АХБ: Монгол улсын эдийн засгийн өсөлт 2017 онд 4% байна

2017-09-26 14:48

Макро эдийн засгийн тогтвортой байдлыг хангах хүчин чармайлтаа хадгалахын зэрэгцээ гадаад орчин таатай хэвээр байвал Монголын эдийн засаг улам сэргэх боломж байна хэмээн Азийн хөгжлийн банкнаас гаргасан шинэхэн тайланд дурджээ.

Азийн хөгжлийн банк (АХБ) нь жил бүр “Азийн хөгжлийн төлөв” эдийн засгийн тайлангаа олон нийтэд танилцуулдаг бөгөөд 2017 оны шинэчилсэн дугаарт Монгол улсын эдийн засгийн өсөлтийг 2017 онд 4%, 2018 онд 3% байна гэж төсөөлсөн байна. Энэ нь харьцангуй өөдрөг төсөөлөл бөгөөд энэ оны дөрөвдүгээр сард  гаргасан 2.5% болон 2%-ийн таамаглалтай нь харьцуулахад өссөн дүн юм.  

Тус тайлангийн хэвлэлийн хурал  “Туушин” зочид буудлын “Соёмбо” танхимд болсон бөгөөд Суурин төлөөлөгчийн газрын ахлах эдийн засагч Деклан Магий, Суурин төлөөлөгчийн газрын эдийн засагч Л.Амар нар сэтгүүлчдэд тайлангийн үр дүнгийн талаар мэдээлсэн.   

“Монголын эдийн засгийн өсөлт 2017 онд хүлээгдэж байснаас илүү өндөр байлаа” хэмээн АХБ-ны Монгол дахь Суурин төлөөлөгч  Ёланда Фернанда Ломмен “Азийн хөгжлийн төлөв 2017” шинэчилсэн тайлангийн нээлтийн үеэр онцоллоо. Тэрээр “Бүс нутгийн хэмжээнд ДНБ 2017 онд 5.9%-иар өсөх төлөвтэй байна. Энэ нь 2016 онд 5.8% байсантай харьцуулахад бага зэрэг өссөн дүн бөгөөд бидний дөрөвдүгээр сард гаргасан таамгаас 0.2%-иар нэмэгдсэн үзүүлэлт юм” гэв. .

Дэлхийн худалдааны салбар эрчимжиж, голлох үйлдвэрлэгч орнуудын эдийн засагт сэргэлт бий болж, бүс нутагт оруулсан хөрөнгө оруулалтын хэмжээ өссөн, БНХАУ-ын өсөлт хүлээлтээс давсан зэрэг нь Азийн бүс нутгийн эдийн засагт эерэг нөлөө үзүүлжээ. Газрын тосны үнэ тогтвортой байгаа нь бүс нутаг дахь дотоодын түлшний үнэ буурахад нөлөөлсөн бөгөөд түүхий эдийн зарим томоохон импортлогчдын тухайд гаргасан төсөөллөө өөрчлөхөд хүргэжээ.

“Монголын  эдийн засгийн өсөлтийг хангахад нэн чухал уул уурхайн томоохон төслүүдийг хэрэгжүүлэхээр зорьж буй Засгийн газрын эрмэлзэл нь төлөвлөгөөт хөрөнгө оруулалтыг баталгаажуулахад  онцгой үүрэг гүйцэтгэнэ. Нөгөөтэйгүүр, Монгол улс   ашигт малтмалын нөөц баялгийн салбартаа хөрөнгө оруулалтын таатай орчин бүрдүүлэх нь улс орны ирээдүйн хөгжилд чухал. Гэхдээ   уул уурхайн салбарт тулгуурласан өсөлтийг тогтвортой, хүртээмжтэй байлгах, мөн эдийн засгийн төрөлжилт, илүү өндөр бүтээмжийг бий болгохын тулд бүр ч их зүйлийг хийх хэрэгтэй”  хэмээн Ёланда Фернанда Ломмен санууллаа.

Монгол улсад  эдийн засаг 2016 онд 1.2%-ийн өсөлттэй байсан бол 2017 оны эхний хагаст 5.3%-иар өссөн. Ялангуяа нүүрсний экспорт өссөн, цаашид ч өндөр хэвээр байх магадлалтайгаас гадна бизнесийн хөрөнгө оруулалт хийх итгэлийг сэргээхэд ОУВС-гийн хөтөлбөр  нөлөө үзүүлсэн гэсэн дүгнэлтийг  “Азийн хөгжлийн төлөв 2017” тайланд дурджээ.

АХБ-ны Суурин төлөөлөгчийн газрын ахлах эдийн засагч Деклан Магий “Оны эхний хагасыг авч үзэхэд, Монгол улсын эдийн засгийн өсөлт 5.3%-д хүрсэн нь өнгөрсөн жилийн 1.2%-тай харьцуулахад өндөр өсөлт юм. Энэ нь эдийн засаг хүчтэй сэргэж буйн шинж тэмдэг. Үүнийг  нүүрсний олборлолт сэргэж, экспортын гүйцэтгэл сайн байсантай холбож байна” хэмээн ярилаа.      

Оны эхний хагаст Монгол улсын төсвийн орлого 41.1%-иар өссөнөөр төсвийн зарлага 9.6%-иар нэмэгдэж, улмаар алдагдал 34.1%-иар буурч, ДНБ-ий 5.8%-тай тэнцсэн байна.  Мөн эхний хагас жилд нүүрсний экспорт огцом нэмэгдэж, гадаад худалдааны ашиг өнгөрсөн оны мөн үетэй харьцуулахад 69.5%-иар өсч, урсгал дансны алдагдал 42.8%-иар буурч, ДНБ-ий 5.6%-тай тэнцжээ.

Гадаад валютын албан нөөцийн хувьд зургаадугаар сарын эцсийн байдлаар 2016 оны эцсийнхээс өөрчлөгдөөгүй буюу 1.3 тэрбум ам.доллар байгаа нь 2.6 сарын импортын дүнтэй тэнцэж байна. Эдгээрээс улбаалан оны эхнээс зургаадугаар сар хүртэлх хугацаанд төгрөгийн ханш ам.долларын эсрэг 5.6%-иар чангарчээ.

Харин инфляц эхний хагас жилд дунджаар 3.0%-тай байсан нь 2016 онд төгрөг суларч импортын өндөр үнээр дамжин үнийн өсөлтөд нөлөөлж эхэлсэнтэй холбоотой аж. Түлшинд тавигдсан онцгой татвар түлшний үнийн өсөлтөд нөлөөлөөгүй учир инфляцийн таамгийг бууруулж тогтоосон байна.

Суурин төлөөлөгчийн газрын ахлах эдийн засагч Деклан Магий “Оны хоёрдугаар хагас жилд импортын хэмжээ үргэлжлэн өсөх хандлагатай байгаа учир урсгал дансны алдагдал ирэх жил нэмэгдэх төлөвтэй байна. Өсөлт буурахад нөлөөлөх эрсдэлд түүхий эдийн үнэ буурах, газар нутгийн дийлэнх хэсэгт ган байсан нь газар тариалан, мал аж ахуйн салбарт нөлөөлөх зэргийг нэрлэж болно гэсэн юм. 

Суурин төлөөлөгчийн газрын эдийн засагч Л.Амар “Уул уурхайн салбараас гадна хөдөө аж ахуй, үйлчилгээний салбарт ч өсөлт бий болсон. Энэ нь нүүрсний олборлолт, экспорт өссөнтэй мэдээж холбоотой. Хэдийгээр 2017 оны эхний хагаст Монгол улсын эдийн засаг   5.3%-ийн өсөлттэй гарсан ч өмнөх жилийн эдийн засагт гарсан суурь нөлөөнөөс шалтгаалж, дөрөвдүгээр улиралд бага зэрэг буурч, жилийн эцсээр 4 орчим хувь болох байх” гэлээ.

Энэ оны тавдугаар сард АХБ, Монгол улсын Засгийн газар ирэх дөрвөн жилд хэрэгжүүлэх Түншлэлийн стратегийг хамтран баталсан билээ. Уг стратеги нь эдийн засгийн хүндрэлтэй цаг үед хүртээмжтэй өсөлтийг хангахад Монгол улсад тусална хэмээн Азийн хөгжлийн банкны Суурин төлөөлөгчийн газрынхан хэлж байна. Учир нь Түншлэлийн стратегийн хүрээнд 2020 он хүртэл АХБ Монгол улсад нийт 1.2 тэрбум ам.долларын санхүүжилт олгох бөгөөд нийгэм, эдийн засгийн тогтвортой байдлыг хангах, эдийн засгийн төрөлжилтийг дэмжих дэд бүтцийг хөгжүүлэх, байгаль орчны тогтвортой байдлыг дэмжих гэсэн үндсэн 3 чиглэлд төвлөрөх ажээ.

  


Г.Идэрээ

        

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • Өчигдөр 14 цаг 27 минутад
    Монгол Улсад газрын тосны салбар үүсч хөгжсөний 80 жил, газрын тосны инженер бэлтгэж эхэлсний 25 жилийн ой энэ жил тохиож байна. Уг ойг угтан  салбарын яам Ажлын хэсэг байгуулан ажиллаж эхлээд байгаа бөгөөд тодорхой ажлуудыг хийхээр төлөвлөжээ. Хэдхэн хоногийн өмнө   салбарын яамны зүгээс газрын тосны ашиглалт, олборлолт, экспортын үйл ажиллагаа эрхэлдэг шилдэг компаниудыг тодруулан өргөмжилсөн. Тэгвэл энэ сарын 21-нд ШУТИС-ийн Геологи, уул уурхайн сургуулиас “Газрын тос 2020” эрдэм шинжилгээ, онол практикийн XXVI хурлыг зохион байгуулахаар болжээ.
  • Уржигдар 11 цаг 38 минутад
    Дэлхий дахины амьдралын хэмнэл орвонгоороо өөрчлөгдөж, хүн төрөлхтний хөгжил олон сорилттой тулгарсан  2020 он улирч байна. Ирээдүйд асар их үр дагавар дагуулах олон үйл явдлын эхлэл тавигдсан энэ оныг  халдварт вирусын хамт дэлхий нийт угтсан юм. Коронавирус  дэгдсэнээр  улс орнууд хорио цээрийн дэглэмд  шилжиж, эдийн засаг, худалдаа үйлдвэрлэл, аялал жуулчлал, ложистик, зар сурталчилгаа, спорт, соёл урлагийн гээд бүхий л салбар асар их алдагдал хүлээж байна.  Сорилт, бэрхшээл Монголыг ч тойроогүй. Цар тахлын бодит аюултай нүүр тулсан улс орнуудын иргэдээ хамгаалсан, эдийн засгаа идэвхжүүлсэн туршлага бүр Монгол Улсыг алдаа гаргахаас сэргийлж, оновчтой бодлого хэрэгжүүлэх зүг чиг болох учиртай.
  • 2021-01-15 19:10
    Дорноговь аймгийн Алтанширээ сумын нутагт хэрэгжиж буй Газрын тос боловсруулах үйлдвэр байгуулах төслийн талбайд үйлдвэрийн барилгын ажлыг эхлүүлэх ёслол (2021.01.15) болов.Дэлхий дахинд дэгдсэн цар тахлын хүнд цаг үед Монгол Улс, БНЭУ-ын Засгийн газрууд,  холбогдох төрийн байгууллага, орон нутгийн дэмжлэгтэйгээр “Монгол газрын тос боловсруулах үйлдвэр” ТӨХХК, төслийн менежментийн зөвлөх (ТМЗ) “Инженерс Индиа Лимитэд” компанийн инженерүүд хүчээ дайчлан, хамтран ажилласны үр дүнд өнөөдөр үйлдвэрийн технологийн бус байгууламжуудын барилга-угсралтын ажлыг эхлүүлж байгааг төсөл хэрэгжүүлэгчид онцолсон байна. Өнөөдрийн ёслолын арга хэмжээнд БНЭУ-аас Монгол Улсад суугаа Онц бөгөөд Бүрэн эрхт Элчин сайд М.П.Сингх биечлэн оролцжээ.   
  • 2021-01-14 18:32
    Уул уурхайн ажилчдын ээлж солих зохион байгуулалттай арга хэмжээний хүрээнд ажилчдаас PCR шинжилгээ авах ажиллагааг Нийслэлийн эрүүл мэндийн газартай хамтран 01 дүгээр сарын 16-ны өдөр эхлүүлэх боллоо. Гамшгаас хамгаалах уул уурхай, хүнд үйлдвэрийн улсын албаны Шуурхай штабаас Нийслэлийн эрүүл мэндийн газрын шинжилгээ авах цэгүүдэд аж ахуйн нэгжүүдийг хуваарилж байна. Шинжилгээ өгөх хуваарийг Уул уурхай, хүнд үйлдвэрийн яамны вэб сайтын “Мэдээ мэдээлэл” цонхны “Шуурхай штаб мэдээлэл”  хэсэгт өнөөдөр, 01 дүгээр сарын 14-ний өдөр байршуулах тул аж ахуйн нэгжүүд орон нутгаас ирж шинжилгээнд хамрагдан ээлжинд гарах ажилчдаа Улаанбаатарт ирүүлэх талаар холбогдох арга хэмжээг авч ажиллана уу. Үүний тулд аймгуудын Онцгой комиссын цахим хаягаар тухайн орон нутгаас ирэх ажилчдынхаа мэдээлэл бүхий аж ахуйн нэгжийн албан хүсэлтийг хүргүүлж өөрийн ажилчныг тодорхойлж өгөх шаардлагатай байна.  
  • 2021-01-14 18:17
    ОХУ-ын гадаад валютын нөөцийн бүтцэд анх удаа алтны хувь хэмжээ ам.долларыг давжээ. Тодруулбал, тус улсын Төв банкны тайлангаар, нийт нөөцийн 23%-ийг алт (128.5 тэрбум ам.доллартай тэнцэнэ) бүрдүүлж еврогийн дараа оржээ. Харин 124.6 тэрбум америк доллар нь нийт нөөцийн 22% болж буурсан байна. 2018 онд нийт нөөцийн 44%-ийг америк доллар бүрдүүлж байжээ. Энэхүү өөрчлөлт нь Оросын эдийн засгийг америк доллараас үл хамаарах, хоёр улсын харилцаа муудаж буй нөхцөлд АНУ-ын хориг арга хэмжээнд өртөмтгий байдлыг бууруулах гэсэн ОХУ-ын Ерөнхийлөгч В.В.Путины бодлогын нэг хэсэг хэмээн шинжээчид тайлбарлаж байгаа юм. 2020 оны арванхоёрдугаар 25-ны байдлаар, тус улсын гадаад валютын нийт нөөц 592.4 тэрбум ам.доллартай тэнцэж байв.