Энэ сарын 15-20-ны өдрүүдэд БНХАУ-ын Тянжин боомт хотоос Монгол улсын газар нутгаар дайран ОХУ-ын Улаан-Үд хот хүрэх транзит тээврийг туршихаар төлөвлөгдөж байна.
Өнгөрсөн зургаадугаар сарын 23-24-нд Ташкент хотноо гурван улсын Төрийн тэргүүн нар Монгол, Орос, Хятадын эдийн засгийн коридор байгуулах хөтөлбөрийг баталсан билээ.
Тус хөтөлбөрт хэрэгжүүлэхээр тусгагдсан 32 төсөлд Азийн автозамын сүлжээний АН-3 (Улаан-Үд-Хиагт/Алтанбулаг-Дархан-Улаанбаатар-Сайншанд-Замын-Үүд/Эрээн-Бээжингийн гаднах тойрог-Тяньжин) чиглэлийг дамжин өнгөрөх тээвэрлэлтэд идэвхтэй ашиглах, тус чиглэлд хурдны автозам барих эдийн засгийн үндэслэлийг судлах ажил багтаж буй.
Энэ ажлыг хэрэгжүүлэх хүрээнд АН-3 коридорыг ашиглан Тянжинаас ачаа тээвэр Эрээн хотоор дамжин Замын-Үүд, Сайншанд, Улаанбаатар, Дархан, Сэлэнгээр дайрч Улаан-Үд хүрэх маршрутыг хэрэгжүүлэхээр болсон юм.
Уг авто замын коридор нь маш урт зам учраас эхний ээлжинд туршилтын тээвэр хийх ёстой гэдэгт талууд санал нэгдсэн аж.
Э.Од