Билл Макхэл: Сэтгэл хангалуун харилцагч буцаж ирдэг

2013-09-12 17:29
“Kanawha Scales&System” нь АНУ-ын компани  бөгөөд  уул уурхайн тоног төхөөрөмж, технологийн чиглэлээр ажилла­даг. Энэхүү компани нь олон улсын хэмжээнд эрдэс баялгийн бүтээгдэхүүн  болон барилгын нурмаг материалыг автомашин болон вагонд хялбар автоматжсан төхөөрөмжөөр ачих, мөн ачих үедээ өндөр нарийвчлалтай жинлэдэг системийг үйлдвэр­лэж, худалдаалдаг дэлхийд танигдсан компани юм. Мөн нүүрс баяжуулах үйлдвэрт ашигладаг зарим гол тоног төхөөрөмж болох нүүрс бутлуур, шигшүүрийг өндөр технологиор хийдэг юм. Нүүрсийг нойтон аргаар баяжуулах үед үйлдвэрт хэрэглэгддэг усны хэрэглээг багасгах технологийг боловсруулан олон үйлдвэрт нэвтрүүлэн ажиллаж байна.


Компанийн үндсэн зорилго бол уул уурхайн компаниудад өндөр үр ашигтай баяжуулалтын тоног төхөөрөмж нийлүүлэх, үйл ажиллагааны зардлыг бууруулж үр дүнтэй болгох, хөрөнгө оруулалтыг ашигтай, байгаль орчинд сөрөг нөлөөлөл багатай байлгах бизнесийн  саналыг харилцагчид өгөх явдал юм. “Kanawha Scales&System” компани нь  Монголын QMC компанитай хамтын ажиллагааны гэрээ байгуулснаар Монгол улсад дээрх зорилтуудаа хэрэгжүүлэх нөхцөл бүрдэж байна. Тус компанийн дэд Ерөнхийлөгч Билл Макхэлтэй ярилцлаа.


“Kanawha Scales&System” компанийн үүсэл хөгжлөөс яриагаа эхэлье.


Манай компани 1951 онд АНУ-ын Баруун Виржини мужийн Чарлистон хотноо байгуулагдсан түүхтэй. Өдгөө АНУ-д нийт 14 салбар оффис, 300 ажилчинтайгаар үйл ажиллагаагаа  явуулж байна. Компанийн хувьд химийн аж үйлдвэрийн чиглэлээр бизнесийн үйл ажиллагаагаа эхлүүлж, улмаар уул уурхайн салбарт бизнесээ өргөжүүлэн ажиллах болсон юм. АНУ-д үйл ажиллагаа явуулахаас гадна олон улсад, түүний дотор БНХАУ, Австрали, Энэтхэг, Латин Америкийн орнуудад өөрийн салбараа байгуулан үйлдвэрлэл, худалдааны чиглэлээр  үйл ажиллагаа явуулж байна. Бидний дараагийн сонирхож байгаа зах зээл бол Монгол улс юм.


Монголын зах зээлийг сонирхох болсон учир шалтгаан юу байсан бэ?

 
Би хоёр жилийн өмнө Монгол оронд анх хөл тавьж байлаа. Тухайн үед Монгол улс дахь АНУ-ын Элчин сайдын яамнаас зохион байгуулсан бизнес уулзалтын шугамаар ирсэн юм. Уул уурхай тэр дундаа нүүрсний салбар хурдацтай хөгжиж байгаа Монгол улс нь бидний бизнесээ өргөжүүлэх бас нэгэн шинэ зах зээл байна гэж үзсэн. Үүний дагуу бид сүүлийн  6 сарын хугацаанд Монголд идэвхтэй ажиллаж байна. Манай компанийн бизнесийн үндсэн үйл ажиллагаа нь нурмаг материалыг автомашин болон вагонд өндөр нарийвчлалтай жинлэн, богино хугацаанд ачих систем байдаг.  Өөрсдийн үйл ажиллагааг  Монгол улсад  нэвтрүүлж, өргөжүүлэх зорилгоор Монголын QMC   компанитай хамтран ажиллах гэрээ байгуулсан байгаа.


Монгол улсын уул уурхайн салбар эрчимтэй хөгжиж байгаа энэ үед дэлхийн олон орны техник тоног төхөөрөмж, тэдгээрийг дагасан үйлчилгээ нэвтэрч байгаа билээ. Танай компанийн тоног төхөөрөмж,  ямар онцлог, давуу талтай бо­лон дэлхийд хэрхэн танигдсан чанартай вэ?


Нүүрс, төмрийн хүдэр, фосфат зэрэг эрдэс баялгийн бүтээгдэхүүнийг ачих системийг санал болгохоос гадна нүүрс баяжуулах үйлдвэрийн тоног төхөөрөмж, өндөр давтамжийн шигшүүр, хэт бага ширхэглэлтэй нүүрсийг үр ашигтай баяжуулах технологи болон нүүрс баяжуулалтын чиглэлээр зөвлөгөө өгөх чиглэлээр манай компани үйл ажиллагаа явуулдаг.


Нүүрс баяжуулалтын аж үйлдвэрийн салбарт санал болгож буй бутлах тоног төхөөрөмж нь хэт нунтаглахаас сэргийлсэн өндөр технологитой. Ингэж буталснаар тоос үүсэхээс сэргийлэхээс гадна баяжуулах үйлдвэрийн нөхцөлд усыг хэмнэх урьдчилсан нөхцөлийг бүрдүүлдэг. Ус  хэмнэх чиглэлээр боловсруулсан технологи шингэсэн бүтээгдэхүүнүүд маань нүүрс баяжуулах үйлдвэрийн усны зарцуулалтыг 50 хувь хүртэл бууруулах боломжтойгоор онцлог юм.


Бага ширхэглэлтэй нүүрс буюу 0,25-2 мм хүртэлх ширхэглэлтэй нүүрсэн бүтээгдэхүүнд ашиглагддаг бусад баяжуулах тоног төхөөрөмжтэй манай компанийн санал болгож буй TBS төхөрөөмжийг харьцуулахад ашигт ажиллагаа, нүүрс авалт, гарц их өндөр байдаг.


Нүүрс баяжуулах үйлдвэрийн нүүрснээс урьдчилсан дээж, сорьц авч, түүнийгээ зураг төслийн шатанд ашиглаж  харилцагчийн нүүрс баяжуулах үйлдвэрийн үйл ажиллагааг нь илүү оновчтой болгох нөхцөл бололцоогоор хангахыг зорьдог.


Автомашин, вагонд бүтээгдэхүүн ачих автоматжсан систем нь уул уурхайн болон барилгын нурмаг материалыг  тээврийн хэрэгсэлд  даацын  хэтрэлт, дутагдалгүйгээр нарийвчлалтай, өндөр хурдаар ачдагаараа онцлогтой.  Даац хэтрүүлэн ачснаар нэг тэнхлэг дээр ногдох зөвшөөрөгдсөн стандартаас хэтрэх бөгөөд ингэснээр төмөр зам  болон авто замд эвдрэл үүсгэх, тээврийн хэрэгсэл болон замын засвар үйлчилгээний зардлыг нэмэгдүүлэх зэргээр  сөргөөр нөлөөлдөг.  Даацад нь хүргэхгүй ачилт хийгдсэнээр  эдийн засгийн үр ашиггүй байдлыг үүсгэнэ.


Манай компанийн бүтээгдэхүүнүүд БНХАУ-ын нүүрс баяжуулалтын салбарт маш өргөн ашиглагдаж байгаа.


Аливаа техник, тоног төхөөрөмжийн борлуулалтын дараах засвар үйлчилгээ маш чухал байдаг. Танай компани өөрсдийн тоног төхөөрөмжийн ямар засвар үйчилгээг харилцагчдадаа санал болгох вэ?


Бид харилцагчдадаа гэрээт ажил үйлчилгээний хүрээнд тоног төхөөрөмжийг хэрхэн ашиглах, төлөвлөгөөт засвар үйлчилгээг хэрхэн хийх чиглэлээр дагалдах сургалт, гарын авлага зэрэг шаардлагатай дэмжлэг туслалцааг үзүүлэн ажилладаг. Өндөр техникийн зөвлөх мэргэжилтнүүд маань Индонези, Австрали, АНУ зэрэг оронд олон жил ажилласан туршлагатай.


Харилцагчдаа санал болгох тоног төхөөрөмжийн найдвартай үйл ажиллагааг хангаж ажиллахын тулд QMC компанийн мэргэжилтнүүдээ сургаж, дадлагажуулах, мөн Монгол улсад хамгийн ойр  байршуулах цэг болох БНХАУ-ын нутаг дэвсгэрт байрлах оффис дахь мэргэжилтнүүдээрээ дамжуулан ажил үйлчилгээгээ шуурхай хүргэхийг хичээж ажиллах төлөвлөгөөтэй байна.


Тухайлбал, нурмаг бүтээгдэхүүнийг автомашин болон вагонд ачилт хийх систем нь бүрэн автоматжсан  байгаа. Энэ системийн найдвартай үйл ажиллагааг хангах чиглэлээр сонгогдон ажиллаж байгаа QMC компанийн хувьд техникийн тодорхой ур чадвартай мэргэжилтнүүдийг бүрдүүлсэн байгаа. Тиймээс цаашид санал болгох тоног төхөөрөмж, төслийн тогтвортой үйл ажиллагааг хангах чиглэлд тал талдаа анхаарч ажиллана.


Цаашид Монголын зах зээлд хэрхэн ажиллахаар төлөвлөж буй талаараа сонирхуулахгүй юу?


Манай бизнесийн стратеги бол компанийн үйл ажиллагааг Монголын зах зээл, уул уурхайн салбар дахь харилцагчдад таниулах, бүтээгдэхүүн ажил үйлчилгээнийхээ үндсэн чиглэлийн дагуу баяжуулах үйлдвэрийн үндсэн технологиос авахуулаад эцсийн бүтээгдэхүүнийг ачих тээвэрлэх хүртэлх бүх үе шатанд өөрийн техник, тоног төхөөрөмж, технологи, зөвлөх үйлчилгээгээ  санал болгох юм.  Тухайлбал уурхайд тасралтгүй ажиллаж байдаг тоног төхөөрөмжүүд болох конвейр, үйлдвэрийн тэжээлийн систем, бүтээгдэхүүн холих, бутлах, ачих системүүд нь  хөрөнгө оруулалтын эдийн засгийн үр өгөөжид нөлөөлдөг маш чухал хэсгүүд нь байдаг.


 Харилцагчдын өсөн нэмэгдэж буй хэрэгцээ, тэдгээрийн техникийн шаардлагаас хамааран өөрсдийн өндөр ур чадвартай мэргэжилтнүүд, дэлхийн улс орнууд дахь салбар компаниудтайгаа хамтран харилцагчдадаа төрөл бүрийн техникийн шийдлийг гаргаж ажиллахыг зорих болно.


“Сэтгэл хангалуун харилцагч буцаж ирнэ” гэсэн зарчмаар бид ажилладаг. Цаашид хамтран ажиллаж буй QMC компаниараа дамжуулан харилцагчдад тулгарч байгаа хүндрэлүүдийг шийдэхэд өөрсдийн ажил үйлчилгээг чиглүүлэн хичээн ажиллана.





Ярилцсан Э.Оджаргал               







Сэтгэгдэл байхгүй байна

Санал асуулга
Засгийн газрын хуралдаанаар, ашигт малтмалын хайгуулын тусгай зөвшөөрлийг нэг жилийн хугацаанд олгохгүй байхаар шийдвэрлэв. Энэхүү шийдвэрийг Та хэрхэн дүгнэж  байна вэ?
  • Зөв
  • Буруу
Үр дүн:
  • Зөв
  • Буруу
Эрдэс баялгийн салбарт хариуцлагатай үйл ажиллагаа явуулж буй аж ахуйн нэгжүүдийг нэгтгэх “Хариуцлагаар нэгд” аяныг МУУҮА-аас санаачлан УУХҮЯ-тай хамтран хэрэгжүүлж байна. Энэхүү санаачлагыг Та дэмжиж байна уу?
  • Дэмжиж байна
  • Мэдээлэл муу байна
Үр дүн:
  • Дэмжиж байна
  • Мэдээлэл муу байна

ШИНЭ

  • 14 цаг 55 минутын өмнө
    Оросын коксжих нүүрсний “Колмар” компани Алс Дорнод дахь “Ванино Транс уголь” боомтыг байгуулж байгаа бөгөөд туршилтаар коксжих нүүрсний анхны экспортыг Хятад руу хийлээ. Тодруулбал, долдугаар сарын 1-нд эхний 38.5 мянган тонн коксжих нүүрс, дараагийн өдөр 45.5 мянган тонныг далайгаар тээвэрлээд байна. “Ванино Транс уголь” боомтын эхний ээлжийн 12 сая тоннын хүчин чадалтай терминалыг ийнхүү ашиглалт оруулж байгаа бол 2023 онд бүрэн хүчин чадлаар буюу жилд 24 сая тонн нүүрс нэвтрүүлэх аж. “Колмар” компанийн тухайд, Өмнөд Якутын нутагт “Денисовский”, “Инаглинский” гэсэн нүүрс баяжуулах цогцолбор төслийг хэрэгжүүлж байна. 2021 онд Алс Дорнод  дахь өөрийн эзэмшлийн “Ванино Транс уголь” боомтоор 22 сая тонн коксжих нүүрс Ази-Номхон далайн орнууд руу экспортлох төлөвлөгөөтэй. 
  • 16 цаг 52 минутын өмнө
    Парламентын найм дахь удаагийн сонгуулийн санал хураалт (2020.06.24)  амжилттай зохион байгуулагдаж, 73.64%-ийн ирцтэй  өндөрлөлөө. Үндсэн хуульд нэмэлт өөрчлөлт оруулснаас хойших анхных гэдгээрээ, түүхэнд  байгаагүй олон хүн (нийт 606) өрсөлдсөнөөрөө, шүүхэд яллагдагчаар татагдсан нэр дэвшигчдийг хоморголон баривчилснаараа энэ удаагийн сонгууль ихээхэн онцлогтой, үйл явдлын өрнөл ихтэй болов. Монгол Ардын Нам 62, Ардчилсан нам 11, Зөв хүн электорат эвслээс 1, бие даагч 1, “Та бидний эвсэл”-ээс 1 нэр дэвшигч тус тус  сонгогдлоо. Дөрвөн жил төр барьсан МАН үнэмлэхүй ялалтаараа дахин дөрвөн жил Засгийн эрх мэдлийг атгах хувь тохиож байна. 606 нэр дэвшигчээс 13 эмэгтэй ялалт байгуулж, 2020-2024 оны парламент 13 эмэгтэй гишүүнтэй байх бөгөөд Ардчилсан намаас нэг эмэгтэй гишүүнтэй боллоо.  
  • Уржигдар 14 цаг 52 минутад
    УИХ-ын чуулганы (2020.07.02) нэгдсэн хуралдаанд Монгол Улсын 31 дэх удаагийн Ерөнхий сайд У.Хүрэлсүх хэлсэн үгэндээ, шинэ Засгийн газрын ирэх 4 жилийн мөрийн хөтөлбөр бол “Алсын хараа 2050” буюу Монгол Улсын ирэх 30 жилийн эхний 4 жилийн зорилт, төлөвлөлт байх болно гэдгийг онцоллоо. Дараагийн 4 жилд хэрэгжүүлэх 4 зорилтын нэн тэргүүнд “Импортлогч улсаас экспортлогч улс болох”-д хийж хэрэгжүүлэх уул уурхайн төслүүд, боловсруулах үйлдвэр, дэд бүтэц, эрчим хүчний чиглэлийн ажлуудын талаар танилцуулсан юм. Монгол Улсын эдийн засаг өрийн дарамтгүй, өрсөлдөх чадвартай, бүс нутгийн худалдааны идэвхтэй оролцогч болох арга зам бол экспортыг нэмэгдүүлэх явдал юм. Ирэх дөрвөн жилд Тавантолгой-Гашуунсухайт, Тавантолгой-Зүүнбаян чиглэлийн төмөр замыг барьж дуусгана. Уул уурхайн томоохон төслүүдийг дэд бүтцээр холбож, боловсруулах үйлдвэрүүдийг байгуулахын зэрэгцээ Үндэсний баялгийн сангаар дамжуулан эдийн засгаа бодитой тэлэх явдал чухал байна.
  • Уржигдар 12 цаг 41 минутад
    Улсын Их Хурлын найм дахь удаагийн сонгуулийн дүнгээр бүрдсэн Улсын Их Хурлын Анхдугаар чуулган үргэлжилж байна. Чуулганы (2020.07.02) хуралдаанаар Монгол Улсын Ерөнхий сайдаар У.Хүрэлсүхийг томилох асуудлаар санал хураалт явуулж, санал хураалтад оролцсон 71 гишүүний 98.5%-ийн саналаар Монгол Улсын Ерөнхий сайдаар улиран сонгогдлоо. Ингэснээр У.Хүрэлсүх нь Монгол Улсын 31 дэх Ерөнхий сайд болж байна. 1990 оноос хойш улиран ажиллаж буй хоёр дахь Ерөнхий сайд болж байгаа юм. Өмнө нь С.Баяр улиран Ерөнхий сайд болж байсан бол Ц.Элбэгдорж нь дунд нь завсартайгаар Ерөнхий сайдын албыг хашиж байсан билээ. 
  • 2020-07-01 15:09
    УИХ-ын анхдугаар чуулганы хуралдаанаар УИХ-ын даргаар Г.Занданшатарыг томилсон. Шинээр байгуулагдсан УИХ ойрын хугацаанд дараах таван чиглэлд ажлын хэсэг байгуулж, хугацаа алдалгүй ажилдаа орох ёстойг УИХ-ын дарга Г.Занданшатар мэдэгдлээ. Хуулийн реформоо хугацаа алдалгүй үргэлжлүүлнэ. Монгол Улсын Үндсэн хуульд оруулсан нэмэлт өөрчлөлтөө баталгаажуулж томоохон хуулиудыг өөрчилнө. Эхний ээлжид 37 хуульд нэмэлт өөрчлөлт оруулж, шинэчлэн найруулна.