Эрдсийг эрдэнэст
Ирээдүйг өндөр хөгжилд
Mining The Resources
Minding the future
Уул уурхай

Шивээхүрэн боомтын нүүрс тээврийг эрчимжүүлэх шалган нэвтрүүлэх гарцыг ашиглалтад орууллаа

МҮХАҮТ-ын Ерөнхийлөгч О. Амартүвшин, Тамгын газрын дарга Б.Батболд, Гишүүнчлэлийн газрын дарга Ц.Магнайбаатар нар Өмнөговь аймгийн Гурвантэс сумын нутагт орших Нарийн сухайтын чулуун нүүрсний уурхай болон Шивээхүрэн боомтын үйл ажиллагаатай танилцлаа.

Энэ үеэр “Монголын Алт” (МАК) ХХК экспортыг нэмэгдүүлэх чиглэлээр Шивээхүрэн боомтын үйл ажиллагааг өргөжүүлэн, нэвтрэх хүчин чадлыг нэмэгдүүлэхэд 560 гаруй сая төгрөгийн хөрөнгө оруулалт хийж, хилийн шалган нэвтрүүлэх дөрвөн гарцыг байгуулснаа нээж, боомтын удирдлагуудад хүлээлгэн өглөө.

Тус боомтоор 180 тээврийн хэрэгсэл нэвтэрч байгаа ажээ. Шивээхүрэн боомтоор жилдээ 14 сая тонн нүүрс экспортод гардаг. Хилийн шалган нэвтрүүлэх гарц нэмэгдсэнээр боомтын хүчин чадал нэмэгдэж, хил гаалийн ажилтнуудын ажлын ачаалал багасч, ажиллах орчин нөхцөл сайжрах юм.

Түүнчлэн тус компани нийгмийн хариуцлагынхаа хүрээнд овоотын заставын үйл ажиллагааг сайжруулахад дэмжлэг үзүүлэх зорилгоор иж бүрэн компьютеруудыг гардуулан өглөө.

“Монголын Алт” (МАК) ХХК өөрийн 100%-ийн хөрөнгө оруулалттай чулуун нүүрсний уурхайгаа 2007 оны арванхоёрдугаар сарын 11-нд нээж, 2008 оны тавдугаар сарын 30-нд анхны нүүрсээ экспортолж эхэлсэн юм. Уурхайн нийт олборлох хүчин чадал жилдээ 10 сая тонн нүүрс бөгөөд өнөөдрийн байдлаар тус уурхайд 700 гаруй ажилчин хоёр ээлжээр ажиллаж байна. МАК ХХК нь уурхайн үйл ажиллагааг дэлхийн жишигт хүргэх зорилт тавьж ажиллаж байгаа төдийгүй ажилтан албан хаагчдын ажиллах, амьдрах таатай орчин нөхцөлийг бүрэн хангасны дээр аймаг орон нутгийн хөгжилд бодитой хувь нэмэр оруулан ажиллаж байна.

 

Эх сурвалж: МҮХАҮТанхим