ОУВС: Эдийн засаг өсөлттэй гарсан ч улс төрийн орчин тогтворгүй байна

2017-12-18 13:34
Олон улсын валютын сангийн Захирлуудын зөвлөл энэ сарын 15-ны өдөр хуралдаж Монгол улсад хэрэгжүүлж буй “Өргөтгөсөн санхүүжилтийн хөтөлбөр”-ийн эхний болон хоёр дахь шатны үнэлгээний үр дүнг дүгнэсэн байна. Зөвлөлийн шийдвэрээр Монголд 55.9 сая зээлжих тусгай эрх (ЗТЭ) буюу 79.1 сая ам.долларын санхүүжилт олгохоор болжээ. Ингэснээр Монгол улс "Өргөтгөсөн санхүүжилтийн хөтөлбөр"-ийн хүрээнд энэ онд нийтдээ 83.9 сая ЗТЭ буюу 118.6 сая доллар авахаар болж байна. Өнгөрсөн тавдугаар сарын сүүлээр хөтөлбөр батлагдах үед Монголбанкны дансанд 38.6 сая доллар орж ирж байсан билээ.

Хөтөлбөрийг батлахад манай улс ОУВС-аас хөтөлбөр хэрэгжих гурван жилийн хугацаанд нийтдээ 314.5 сая ЗТЭ буюу 425 сая гаруй доллар зээлэх боломжтой болсон юм.

Захирлуудын зөвлөлийн хурлын дараа ОУВС-ийн дэд захирал бөгөөд Захирлуудын зөвлөлийн даргын үүрэг гүйцэтгэгч Мицухиро Фурусава Монголын эдийн засгийн нааштай өөрчлөлтүүдийг дүгнэн хэлжээ. Тухайлбал хөтөлбөрийн зорилтууд бүгд амжилттай биелэгдэж байгааг онцлоод Монгол улсын эдийн засгийн өсөлт энэ онд 3.3%-тай гарахаар байгаа нь хөтөлбөр батлагдаж байх үед тооцоолж байсантай харьцуулахад хавьгүй өндөр байгааг тэмдэглэжээ. Мөн энэ оны төсвийн алдагдал ДНБ-ийн 7.6%-тай гарч байгаа нь өмнөх 2016 оны үзүүлэлтийн талаас ч бага хэмжээтэй байгаа төдийгүй орлого нэмэгдэж, зардлыг хатуу чанд хянаснаар төсвийн үзүүлэлт таамагласнаас илүү сайжирсныг тэрбээр тодотголоо. Мөн ирэх оны төсвийн тухайд ч хөтөлбөрийн зорилттой уялдаж байгаа ажээ.

Нүүрсний экспорт огцом нэмэгдэж, гадаад бондын эх үүсвэр болон санхүүгийн зээл тусламжийн дүнд гадаад валютын нөөц нэмэгдсэн болохыг тэрбээр мөн онцолжээ.

Мицухиро Фурусава мөн Монголын улс төрийн орчин тогтворгүй байгаа ч төрийн удирдах байгууллага бүтцийн өөрчлөлтийг эрчимтэй хийж байгаа нь дунд хугацаанд өсөлтийг жигдрүүлж, эдийн засгийн өрсөлдөх чадвар, төрөлжилтийг сайжруулах, түүхий эдийн зах зээлийн өсөлт бууралтаас хамааралтай байдлыг багасгахад дэмжлэг болно гэдгийг тэмдэглэжээ.

Тэрбээр мөн хөтөлбөрийн хүрээнд хийгдэж буй банкуудын Активын чанарын үнэлгээний үр дүн тун удахгүй гарахаар байгаа төдийгүй холбогдох хуулиуд батлагдахаар хүлээгдэж байгаа зэргээр банкны салбарын шинэчлэлийн үйл явцыг илтгэв.

Ерөнхий үзүүлэлтүүд ийнхүү сайн байгаа хэдий ч манай улсын эдийн засгийн нөхцөл байдал нь дэлхийн түүхий эдийн зах зээлээс хамаарсан, өрийн хэмжээ өндөр хэвээр байгаа тул хөтөлбөрийн хэрэгжилтийг сайтар хангах нь чухлыг тэрбээр санууллаа.


Б.Төгс

Сэтгэгдэл байхгүй байна

Санал асуулга
Уул уурхайн тухай хуулийн төслийг дэмжиж байна уу?
  • -Дэмжинэ
  • -Дэмжихгүй
  • -Зарим заалтыг өөрчлөх
Үр дүн:
  • -Дэмжинэ
  • -Дэмжихгүй
  • -Зарим заалтыг өөрчлөх

ШИНЭ

  • Уржигдар 18 цаг 54 минутад
    Үндэсний статистикийн хорооны мэдээллээр, энэ оны эхний арван сарын байдлаар манай улсын гадаад худалдааны нийт бараа эргэлт 11.6 тэрбум ам.долларт хүрч 7.1%-иар өсчээ. Үүнд экспорт 6.5 тэрбум ам.доллар, импорт 5.1 тэрбум ам.долларыг эзэлсэн нь өнгөрсөн оны мөн үеийнхтэй харьцуулахад экспорт 9.8%, импорт 3.9%-иар тус тус өслөө. Гадаад худалдааны тэнцэл 1.5 тэрбум ам.долларын ашигтай гарч өнгөрсөн оны мөн үеийнхээс 394.9 сая ам.доллараар нэмэгджээ.
  • Уржигдар 13 цаг 32 минутад
    Зэсийн үнэ АНУ-Хятадын худалдааны дайны асуудал нааштайгаар шийдэгдэж магадгүй гэсэн үүднээс энэ сарын эхний долоо хоногт  өсөлттэй байсан бол өнгөрч буй долоо хоногт эргээд буурах шинжтэй болж ирлээ. Энэ нь АНУ-ын Ерөнхийлөгч Доналд Трампын мэдэгдэлтэй шууд холбоотой юм. Тэрбээр хэрэв худалдааны асуудлыг цэгцлэх эхний шатны яриа хэлэлцээр амжилтгүй болбол Хятадын бараанд хавьгүй их татварыг ногдуулах болно гэдгийг мэдэгдсэн юм. Энэ нь зах зээлд худалдааны дайны асуудал тооцоолж байсан шиг нааштай биш болохыг харуулсан юм. Уг нь эхний шатны яриа хэлэлцээрт талууд Чилид болох APEC-ийн чуулганы үеэр гарын үсэг зурах байсан боловч хурал цуцлагдсан билээ. Одоо гэрээг үзэглэх шинэ газрыг зарлах үлдээд байгаа юм.
  • Уржигдар 11 цаг 29 минутад
    МАН эрдсийн экспортын өсөлтөөр нөхцөлдсөн боломжийг алдахыг хүссэнгүй. Энэ удаагийн төсвийг “сонгуулийн жилийн төсөв” гэж тодотгож болно. Эдийн засагчдын тооцоолж байсанчлан энэ төсөв сонгуулийн жилийг угтсан, зардал өндөртэй халгисан төсөв болсонд гайхах зүйлгүй.  Сонгууль дөхөөд сэтгэл хөдлөлдөө автуузай, төсвийн сахилга батыг бүү сулруулаарай хэмээн ОУВС эрх баригчдад анхааруулсаар ирсэн ч Сангийн сайд ирэх оны төсвийн орлогыг өөдрөг төсөөллөөр төсвийн зардлын хэт өсөлтийг эвтэйхэн тусгаж өгчээ. Өөрөөр хэлбэл төсвийн алдагдлыг хуулийн хүрээнд тогтоосон тул бүх зүйл гаднаасаа сайхан харагдана. 
  • 2019-11-14 11:27
    Нэгдсэн төсвийн нийт тэнцвэржүүлсэн орлого, нийт зарлага, төсвийн тэнцэл зэрэг эдийн засгийн үндсэн үзүүлэлтийг Засгийн газрын өргөн мэдүүлсэнд өөрчлөлт оруулалгүйгээр баталлаа. Нийт тэнцвэржүүлсэн орлогыг 11 их наяд 797 тэрбум 840 сая төгрөг буюу ДНБ-ий 29%, нийт зарлагыг 13 их наяд 872 тэрбум 581.7 сая төгрөг буюу ДНБ-ий 34.1%, нэгдсэн төсвийн нийт тэнцвэржүүлсэн тэнцлийн алдагдлыг 2 их наяд 74 тэрбум 741.7 сая төгрөг буюу ДНБ-ий 5.1%-тай тэнцүү байхаар тооцжээ.
  • 2019-11-13 17:11
    2019 оны эхний арван сарын байдлаар Хятад улс 276.24 сая тонн нүүрс импортолсон  нь өмнөх оны мөн үеийнхээс 9.6%-иар нэмэгдсэн байна. Энэ нь өнгөрсөн онд тус улс нийт 281 сая тонн нүүрс импортолсон хэмжээнд тун ойртсон дүн болохыг тус улсын Гаалийн ерөнхий газар мэдээлжээ. Сарын дүнгээр авч үзвэл, аравдугаар сард 25.68 сая тонн нүүрс импортолсон нь өнгөрсөн оны мөн үеийнхээс 11%-иар өссөн ч өмнөх есдүгээр сарынхаас 15%-иар буурлаа. Шалтгаан нь аравдугаар сарын эхээр болсон Хятадын үндэсний баяртай холбоотойгоор импортын эрчим суларсан гэж зах зээл шинжээчид тайлбарлаж байна.