20 жил ажиллах хүрэн нүүрсний гурван уурхай 2019 онд ашиглалтад орно

2019-01-14 10:48


The Mongolian Mining Journal /2018.012/

2019 оны хувьд баяжуулалтын салбарт хоёр үйлдвэр ашиглалтад орохоор төлөвлөгдсөн нь Алтанцагаан овоо, Халзан бүргэдэй УБҮ. Мөн онд хүрэн нүүрсний гурван томоохон уурхай, бал чулууны нэг уурхай ашиглалтад орохоор Эрдэс баялгийн мэргэжлийн зөвлөлөөр ТЭЗҮ-ээ батлуулсан бөгөөд  бүгд 20 жил ажиллах төлөвлөгөөтэй   байна.  Эдгээр уурхайн үйл ажиллагаа эхэлснээр орон нутагт ажлын байр нэмэгдэж, нийгмийн хариуцлагын хүрээнд хийгдэх ажлууд ч бий болно. 

Алтан цагаан овоогийн УБҮ

Дорнод аймгийн Цагаан-Овоо сумын нутагт Алтан цагаан овоогийн алт-холимог металын ордыг ашиглахаар “Степпе голд” компани бэлтгэл ажлаа гүйцэтгэж байна. Төслийг хэрэгжүүлэхэд 219.5 тэрбум төгрөгийн хөрөнгө оруулалт шаардлагатай бөгөөд 478 хүнийг ажлын байраар хангах юм.

Халзан бүргэдэйн  УБҮ

Ховд аймгийн Мянгад сумын нутагт “Монголиан Нэшнл Рийр Ийрт Корп” компани Халзан бүргэдэйн газрын ховор элементийн уулын баяжуулах үйлдвэрийн төслийг хэрэгжүүлнэ. Орд ашиглах ТЭЗҮ-ийг Эрдэс баялгийн мэргэжлийн зөвлөлөөр (ЭБМЗ) хэлэлцүүлж,  хүлээн авсан байна.
Төслийг жилдээ 5 сая тонн хүдэр олборлож, боловсруулах хүчин чадалтайгаар 39 жил ажиллахаар төлөвлөжээ. Уг төслийг хэрэгжүүлэхэд 403 тэрбум төгрөгийн хөрөнгө оруулалт шаардлагатай юм.  Үйлдвэр ашиглалтад орсноор 665 хүн ажлын байраар хангагдана.

Сүүж уулын уурхай

Өмнөговь аймгийн Номгон сумын нутагт “Альшаа хайрхан” компани Сүүж уулын Зүүн болон Хойд хэсгийн гэсэн 2 уурхайгаас жилдээ нийт 3 сая тонн бал чулуу олборлох төслийг эхлүүлэхээр бэлтгэж байна. Орд ашиглах ТЭЗҮ-ийг ЭБМЗ-өөр хэлэлцүүлэн хүлээн авчээ. Уг төсөлд нийтдээ 1.03 их наяд төгрөгийн хөрөнгө оруулалт шаардлагатай гэдгийг холбогдох албаны мэргэжилтнүүд илэрхийлэв. 

Өөхийн цагааны нүүрсний уурхай

Говьсүмбэр аймгийн Шивээговь, Сүмбэр сумын нутагт “Эйкүсора” компани Өөхийн цагааны хүрэн нүүрсний уурхайгаас  жилдээ 500 мянган тонн нүүрс олборлож эхлэх ба улмаар  5 сая тоннд хүргэх төлөвлөгөөтэй ажиллаж байна. Орд ашиглах ТЭЗҮ-ийг мөн ЭБМЗ-өөр хэлэлцүүлжээ.  Тус уурхайд  346.6 тэрбум төгрөгийн хөрөнгө оруулалт хийгдэх бөгөөд  21 жилийн хугацаанд ашиглана.

Хөөвөр булагийн нүүрсний уурхай

Дорнод аймгийн Баянтүмэн сумын нутагт “Өнт-Өнгөт” компани  Хөөвөрбулагийн хүрэн нүүрсний уурхайн төслийг хэрэгжүүлэхээр төлөвлөж байна. Төсөлд 135 тэрбум төгрөгийн хөрөнгө оруулалт хийж, жилдээ 5 сая тонн нүүрс олборлох хүчин чадалтайгаар 21 жил ажиллана.
Цагаан залаат, Ерөөлтийн нүүрсний уурхай


Сүхбаатар аймгийн Сүхбаатар, Асгат сумын нутагт “Дорнын чулуулаг” ХХК Цагаан залаат, Ерөөлтийн хүрэн нүүрсний уурхайг ил аргаар ашиглахаар төлөвлөжээ. Цагаан залаатын уурхайг 9 сая тонн нүүрс олборлох хүчин чадалтайгаар 10 жил, Ерөөлтийн нүүрсний уурхайг жилдээ 10 сая тонн нүүрс гаргах хүчин чадалтайгаар 20 жил ашиглахаар төлөвлөж байна. Тус хоёр  уурхайг ашиглалтад оруулахад 503.8 тэрбум төгрөгийн хөрөнгө оруулалт шаардлагатай. 

Сэтгэгдэл байхгүй байна

Санал асуулга
Уул уурхайн тухай хуулийн төслийг дэмжиж байна уу?
  • -Дэмжинэ
  • -Дэмжихгүй
  • -Зарим заалтыг өөрчлөх
Үр дүн:
  • -Дэмжинэ
  • -Дэмжихгүй
  • -Зарим заалтыг өөрчлөх

ШИНЭ

  • 6 цаг 8 минутын өмнө
    Сүхбаатар аймгийн төсөвт 2018 онд нийт 3.2 тэрбум төгрөг төвлөрснөөс 1.8 тэрбумыг уул уурхайн татварын орлого бүрдүүлсэн байна. Өнөөгийн байдлаар аймгийн хэмжээнд ашигт малтмалын ашиглалтын тусгай зөвшөөрөлтэй 28 компани бий. Тус компаниуд орон нутагт төлөх ёстой татвараа хуулийн хүрээнд төвлөрүүлж буй бөгөөд уул уурхайн татварын орлого жил ирэх бүр өсөлттэй байгааг Сүхбаатар аймгийн Татварын газраас мэдээллээ. Цаашид уул уурхайн үйл ажиллагаа явуулдаг компаниудыг аймагт бүртгэлтэй болох саналыг орон нутгийн зүгээс тавьж байна.
  • 2019-08-16 11:18
    Нийт экспортын дийлэнх хэсгийг бүрдүүлдэг эрдсийн экспорт оны эхний долоон сард 3833.8 сая ам.долларт хүрсэн нь өнгөрсөн оны мөн үетэй харьцуулахад 9.5%-иар өссөн дүн боллоо. Эрдсийн экспорт дундаа нүүрсний экспортын дүн 1.79 тэрбум ам.долларыг эзэлж байна. Энэ нь өнгөрсөн оны мөн үеийнхтэй харьцуулбал орлогын дүн 10.6%-иар нэмэгдсэн гэсэн үг. Оны эхний долоон сарын байдлаар нүүрсний экспортын биет жин 20.9 сая тоннд хүрсэн нь өмнөх оны мөн үеийн түвшинд хадгалагдсан дүнтэй гарч байна.
  • 2019-08-15 12:49
    Монголбанк 2019 оны эхний 7 сард 7.5 тн алт худалдан авсан нь өмнөх оны мөн үед 9.3 тн үнэт металл худалдан авснаас 1.8 тонноор бага буюу 19%-иар буурсан үзүүлэлттэй байна. Монголбанк 2019 оны 7 дугаар сард 1.5 тн алт худалдсан авсан ба үүнээс Дархан-Уул аймаг дахь Монголбанкны хэлтэс 134 кг үнэт металл, Баянхонгор аймаг дахь Монголбанкны салбар 106 кг үнэт металлыг худалдаж авсан нь өмнөх оны мөн үед 2.2 тн үнэт металл худалдан авч байснаас 649 кг-аар буурсан үзүүлэлттэй байна.
  • 2019-08-15 12:46
    Засгийн газраас “Монголросцветмет” ТӨҮГ-ын мэдэлд байсан Асгатын мөнгөний ордыг “Эрдэнэс Монгол” ХХК-д шилжүүлсний дагуу өнгөрсөн зургаадугаар сард Ашигт малтмал, газрын тосны газраас уг ордын ашиглалтын дөрвөн тусгай зөвшөөрлийг шилжүүлсэн юм. Тэгвэл “Эрдэнэс Монгол” ХХК-ийн төлөөлөл Ашигт малтмал, газрын тосны газар болон Онцгой байдлын ерөнхий газрын алба хаагчидтай хамтран Асгатын мөнгөний ордын өнөөгийн нөхцөл байдалтай танилцаж, уг ордыг эдийн засгийн эргэлтэд оруулах боломжийг судлахаар ажиллав. Тэд ордоос технологийн дээж авах, замын нөхцөл байдал, уурхайн хэвтээ амуудад нэвтрэх боломжийг судаллаа.
  • 2019-08-14 15:13
    Ерөнхий сайд У.Хүрэлсүх энэ сарын 12-ны өдөр  шуурхай хуралдаан зарлаж, Уул уурхайн сайд Д.Сумъяабазар, Байгаль орчин, аялал жуулчлалын сайд Н.Цэрэнбат, Тагнуулын ерөнхий газрын дарга Д.Гэрэл, ЦЕГ-ын дарга С.Баатаржав, МХЕГ-ын дарга Н.Цагаанхүү, Ашигт малтмал, газрын тосны газрын дарга Х.Хэрлэн болон бусад холбогдох албаны хүмүүстэй Өмнөговь аймаг дахь Гурван тэс сумын Тост, Тосон бумбын нуруунд үйл ажиллагаа явуулж буй “Сауд гоби коэл транс”-ХХК-ий тусгай зөвшөөрлийг цуцлах үүрэг өгсөн юм.