Уул уурхайн салбарын өнгийг тодорхойлогч “Энержи Ресурс”

2012-11-01 17:16
“Mining Journal Awards 2011” шалгаруулалт энэ жилээс Гран При шагналыг бий болгосон. Олборлолт, технологи, боловсруулалт, дэд бүтэц, нийгмийн хариуцлага, байгаль орчны хамгаалал гээд бүхий л чиглэлээр сайн үйл ажиллагаа явуулж байгаа компанийг Mining Journal Awards-ын Шилдгийн шилдэг буюу Гран При шагналаар шагнах нь зүйтэй хэмээн Шүүгчдийн бүрэлдэхүүн, зохион байгуулагчид үзсэн юм. Гэхдээ Mining Journal Awards шалгаруулалтын хамгийн олон номинацид нэр дэвшсэн, тухайн номинаци бүрдээ хамгийн өндөр оноо авсан компани байх нь зүйтэй гэдгийг шүүгч Н.Алгаа онцолж байв.

“Mining Journal Awards 2011”-т хоёр болон түүнээс дээш номинацид нэр дэвшсэн компанийг танилцуулбал, “Оюутолгой” компани “Шилдэг технологи”, “Шилдэг Эко уурхай” номинацид, “Монгол газар” компани “Шилдэг технологи”, “Шилдэг Эко уурхай” номинацид нэр дэвшсэн бол “Эрдэнэт” үйлдвэр “Шилдэг уурхай”, “Уул уурхайн хариуцлагатай ажиллагаа”, “Шилдэг Эко уурхай” гэсэн гурван номинацид,  “Энержи Ресурс” компани “Шилдэг уурхай”, “Уул уурхайн хариуцлагатай ажиллагаа”, “Шилдэг Эко уурхай”, “Шилдэг технологи” гэсэн дөрвөн номинацид нэрээ дэвшүүлсэн юм. Шүүгчид дээрх дөрвөн компаниас Шилдгийн шилдэг буюу Гран При шагналын эзнийг тодруулсан. Үүнийг тодруулахад тийм ч хэцүү байсангүй. Шүүгч Д.Дондов “Эрдэнэт” үү, “Энержи Ресурс” уу гэдэг дээр л ярилцах хэрэгтэй байх гэсэн санал гаргаж байв.

Гэхдээ “Энержи Ресурс” энэ жил бусдаасаа хол тасархай байсныг бүгд хүлээн зөвшөөрсөн юм. Тиймээс ч шүүгч нарын саналаар “Энержи Ресурс”-ыг Гран Пригийн эзнээр тодруулсан юм. “Уул уурхайн хариуцлагатай ажиллагаа” номинацид ялагчаар тодорсон тэд өрсөлдсөн номинаци бүртээ хүчтэй байсан билээ. “Шилдэг технологи” номинацид гэхэд л шүүгч Н.Алгаа тус компанид хамгийн өндөр оноог өгсөн бөгөөд үүнийгээ “Ус, эрчим хүч болон баяжуулалт гээд маш олон зүйл дээр технологи цогцоор нь нэвтрүүлсэн” гэдэг үндэслэлээр тайлбарласан юм. Шүүгч Г.Шархүү ч үүнтэй санал нийлж, “Маш гоё технологийн шийдлүүдийг хийсэн байна. Усан хангамжийг 86 км өргөтгөж, газраас ус авдаг, ууршдаггүй, хөлддөггүй технологиор хийсэн. Цахилгаан станц нь хамгийн сайн шийдэлтэй. Эдийн засгийн хувьд ус хэрэглэдэггүй, агаарын хөргүүртэй гээд олон зүйлийг дурдаж болно” гэж байв.

Мөн “Шилдэг Эко уурхай” номинацид ч хүчтэй өрсөлдөгч байж чадсан. Энэ номинацид хамгийн өндөр шалгуур тавьж байсан шүүгч Н.Энхбат “Миний бодлоор шууд “Энержи Ресурс”-ыг сонгоно. Яагаад гэвэл нэгдүгээр үзүүлэлтээр эко талаасаа ус хангамжийн асуудлыг тэд бүрэн шийдэж, усны эргэлтийн циклийг зөв зохицуулан говийн бүсэд ус хангамжийн эх үүсвэрийг маш зөв шийдвэрлэж, хоёр том усан сан байгуулж чадсан. Аль ч уурхай, аж ахуйн нэгж ингэж чадаагүй. Хоёрдугаар үзүүлэлт бол дулааны цахилгаан станц юм. Агаарын хөргөлттэй, ус хамгийн багаар хэрэглэнэ. Боловсруулалт нь нүүрс баяжуулахаас гарч байгаа түлшний нүүрсийг дулааны цахилгаан станцдаа хэрэглэнэ” гэсэн бол шүүгч Г.Шархүү Эко уурхайд тавигдах хамгийн гол шалгуур болох Уурхайн хаалтын төлөвлөгөө, санхүүжилтийн эх үүсвэрээ тодорхойлсон хоёр л компани байгаа нь “Энержи Ресурс”, “Оюутолгой” гэдгийг хэлж байв.

Энэ мэтчилэн нэр дэвшсэн номинаци бүрдээ ялагчидтай маш хүчтэй өрсөлдөж байсан нь “Энержи Ресурс”-ыг Гран При шагналыг өрсөлдөгчгүй авахад хүргэсэн. Боловсруулах үйлдвэрлэл байгуулах тал дээр дэлхийд нэлээд өндөрт тооцогддог технологитой угаах үйлдвэр байгуулсан. Мөн 247 км зам барьж, 18КВт-ын цахилгаан станц, ус цэвэршүүлэх байгууламж байгуулсан гээд дэд бүтцэд зарцуулсан бүтээн байгуулалтын хөрөнгө оруулалтын хэмжээгээрээ ч  бусад компаниудаасаа хол илүү байв. Нийгмийн хариуцлагаа ч умарталгүй ажлын байрыг нэмэгдүүлж, тэр дундаа орон нутгийн иргэд нийт ажиллагсдын 28 хувийг эзэлж байгаа нь тус компанийн үйл ажиллагааг тодхон харуулна.

Шүүгчдээс гадна олон нийтийн санал асуулгын дүнг харахад ч номинаци бүр дээр “Энержи Ресурс” хамгийн олон саналыг авч байсан юм. Энэ бүхэн нь тус компанийг Монголын уул уурхайн салбарын өнөөгийн өнгийг тодорхойлж байгаа компани гэдгийг нотолж байна. Mining Journal Awards-ын Гран При шагнал нь чухам тийм л компанид очих учиртай шагнал юм.

С.Болд-Эрдэнэ

Сэтгэгдэл байхгүй байна

Санал асуулга
Уул уурхайн тухай хуулийн төслийг дэмжиж байна уу?
  • -Дэмжинэ
  • -Дэмжихгүй
  • -Зарим заалтыг өөрчлөх
Үр дүн:
  • -Дэмжинэ
  • -Дэмжихгүй
  • -Зарим заалтыг өөрчлөх

ШИНЭ

  • 20 цаг 13 минутын өмнө
    Монгол Улсын эдийн засаг дахь уул уурхайн нөлөөлөл, иргэдийн ойлголт болоод орон нутгийн асуудлаар Сүхбаатар аймаг дахь эдийн засагч Ц.Мөнхбаяртай ярилцлаа. Монгол Улсын эдийн засгийг багагүй хувийг уул уурхайгаас орсон орлого эзэлж байгаа нь статистикаас харагдаж байна. Эдийн засагч хүний хувьд Та уул уурхайн талаар байр сууриа илэрхийлнэ үү? Би энэ салбарын хүн биш учир зөвхөн эдийн засгийн үр өгөөж талаас нь ойлголтынхоо хэмжээнд хариулъя. Өнөөдөр бид нэг зүйлийг магтвал хэт дээшээ өргөөд, бас муулбал хэт харлуулдаг хандлагатай болсон. Аливаа зүйлийн эерэг талыг олж харж сурах шаардлага байна. Ингэж сураагүй болохоор уул уурхайн талаарх цэгцтэй ойлголтгүй, нэг хэсэг нь ашиглах зүйтэй гэхэд нөгөө хэсэг нь бүр хэрэггүй мэт ярьж байна. Эдийн засгийн үр өгөөжийн талаас тайлбарлахгүй бол үр дүнгүй юм шиг олон нийтэд сөргөөр ойлгож байна. Уул уурхайг зөв өнцгөөс нь харж, хариуцлагатай ашиглаж чадвал эдийн засагт үр өгөөжөө өгч байна. Цаашид ч өгнө.
  • Уржигдар 13 цаг 34 минутад
    БНМАУ-ын Сайд нарын зөвлөлийн 1939 оны 38 дугаар тогтоолоор тухайн үеийн Аж үйлдвэр, барилгын яамны дэргэд “Уул уурхай, ашигт малтмал трест” байгуулагдсанаар  Монгол Улсад Үндэсний геологийн алба байгуулагдсан түүхтэй. Геологийн алба тэр цагаас хойш өнөөдөр Монгол орны бие даасан салбар болтлоо хөгжиж нутаг дэвсгэрийг бүхэлд нь геологи, ашигт малтмал, тектоник, геоморфологи, геофизикийн зэрэг төрөл бүрийн геологийн судалгаанд хамруулсан байдаг. Эдгээр судалгааны үр дүнд Монгол орны ашигт малтмалын тархалтын ерөнхий зүй тогтлууд илэрч, 80 гаруй төрлийн ашигт малтмалын 1600 гаруй ордыг нээн илрүүлж олон арван томоохон ордуудыг нээн ажиллуулж байна. Монгол Улсад геологийн алба байгуулагдсаны 80 жилийн ой энэ өдрүүдэд тохиож буй. Энэ ойг тэмдэглэн өнгөрүүлэх арга хэмжээний хүрээнд зохион байгуулагдаж байгаа томоохон ажлуудын нэг нь өнөөдөр  “Холидэй Инн” зочид буудалд эхэлсэн “Монголын геологи 80 жил” олон улсын эрдэм шинжилгээний хурал юм.
  • Уржигдар 11 цаг 26 минутад
    Төмрийн хүдрийн үйлдвэрлэлээр дэлхийд хоёрдугаарт ордог “Рио Тинто” групп нь анх удаа юанийн төлбөрөөр худалдаа хийх гэрээ байгуулжээ. Гэрээ байгуулах ёслол Хятадын Шандун мужийн Рижао боомтод болсон байна. Энэхүү хамтын ажиллагааны эхлэл болгож тус улсын “Shanxi Gaoyi Steel” компани 10 мянган тонн 59.6%-ийн агууламжтай төмрийн баяжмал “Рио Тинто” группээс худалдан авчээ. Ийм худалдааны хэлэлцээрийг ихэвчлэн далайн боомтууд шууд трейдер компаниудтай байгуулдаг. Гэсэн хэдий ч “Рио Тинто” групп нь Хятадын харилцагч нартай худалдааны сувгаа өргөжүүлж, компаниудаар дамжуулан тус улсын төвийн бүс нутгийн гангийн үйлдвэрүүдэд шууд түүхий эд нийлүүлэхээр зорьж байна. 
  • Уржигдар 10 цаг 17 минутад
    Монгол Улсын Хөгжлийн банкны Гүйцэтгэх захирал Г.Амартүвшинтэй MMJ-ийн сэтгүүлч Э.Оджаргал ярилцлаа. Монгол Улсын Хөгжлийн банкны Гүйцэтгэх захирлын албанд томилогдоод Та юунаас ажлаа эхлээд байна вэ? Миний бие энэ албанд томилогдон  ажил хүлээж аваад гурван сарын хугацаа өнгөрчээ. Гурван гол чиглэлээр ажиллаж байна. Нэгд, Хөгжлийн банкны журам, зээл олгох үйл ажиллагаа гэх мэт дотоод зохион байгуулалт, засаглалыг сайжруулах. Энэ хүрээнд зээлийн бодлого, журмыг шинэчиллээ. Компаниудын төсөл хэрэгжүүлэх зээлийн хүсэлтийг Хөгжлийн банк  удаадаг, зээлийн хүсэлт  хаачсан нь мэдэгдэхгүй байна гэсэн шүүмжлэл өмнө нь байсан юм билээ. Тиймээс одоо энэ үйл ажиллагааг илүү нээлттэй болгох үүднээс өөрчлөлт оруулсан юм. Хоёрт, зээлийн чанар. Хөгжлийн банкны өмнөх зээлийн асуудалтай холбоотой 6 хэргийг прокурорт шилжүүлсэн асуудал хоёр дахь чиглэлийн ажлын нэг хэсэг юм. 
  • 2019-10-15 13:59
    Үндэсний статистикийн хорооны мэдээллээр, энэ оны эхний есөн сарын байдлаар манай улсын гадаад худалдааны нийт бараа эргэлт 10.5 тэрбум ам.долларт хүрч 9.5%-иар өсчээ. Үүнд экспорт 5.9 тэрбум ам.доллар, импорт 4.6 тэрбум ам.долларыг эзэлсэн нь өнгөрсөн оны мөн үеийнхтэй харьцуулахад экспорт 12.6%, импорт 5.7%-иар тус тус өслөө. Гадаад худалдаа 1.3 тэрбум ам.долларын ашигтай гарч өнгөрсөн оны мөн үеийнхээс 415.5 сая ам.доллараар нэмэгджээ. Нийт экспортод эзлэх эрдсийн экспортын хэмжээ 4.96 тэрбум ам.долларт хүрч өнгөрсөн оны мөн үетэй харьцуулбал 9.3%-иар нэмэгдсэн байна. Энэ дундаа нүүрсний экспорт орлогын дүнгээр тэргүүлж буй бол зэс хоёрдугаарт эрэмбэлэгдэв.