Эрдсийг эрдэнэст
Ирээдүйг өндөр хөгжилд
Mining The Resources
Minding the future
Уул уурхай

Өргөдлийн дугаар олголтыг ирэх даваа гаригт дахин явуулна

Хайгуулын тусгай зөвшөөрөл хүссэн өргөдлийн дугаарыг цахим хэлбэрээр олгож эхэлсэнээс хойш нийт 2235 дугаар олгож, 1094 өргөдлийг бүртгэн хянан шийдвэрлэжээ. Нийт бүртгүүлсэн аж ахуйн нэгжүүдээс дотоодын хөрөнгө оруулалттай 1,076, гадаадын 100 хувийн хөрөнгө оруулалттай 50, хамтарсан хөрөнгө оруулалттай 12 аж ахуйн нэгж байгаа юм.

Ашигт малтмалын газар Монгол улсын нутаг дэвсгэрийн зүүн хагасын 11..94 сая га.талбай болон баруун хагаст үлдсэн .95 сая га.талбайд хайгуулын тусгай зөвшөөрөл хүссэн өргөдлийг хүлээн авах ажлыг  энэ сарын 24-нд эхлүүлсэн боловч өргөдлийн дугаар олголтын системд саатал гарч, аж ахуйн нэгжүүдийг багагүй бухимдуулаад байна.

Үүнтэй холбоотойгоор Ашигт малтмалын газар, Үндэсний дата төв, Кибер аюулгүй байдлын газраас бүрдсэн Ажлын хэсэг ажиллаж, систем доголдсон шалтгааныг Login серверийн ачаалал тооцоолсон хэмжээнээс хэт ихэссэнээс болсон гэсэн урьдчилсан дүгнэлт гаргажээ.

Нутгийн баруун хэсэгт лиценз эзэмшихийг хүсэгчдийг бүртгэхдээ өмнө нь туршилт хийж үзэж байсан ч энэ удаад ямар нэгэн туршилтгүйгээр дугаар олголтыг явуулсан бөгөөд 900 гаруй байгууллага серверт хандсанаас доголдол үүссэн гэж холбогдох албаны хүмүүс тайлбарлав.

Тухайн өдрийн дугаар олголтыг хүчингүй болгох арга хэмжээ авч, аж ахуйн нэгжүүдийн системд хандах эрхийг нэг долоо хоногоор сунгасан хэмээн Ашигт малтмалын газрын дарга Д.Үүрийнтуяа мэдэгдлээ.

Login серверийн уг алдааг бүрэн тохируулахаар Ажлын хэсэг үргэлжлүүлэн ажиллаж байгаа аж. Шаардлагатай өргөтгөл, тохиргоог хийж, ирэх даваа гариг буюу наймдугаар сарын 31-нд дахин өргөдлийн дугаар олгохоор бэлтгэж байгааг тэрээр дуулгалаа.

Г.Идэр