэльсийн нутаг дэвсгэрт байгаа аливаа эд хөрөнгийг гаргахгүй байх, тэдгээрээс гадна эд хөрөнгийг захиран зарцуулах, худалдан борлуулах, үнийн дүнг бууруулахгүй байх,  Арбитрын шүүхийн шийдвэр дээр тогтоосон 41.22 сая ам.доллар дээр хэрэг хянан шийдвэрлэхтэй холбоотой гарсан зардал болох 476.8 мянган фунт стерлингтэй тэнцэх хэмжээний мөнгөн дүнг банкинд болон тухайн компанийн дансанд  даруй байршуулах, эсхүл нэгдүгээр зэрэглэлийн банкинд баталгаа гаргах зэрэг шийдвэрийг гаргасан.

Нэгэнт энэ нь эцсийн шийдвэр учраас үүнийг Монголын тал төлөхгүй байх аргагүй болсон юм. Иймээс Ерөнхий сайдын захирамжаар 2018 онд Шадар сайдаар ахлуулсан Ажлын хэсэг байгуулж хэдэнтээ хуралдсан. Английн дээд шүүх “Эрдэнэт үйлдвэрийн төлбөрийн гүйлгээг царцаах, “Стандарт” банкны төлбөрийн асуудлыг шийдвэрлэхгүй бол эд хөрөнгийг хураах арга хэмжээ авах шийдвэрийг гарсан байдаг. Ажлын хэсэг эхний ээлжинд гадаад асуудлаа шийдвэрлэж, дараа нь дотоод асуудалдаа орох саналыг Засгийн газарт оруулж дэмжсэн. Хэлэлцээр урт хугацаанд хийгдсэн бөгөөд өнөөдрийн байдлаар 40 сая ам.долларыг “Эрдэнэт үйлдвэр”-ийн эрсдэлийн сангаас гаргаж, “Стандарт” банкинд шилжүүлсэн. Одоо гадна талдаа асуудалгүй болсон учраас буруутай этгээдүүдээр энэ мөнгийг төлүүлнэ.

Г.Идэр 

Сэтгэгдэл байхгүй байна

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • 22 цаг 10 минутын өмнө
    Тэргүүлэх эдийн засагтай хоёр гүрэн  АНУ-Хятадын хооронд хоёр жил гаруй хугацаанд үргэлжилсэн худалдааны дайныг эцэслэх тухай эхний шатны хэлэлцээрт   хүрч чадсан талаар арванхоёрдугаар  сарын 13-нд талууд албан ёсоор мэдэгдэв. Энэхүү мэдээлэл цацагдсаны дараа хүрэн метал буюу зэсийн ханш Лондоны металын бирж дээр 6000 мянган ам.доллар/тонн-ын босгыг хол давж тавдугаар сараас хойших хамгийн өндөр түвшинд хүрэв. Газрын тосны ханш ч өсөх шинжтэй болж ирлээ. АНУ нь арванхоёрдугаар сарын 15-нд Хятадаас импортолдог 160 тэрбум ам.долларын бараа бүтээгдэхүүнд “торгууль” болгож нэмэлтээр 15%-ийн татвар ногдуулах  байснаа цуцаллаа.  Гэхдээ АНУ-ын Худалдааны төлөөлөгчийн газар Хятадын 250 тэрбум ам.долларын импортын татварын хувь хэмжээг 25%-иар хэвээр үлдээж, харин 120 тэрбум ам.долларын бараа бүтээгдэхүүний татварын хувь хэмжээг 7.5% руу буулгаж байгааг мэдэгдээд (2019.12.13) байна. 
  • 2020-01-17 19:42
    Оюутолгой төслийн зэс үйлдвэрлэл энэ онд 140-170 мянган тонн, алт үйлдвэрлэл 120-150 мянган унцаар хэмжигдэх тухай “Туркойз Хилл Ресурс” компани 2019 оны дөрөвдүгээр улирлын үйлдвэрлэлийн тайландаа онцолжээ. 2020 онд Оюутолгой уурхайн алтны үйлдвэрлэл өнгөрсөн оныхоос даруй 40 орчим хувиар буурахаар байгаа нь ил уурхайн бага агуулгатай хүдрийн олборлолт үргэлжлэхээр байгаатай холбоотой юм. Харин зэсийн үйлдвэрлэл энэ онд өнгөрсөн оны дүнгээс ахиу гарах төлөвтэй байгааг Туркойз Хилл онцолжээ. 2020 оны тухайд далд уурхайн нэвтрэлтээс гаргасан хүдрийн биетийг боловсруулж эхэлнэ гэдгийг тус компани тэмдэглэжээ.
  • 2020-01-17 16:09
    2019 онд Хятад 46.33 мянган тонн газрын ховор метал экспортолсон нь 2015 оноос хойших хамгийн бага үзүүлэлт болохыг тус улсын Гаалийн Ерөнхий газраас мэдээлжээ. Өнгөрсөн оны арванхоёрдугаар сард 3657 тонн газрын ховор метал экспортолсон нь 2018 оны мөн үетэй харьцуулахад 32.5%-иар буурчээ. Энэхүү бууралтыг Хятадын шинжээчид дэлхийн эдийн засгийн өсөлт буурч, Япон, АНУ болон Европын Холбооны аж үйлдвэрлэл саарч буйтай холбон тайлбарлаж байна. АНУ-Хятадын худалдааны зөрчилтэй шууд холбоогүй гэдгийг ч тэмдэглэж байгаа юм. 
  • 2020-01-17 13:11
    2019 онд Монгол Улсын гадаад худалдааны нийт эргэлт 13.7 тэрбум ам.долларт хүрсэн нь 2018 онтой харьцуулахад 6.7%-иар нэмэгдсэн тухай Үндэсний статистикийн хороо (ҮСХ) мэдээллээ. Үүнээс экспортын үзүүлэлт 7.6 тэрбум ам.доллартай тэнцсэн бол импортын хэмжээ 6.1 тэрбум ам.доллартай тэнцсэн байна. Өөрөөр хэлбэл, импортын хэмжээ 2018 оныхтой харьцуулахад 8%-иар, экспортын үзүүлэлт 8.7%-иар нэмэгджээ. Гадаад худалдааны тэнцэл өнгөрсөн онд 1.5 тэрбум ам.долларын ашигтай гарсан байна. Энэ нь 2018 оны үзүүлэлтээс 31.3% буюу 355.4 сая ам.доллараар өссөн үзүүлэлт төдийгүй гадаад худалдаа 2014 оноос хойш ашигтай гарч эхэлснийг ҮСХ онцлов.
  • 2020-01-17 12:56
    Азийн Хөгжлийн Банкны (АХБ) Захирагч нарын зөвлөл Масацугу Асакаваг өнөөдөр тус банкны Ерөнхийлөгчийн алба хашиж эхэлж байна. Япон Улсын Ерөнхий сайдын болон Сангийн сайдын тусгай зөвлөхийн албыг хашиж буй 61 настай Асакаваг АХБ-ны Удирдах зөвлөлөөс 10 дахь Ерөнхийлөгчөөр сонгосон юм.Тэрээр Сангийн дэд сайдын хувиар 2019 онд Япон Улсын Осака хотноо зохион байгуулагдсан “Их 20”-ийн дээд хэмжээний уулзалт, Фукуока хотод зохион байгуулагдсан “Их 20”-ийн Сангийн сайд нар болон Төв банкны Ерөнхийлөгч нарын түвшний уулзалтуудад чухал үүрэг гүйцэтгэсэн байна. Түүнчлэн, дэлхийн эдийн засгийн хямралын дараахан зохион байгуулагдсан “Их 20”-ийн анхны дээд хэмжээний чуулга уулзалтад тухайн үеийн Ерөнхий сайд Таро Асогийн шадар туслахын хувиар оролцож байв.