“Ханган нийлүүлэгчдийн үзэсгэлэн-2018” үзэсгэлэн нээлтээ хийлээ

2018-10-03 14:59

“Оюутолгой” ХХК-иас зохион байгуулж буй  “Ханган нийлүүлэгчдийн үзэсгэлэн-2018” өнөөдөр Буянт-Ухаа дахь спортын цогцолборт нээлтээ хийлээ. Хоёр өдөр үргэлжлэх  үзэсгэлэнд тус компанид үйлчилгээ үзүүлдэг 1174 ханган нийлүүлэгчээс 124 ханган нийлүүлэгч, 1700 гаруй хүн оролцож байна. Аюулгүй ажиллагааг эрхэмлэж, дэлхийд өрсөлдөхүйц зэсийн үйлдвэрлэлийг цогцлоож, Монгол Улсын хөгжил дэвшилд хувь нэмэр оруулах өргөн  зорилго агуулсан тус үзэсгэлэнд ханган нийлүүлэгчид өөрсдийн бүтээгдэхүүн дэлгэн үзүүлж, оролцогчдод танилцуулж байлаа.  Үзэсгэлэнг  “Оюутолгой” ХХК-ийн ТУЗ-ын дарга Г. Батсүх нээсэн бөгөөд тус компанийн Гүйцэтгэх захирал Армандо Торрес, “Эрдэнэс Оюутолгой” ХХК-ийн захирал Б.Мөнхбаатар, Өмнөговь аймгийн Засаг дарга Г.Наранбаатар нар оролцож үг хэллээ.

“Оюутолгой компаниас санхүүжилт гаргаж Өмнийн говийн судалгааны ажлыг эхлүүлсэн. Цогтцэций, Ханбогд сумыг хэрхэн  хөгжүүлэх вэ, цаашид хаана юу хийгдэх вэ, зам тээвэр нь яаж уялдах вэ гээд олон цогц асуудлыг багтаасан судалгаа хийгдэж байгааг та бүхэн дуулгая” хэмээн “Эрдэнэс Оюутолгой” ХХК-ийн захирал Б.Мөнхбаатар онцолсон.         

Энэхүү үзэсгэлэн нь “Оюутолгой” компанитай хамтран ажилладаг ханган нийлүүлэгчид, бараа бүтээгдэхүүн, үйлчилгээ болон үйл ажиллагаагаа олон нийтэд таниулан үйлдвэр аж ахуйн нэгжүүдтэй бизнесийн харилцаа тогтоож, туршлага солилцох боломжийг бүрдүүлэх юм.  “Манай ханган нийлүүлэгчдийн үзэсгэлэнд 100 гаруй компани үзэсгэлэнгээ гаргаж байна. Энэ бол өмнөх жилүүдийн чуулга уулзалтуудаас онцгой ялгаатай болж байгааг харуулж байгаа үйл явдал. Учир нь, Оюутолгой компанитай цаашид хамтарч ажиллах хүсэл эрмэлзэлтэй, боломж бололцоотой   аж ахуйн нэгжүүд эндээс маш их зүйлийг ойлгож  мэдэх болно” хэмээн “Оюутолгой” ХХК-ийн ТУЗ-ын дарга Г.Батсүх  онцоллоо. Тэрээр мөн  Оюутолгой компанийн Төлөөлөн Удирдах Зөвлөлөөс энэ оны зургаадугаар сард баталсан Бизнесийн хөгжлийн 10 жилийн стратегийн талаар товчхон дурьдсан юм. 

Стратегийн энэхүү бодлогоос үндэсний үйлдвэрлэлүүдийг дэмжих, импортын бараа материал, үйлчилгээний нэр төрлийг оновчтой багасгах, дотоодын компаниудын чадамжийг нэмэгдүүлэхтэй холбоотой стратегид тусгасан төлөвлөлтүүдээ танилцуулахад үзэсгэлэнгийн ач холбогдол оршиж байгаа аж. Үзэсгэлэнгийн үеэр сонирхсон байгууллага, хувь хүмүүст “Оюутолгой” компанитай хамтран ажиллах суурь шалгуурууд болох аюулгүй ажиллагааны соёл, бизнесийн ёс зүйн зарчмуудыг танилцуулах сургалтууд зохион байгуулж байна.

Үзэсгэлэнгийн нээлтийн дараа “Ханган нийлүүлэгчдийг чадавхижуулах төв”-ийн нээлт болж, “Монголд үйлдвэрлэв” стратегийн танилцуулга, “Монголд үйлдвэрлэв” багц бүтээгдэхүүний гэрээ байгуулах ёслолыг зохион байгууллаа. Үзэсгэлэнгийн хоёр дахь өдөр нь  “Оюутолгой”-н ханган нийлүүлэгчдийн “Оюу” мэдээллийн сангийн танилцуулга, ханган нийлүүлэгчээр хэрхэн бүртгүүлэх тухай мэдээлэл, “Оюутолгой” төслийн эдийн засгийн үр өгөөж улс орны хэмжээнд үнэ цэнийг бий болгох нь  гэсэн сэдвүүдийн хүрээнд хэлэлцүүлэг өрнөлөө.

“Оюутолгой” ХХК нь нийт худалдан авалтынхаа гуравны хоёроос илүү хувийг  Монголын компаниудаас худалдан авдаг. Энэ нь нийлүүлэлтийн сүлжээг бэхжүүлэхийн зэрэгцээ дотоодын эдийн засгийг чадавхижуулдаг аж. Түүнчлэн тус компани дотоодын ханган нийлүүлэгчдийг дэмжих, бараа үйлчилгээг нь худалдан авах зорилтоо биелүүлэхийн тулд ханган нийлүүлэгчдийг чадавхижуулах хөтөлбөрийг өөрийн санаачилгаар боловсруулан ажиллаж байгааг  тус компанийн төлөөллүүд онцолж байсан. Энэхүү хөтөлбөрийн хүрээнд баримтлах бодлого, компанийн стандарт, боломжит ханган нийлүүлэгчидтэй хамтын ажиллагаагаа ил тод болгох чиглэлээр хамтран ажиллаж, тэднийг эрүүл ахуй, хөдөлмөр хамгаалал, чанар, байгаль орчны нөлөөллийн стандартуудыг мөрдөж ажиллахад нь туслалцаа үзүүлдэг байна.

Монголын Засгийн газар, Оюутолгойн төлөөлөн Удирдах зөвлөлийн дэргэдэх Хамтын ажиллагааны хороогоор дамжуулан уг хөтөлбөрийн үйл ажиллагаанд хяналт тавьж, хамтран ажиллаж буй аж. Ханган нийлүүлэгчдийн чадамжийг хөгжүүлэх үүднээс гадаадын хэд хэдэн байгууллагатай хамтран ажиллахаар түншлэлийн харилцаа тогтоожээ. Түншлэлийн зорилго нь ханган нийлүүлэгчдийн техникийн ур чадварыг хөгжүүлэх, бизнесийн ерөнхий мэдлэгийг дээшлүүлэх явдал  гэдгийг ч “Оюутолгой” ХХК-ийнхан хэлж байсан юм.   

“Оюутолгой” компани 2017 онд үндэсний 669 компаниас нийт 336 сая долларын өртөгтэй худалдан авалт хийсэн нь тухайн жилийн үйл ажиллагааны нийт зардлын 69 хувьтай тэнцэж байна. Цаг хугацааны явцад үндэсний ханган нийлүүлэлтийн хэмжээ нэмэгдэхийн хэрээр Өмнөговь аймгийн ханган нийлүүлэгчдийн ур чадвар гайхалтай сайжирч байгаа аж. Иймээс тус компани нь эрүүл ахуй, хөдөлмөр хамгаалал, чанар, байгаль орчин, техникийн стандартуудыг хангасан, үнийн хувьд өрсөлдөх чадвартай л бол  орон нутгийн аж ахуйн нэгжүүдийг илүүтэйгээр сонгодог болсон байна.

Үүнийн дунд 2010 оноос хойш Өмнөговь аймагт бүртгэлтэй компаниудаас хийсэн худалдан авалт 200 дахин нэмэгджээ. “Оюутолгой”  компани 2010-2017 онд үндэсний ханган нийлүүлэлтэд 2.25 тэрбум ам.доллар зарцуулжээ.

Өмнөговь аймгийн Засаг дарга Г.Наранбаатар энэ талаар өөр байр сууриа тодотгон хэлэхдээ “2015 онд Оюутолгой компани Өмнөговь аймагтай хамтын ажиллагааны гэрээ байгуулсан. Түүнээс хойш өнөөдрийг хүртэлх хугацаанд нийтдээ бид 78 төсөл хөтөлбөрийг орон нутагт 36.7 тэрбум төгрөгөөр санхүүжүүлэн амжилттай хэрэгжүүлсэн” хэмээн дурьдлаа.  Энэхүү  хамтын ажиллагааны гэрээний хүрээнд “Оюутолгой” компани Өмнөговь аймагтай хэд хэдэн Ажлын хэсэг байгуулан ажиллаж байгаа аж. Тус компани ажиллаж байгаа нийт ажиллагсдын 20% нь Өмнөговь аймгийн иргэд байна. Энэ тоог ойрын 10 жилд 50%-д хүргэх зорилт тавин ажиллаж байгааг Г.Наранбаатар засаг дарга хэллээ. 

Эдүгээ Өмнөговь аймгаас 105 аж ахуйн нэгж “Оюутолгой” компанид ханган нийлүүлэлтийг хийж байгаа бөгөөд тус аймгийн ханган нийлүүлэлт 60 сая ам.доллар байсан бол 2017 онд 93 сая ам.доллар болж өсчээ. 2018 онд Ханган нийлүүлэлтийн Ажлын хэсгийн зорилго бол Өмнөговь аймгийн ханган нийлүүлэлтийг 103 сая ам.долларт хүргэхээр ажиллаж байгаа юм байна.

Г.Идэр  

 

Сэтгэгдэл байхгүй байна

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • 2020-02-21 17:01
    Хятад болон Ази тивийн бусад оронд коронавирусын тархалт нэмэгдэж буйн улмаас дэлхийн зах зээл дэх алтны ханш 1631 ам.доллар болж өсчээ. Энэ нь сүүлийн 7 жилийн дээд түвшинд тооцогдож байна. Хоёрдугаар сарын 14-нд зах зээл дэх алтны үнэ 1577 ам.доллар/унц байсан юм. Коронавирусын дэгдэлтийн улмаас эдийн засагт үүсэх нөлөөллийг арилгах зорилгоор Хятад улс мөнгөний зөөлөн бодлого явуулах болсон ч алтны ханш үргэлжлэн өссөөр байна. Энэ долоо хоногийн пүрэв гаригт Хятадын Ардын банк бодлогын хүүгээ бууруулах шийдвэр гаргасан юм.  
  • 2020-02-21 13:59
    “Эрдэнэс Монгол” ХХК нь нүүрсний давхаргын метан хийн нөөцийг тогтоож, эрчим хүчний цэвэр эх үүсгүүр болгон эдийн засгийн эргэлтэд оруулах зорилготой метан хийн төслийг хэрэгжүүлэхээр Австралийн “Жэйд Метан” ХХК-тай хамтарсан компани байгуулсан. 2019 оны тавдугаар сард талууд метан хийн төслийн хөрөнгө оруулалтын гэрээнд гарын үсэг зурж, үйл ажиллагаагаа явуулснаар улсын төсвөөс нэг ч төгрөг гаргалгүйгээр уг төслийг хэрэгжүүлж эхэлсэн юм. “Эрдэнэс Метан” ХХК нь Хамтын ажиллагааны гэрээний дагуу өөрсдийн эрлийн ажлын үр дүнгийн мэдээлэл болох 8 цооногийн өрөмдлөгийн мэдээлэл, геологийн бичиглэл, геофизикийн хэмжилтийн өгөгдөл, бүх дээжинд хийсэн нүүрсний чанарын шинжилгээний үр дүн зэргийг “Эрдэнэс Монгол” ХК-д хүлээлгэн өгчээ.
  • 2020-02-21 13:46
    “Эрдэнэс Монгол” ХХК-ийн дэргэдэх нэгдлийн зөвлөлийн ээлжит хурал (2020.02.14)  болж, охин болон хараат компаниудын өнөөгийн байдал, тулгамдаж буй асуудлуудыг хэлэлцсэн юм. Тус компанийн Гүйцэтгэх захирал П.Ганхүү “Салхитын мөнгө, алтны ордыг эдийн засгийн эргэлтэд оруулж олсон орлогоос төрд ногдох өгөөжийг барьцаалан үнэт цаас гаргах замаар иргэний тэтгэвэр барьцаалсан зээлийн тодорхой хэсгийг төлөхөөр хуульчилсан. Энэхүү хуулийг дагаж мөрдөх хуулийн дагуу 3 тогтоол, нэг журам гаргасан. “Эрдэнэс  бонд” гаргах ажлыг удирдан зохион байгуулж байна” хэмээн тодотгосон. Энэхүү бондыг санхүүгийн зах зээл дээр хаалттай хүрээнд гаргахаар төлөвлөсөн  бөгөөд бондоос босгосон хөрөнгөөр 228 мянган иргэний тэтгэврийн зээлийн  6 хүртэлх сая төгрөгийг тэглэх юм.  
  • 2020-02-21 13:21
    2020 оны хоёрдугаар сараас Орос улс төмөр замаар Казахстаны нутгаар дамжин Хятад руу нүүрс экспортлох талаар Москва, Нур-Султан хэлэлцэж байна. Тус хэлэлцээрээр талууд төмөр замын тээврийн тарифыг 65%-иар хөнгөлөх асуудлыг хэлэлцэж буй. Экспортын шинэ чиглэл нь Оросын “Кузбасс” компанийн нүүрсний Хятад руу нийлүүлэлтийг өргөжүүлж, Алс Дорнодын чиглэлийг нүүрсний төмөр замын тээврийг ачааллын дарамтыг бууруулна гэж үзэж байгаа юм. Казахстан улсын хувьд төмөр замын транзит тээврийг нэмэгдүүлэх сонирхолтой байна. Орос нь Хятадын зах зээлд нүүрсний нийлүүлэлтээр Австрали, Индонезийн дараагаар гуравдугаарт орохоор эрмэлзэж байгаа юм. Тус улс нь ирэх 10 жилд Хятад рүү экспортлох нүүрсний хэмжээгээ жилд 55 сая тоннд хүргэх зорилттой.
  • 2020-02-21 12:25
    Үндэсний статистикийн хорооны мэдээллээр, 2020 оны эхний сарын байдлаар гадаад худалдааны нийт эргэлт 932 сая ам.долларт хүрсний дотор экспорт 459 сая ам.доллар, импорт 473 сая ам.доллартай тэнцлээ. Өнгөрсөн оны мөн үетэй харьцуулахад нийт бараа эргэлт 16.1%-иар, экспорт 24.4%-иар, импорт 6.1%-иар тус тус буурсан байна. Гадаад худалдааны тэнцэл энэ оны нэгдүгээр сард 14.3 сая ам.долларын алдагдалтай гарлаа. Өнгөрсөн оны мөн үед 103.3 сая ам.долларын ашигтай гарч байжээ. Энэ онд гадаад худалдаа ашиггүй гарсан нь экспорт өмнөх оны мөн үеэс 148 сая ам.доллараар буурсантай холбоотой. Тодруулбал, өнгөрсөн нэгдүгээр сард алтны экспорт огт хийгдээгүйн зэрэгцээ зэсийн баяжмалын нийлүүлэлт 43.2 сая ам.доллараар буурсан нь голлон нөлөөлсөн байна.